Oxygen leiding kimulo

Oxygen leiding kimulo

Zan ni-in Oxygen bung thak 25 a om teng man i pia a, a bunglui 90 val om na deih hiam hong hong ci hi. Hong pia ten a thak mah deih ding, cih ngaihsun ka hih manin hong kikum phot nung ka ci hi. Tuni in ka lak uh ciangin inntek ten hong thum zawsop uh a, “Cina gim tam lua ahih manin nang leisa sung pan nih na pia mai ung,” hong cimawk uh hi. “Tua aih leh ka lawm KMD sai nei Ko Phu Khua hong piak pen ee leh,” ka cih leh “Tua zong midang na pia pak phot ung, hong loh kik nung hong cimawk uh hi. “A lui bung 90 teng ee leh?” ka cih leh tua teng a bei pah hi” hong ci sawnsawn uh hi.

A LUI A THAK KILAMDANG LO

Kawlpi zato a oxygen thunna setpi-in Kawlpi khua sung a teng nangawn thun zolo ci hi. Tua ahih manin Madalay ah a bung kipuakin tuisiang bung i kilaih dan mahin ei puak bung zahzah amau thunsa bungte hong pia ziau uh nahi mawk hi. Ei bung tektek deih leng ni tampi ngak kul ci uh hi. Tua hi a, a thakte Ks.185,000 bangin hong pia zo uh a, a lui hi leh Ks.150,000 in hong pia zo uh hi. Ks.130,000 in hong pia zo ning, a ci pawl zong om hi. Hih pulnatna hong bei pak kei leh oxygen kicing zolo buaina tung thei ding dan ahi hi.

TONZANG LEH MALKUAL HUHNA KIPUAK KIK DING

Zingsang ciangin oxygen, zatui, antang, besan leh van tuamtuam mawtawpi dim khat kipuak to leuleu ding hi. Piakkhiatna leh thungetna tawh ma a pang khempeuh tungah lungdamna lianpi kong ko uh hi. Guahtui luang ta ahih manin lampi kisiatna a kipan buaina tuamtuam om lo a, a tun theih nadingun thungetna ah phawk ciat ni.

OXYGEN SANGIN A DANGTE KISAM ZAW TA HI.

Cikha zato ah oxygen concentrator bung 22 bang om ta a, oxygen cylinder bungpi 5 leh bungneu 10 om ta hi. Tonzang ah oxygen concentrator 12, cylinder bungpi 10 a neu 7 om ta hi. Kei kiangah leisa Tonzang ading cylinder bungpi 10, Cikha ading bung 10 om khin hi. Tonzang in cylinder bungpi 20 nei ding a, Cikha in bungpi 15 nei ding hi. Tua hi a piakkhiatna tawh ma a pang nuamte in zatui zaha leh nek leh dawn lam kisam zaw ta hi. Concentrator pen mei kisam ahih manin meitui man tam bei mahmah hi. Tua hi a, solar system lam a pia zo i om leh kilungdam mahmah ding a, zattel mahmah ding hi. Lampi ah Tonzang leh Cikha ading oxygen concentrator tengh 14 man ahoihte 2 leh tengh 8val mante 2 hong paipai lai hi.

CIKHA ZATO KILIPKHAP MAWK

Cikha zatopi pan a kizomin misi luang 5 bang kipuakhia mawk ahih manin cina ten lipkhap bawl mawk uh hi. Ka khuapihte zong “Cikha ah na lum phei dih vevua” ka cih ciangin “A hih theih liai lai teng a ki-lipkhap phot hi mai ei” hong ci uh hi. Tulaitak bangin zatopi ah cina nih khawng om lai bek hi. Tonzang zato ah cina sawm 10 kikem laitak hi. Tuni Tonzang ah khat kivui leuleu ahih manin i dah mahmah hi.

I LUPNA PIAKTE KIZANG THEI MAHMAH

Zatopi lam lipkhap bawl uh ahih manin Cikha Hall ah i lupna piakte phah pahin sunthapai cina kilak uh hi. Oxygen va diik, thawlpi va kikhai, zatui va thoh cih bangin nisimin na zang uh hi. Sia Do Khup