Online/ Media thupitna ~ Hau Mung

Online/ Media thupitna ~ Hau Mung

Coronavirus mulkim huai mahmah napi, hih huham hangin leitungbup in social media lam ong kilimzat mahmah in tha ngah khinkhian ing.

Bang hang hiam cih leh, tuma kum 2006 lai (social media kitamzat nailoh hun) khawnga kipan Japan ah website bawldan leh IT lam sin kawmkawm in deihsakna tawh tentan piakawikawi, media team makaihna te zong ka kipat lai hamsatna tam mahmah hi.

Kum 2008 a kipan biakna pawlpite leh Facebook akipan social media hong tha hat toto in ahi zong Live Streaming bawl nading thubaih nai hetlo hi.

Kum 2012 kiim a kipan Zomi sungah kikhopnate Ustream leh Windows Media Player tungtawn pan live streaming ong lem theita in ahizong pawlpi tampi in zangthei nai hetlo lai hi.

Kum 2018 kiim a kipan Facebook tawh Live kikhah theih teh nuam kisa mahmah (a hang pen Free Service) ta in, ahi zong pawlpi denomination a khauhpai lai pawlpiten awlmawh vetvetlo lai uh hi.

Tun 2020 taktakteh, COVID19 hang in A-Lo-Theilo media lotawh pawlpi leh vai tuamtuam kihawm thei mahmah nawnloh hun ong tungteh bel awnidang media thupitna i gengen, i pulaklak leh kipumpiaknate a kipan deihsakna tawh i pattah nih le thum ten ma ong pang in pawlpibup in media thupitna ong kithei mahmah/zawdeuhta takteh ihtuh khaicite ong pokhia ziauzuai bang in na angtang mahmah ing.

Tun, pawlpi sungah media lam a siam, a sinngiatte pawhtawi in thapiak ding kipan tading hihang. Khasum a san tak ahihlam zong phawksak ding hihang. Mipiten i muhpihloh (behind the scene) ah zanhak lianga pawlpi ading a sem a bawl tampi kiomta ding hi cih telhuaita hi.

Media manphatna, a thupitna leh a kisapna pen mailam ah ong zai semsem lai ding ahih man zatsiam kei leng buaina lianpi zong ong piangsak thei ahih lam zong kidop det ding thupi mahmah hi.

Pasian in Media hong zatna bangin zatsiam ni.

• Kigamlate hong kinaisak Media hi.
• Lungsim hong kilang khiasak Media hi.
• Kideidanna omlo hong kigawmsak Media hi.
• Mun khatpan leitungbup hong kizelzak Media hi.

Tua ahih man in: Leitungbup Innngak Hun (Safer at home/Stay Home) laitak in pawl tuamtuam kideidannate, kitelkhialhna tuamtuamte, kisimmawh nenniamna tuamtuamte Media tungtawnpan kigawm khawm kipawlkhawm kikngiat henla kipumkhatna tawh Topa sungah innkuan khat bangin a lamdang genzawhloh hoihna leh kilamthakna Topa’n hong piangsak ngiat ta hen. Kuitung’Pa (Tulsa, OK)