Immanuel hong pianna ding thu ~ Hau Za Cin
Pasian thu pen kan zo leng a thupina kimu semsem hi. Thuk kan deuhdeuh leng na thupi semsem a, thuk kan kholkei leng a thupina kitheilo hi. Saguh khauh mahmah khawngkham in a sungah om saguhngek pen ne le’ng, a pua lama om satak leh savun tawh a limna kitehthei deksuailo hi. Pasian thu zong tua bang mah na himawk hi. Leisung a thuk semsem leh suangmanpha hoih semsem a, mite in lai tam sim semsem leh laibu khat bek a simpa sang a theihna a khanzawk mah bangin Pasian hoihna a tam kan deuhdeuhte in “Pasian” ahihna, “PA” a hihna thuk theih semsem a na himawk hi.
Kamsang Isaiah in Immanuel hong pian ding Jesu pianma kum 2700 hun pekin na genkhol hi ci uh hi! Hih a kigenkhol leh tuni donga thupiang totote Jesu pianzawh tu’in kum 2000 val kikta, dik toto lai, a kipelem om nai tuanlo hi. Lamdang lamdang lamdang ka sa hi.
The remnant: Isaiah laibu sungah a lian 1 pan 12 kikal sungteng limtakin i et ciang Pasian in Israel leh Judah pen gawmkik nuam ahih manin vai tuamtuam tawh na kidosak hi. Pasian genna a mang nuamlo mipi tampi lak ah mihoih, upna ah a kip mi, haksatna lianpen a thuakna kawmkal uh pan zong Pasian a it teitei mi bangzah hiam om cih na kilangsak hi. Tua mite pen “the remnant” na ci a, a kuangbang, a tawzelh, ahih kei leh a omlai, a kisiit teng cihna ahi hi. Amau kumpi leh makai sungah Pasian deihloh lamin a gamta ahih uh hangin Pasian in Ama mite honkhia nuam lai veve ahih manin a vekpi un vatmailo a, khat leh nih hawilai veve hi.
A hawi lai mite tawmlua mahmah ahih manin a vekpi un a kigawm uh ciang bawngpi khat leh kelpi khat ii nawitui tawh kivakzo tanghial uh hi. Gamlak linggah nangawn gai zolo uh a, a si mangthang khinlo bekbek uh ahi hi. Tua zaha siatna leh sihna Israel sungah a tun hangin Pasian in “the remnant” na koih lai veve hi. Pasian a it khat leh nih, a nambat a khat leh nih takpi bek mah na hawi himawk hi.
Kamsang Elijah kiangah zong, “Baal mai ah a kun ngeilo mi tul sagih val ka neilai hi” a kici pen zong “the remnant” genna hi kici hi, a tamzawte hihbang zuilo, a hoih a limci dinga akituamsiit vilvel.
Jesse suan: Tua a kihawi, the remnant sung pan a mengkik singbul bangin a hinsuah kikna ding Pasian in Jesse innkuan sungpan mi na koih hi. Abraham kiangah Pasian kamciam pen a tangtunna dingin ‘Jesse suan’ (the root of Jesse) na omsak hi (Piancil 22:18 “na suanlekhakte thupha ka piak bangin leitung minam khempeuh in thupha a ngahna dingun hong ngen ding uh hi. Bang hang hiam cih leh nang in ka thu na mang hi,”). Judah gam leh Israel gam a kivaatmai khit ciangin mi nih leh thum cihloh kithat khin a, tua pen singkung a bul pan a kiphuk bang hi kici hi.
Ahi zongin tua singbul pen muatcip, sicip lo in hong selkik, hong meengkik dinga, tua panin Jesse suan hong kizom kik ding hi. A bei mangthang nading themcik bekbek ahi hi. Tua a mengkik ding pen mi hoih, Pasian um khat leh nih a omte hi peelmawh ding hi. (2 Samuel 7:12 Na pu na pate’ kiang na zuat ni ciangin, nangma sung panin hong suakkhia ding na tapa nangma nungah ka khangsak ding a, keimah in ama kumpi gam ka kipsak ding hi.)
Immanuel hi ding: Tua a mengkik, a selkik pen sung pan kilemna hong om dinga, nopsakna hong khang in, Israel gam hong dingkhia kik ding hi. Tua mun ah, tua gam ah ngia leh tuuno te kikhawl dinga, gialbem leh kelpi te giakkhawm ding uh hi. Humpi leh bawngno kizui in naupangte in a nung pan hawl ding uh hi ci hi. Naungekte gulgu nei kua gei ah kimawl ding uh a, ahi zong tulo ding hi. Tua hun ciang Topa theihna in leitung tuamcip dinga, Amah a theilo om nawnlo ding hi. Mite Pasian lamah kihei in nopsakna leh kilemna tawh kidim ding hi. Tua pen hong piang ding Immanuel hong tun ciang leitung omdan ding ahi hi.
Tua hong piang ding Immanuel tua hun in kithei maw kitheilo kigenlo a, kigen pah nailo hi. Ahi zongin Jesse innkuan pan piang ding hi cih kigen hi.
Lungdamna la sa ding: La sa cih pen heh mahmah leng la kisa thei hetlo hi. Gilo nuam leng zong la kisa theilo hi. Lungdam mahmah ciang bek in la kisa thei hi. Pasian in a hotkhiat khit ciangin Israel te in la sa thei pan uh hi. Isaiah 12 sungah lungdamna la sa ci hi. Lasa ci ziau leh zong kingah leh kilawm hi, ahi zongin tua ci ziaulo in ‘lungdamna la sa’ ci teekteek hi. A gennop siangtak in uang gen mahmah cihna hi. Lungdamna la sa bek hilo in nuntakna tui lungdam lungnuam takin tua tuikhuk pan kidawn ding hi ci hi. Tua tuikhuk pen Pasian a genna ahi hi. Sih theihna tuikhuk pan nuntakna tuikhuk ah Pasian in tonpih hi. Tuni in tua tuikhuk na zuan hiam? Tua tuikhuk gei ah na tu hiam? Sih theihna tuikhuk gei mah ah na omlai kha hiam? Nuntakna tuikhuk hong kibawlsak zo hiven…
Lamdang ka sak: Pasian nam teel kici te nangawn in a Pasian uh a langpan theih mawk pen lamdang kasa hi. Isaiah 1 sungah leitung aw za in, vantung aw na theihpih in ciin kipulak mawk hi. A Pasian uh a langpanna thu uh mi khempeuh theih dingin kitangko himawk hi. Tua hita leh kisiiklo, kikhel tuanlo, a lungsim uh khauh lai veve, Topa in dawmlo ding cih theilo ahi tam… lamdang kasa hi. Pasian zong hehpihna tawh kidim cih ciang a hilh dingin Isaiah sam a, Isaiah sawl napi, tua mite in thumang tuanlo uh hi (Isaiah 6:8 Tua ciangin, “Kua sawl ding a, eite-a’ dingin kua va pai ding ahi hiam?” Topa’ cihna aw ka za hi.
Tua ciangin ke’n, “Hih lai-ah kei om ing! Kei hong sawl in,” ka ci hi). Tua manin Topa hehna amau tungah tung hi. Mulkimhuai, lipkhaphuai mahmah hi. Tulai TV leh News khawngah ki en thei hileh nak mulkimhuai ding hiven. A kumpi uh khat Ahaz nangawn gilo mahmah tazen. A teel mite bek hilo, a kumpi nangawn uh Pasian deihloh minam te tawh kipawl, Pasian min zahtaklo lai uh hi. Pasian heh a, “ka su mai ding hi,” ci hi.
Lungnopna ni suak kik: Tua zahta a langpan leh amaute a lamsangpa Pasian nangawn zahtaklo in a om uh ciang gimna bek thuaksaklo in sihna zong thuaksak a, si mang khin ding uh hita hi. Kumpi innkuan zong hawi cih nei tuanlo, makai innkuan zong dawm tuanlo, gimthuaksak ziahziah hi. Khatzong hawilo in vatmai ding a sawm ahi hi.
Ahi zongin hehpihna tawh kidim Pasian in Pasian ahihna lak a, lametna khat guan kik hi. Tua lametna lim dingin naungek khat – a thuman, a pil, kilemna a omsak ding, Pasian deihna a tangtungsak ding khat piang ding ciin a gensak hi. Tua pen lungnopna nitaang, nisuak ahi hi. Tua naungek pen Immanuel hi ding hi.
Note: Nipini zingsang thobaih in Lai Siangtho ka lungngaih ciang Isaiah laibu a bul lama Immanuel hong pian ding thu a kigenna sungpan Pasian thupina ka phawkvatte kong gelh pak hi. Lungdam, Hau Za Cin
Comment piaknop aomleh...