Nute’ Ni piankhiatna ~ Thawn

Nute’ Ni piankhiatna (Mother’s Day) ~ ~ Thawn

“NUTE’ NI” Mother’s day a phuankhia nu in Philadelphia a teng “Anna Javis” a kici mi ahi hi. Amah 1864 kum in suak a, mitkhua mulo sanggam khatbek nei hi. Leitung ngeina bangin it leh ngaih hon gnei hi napi a it masakpen tawh a hong kitten theihloh manin pasal neih loh dingin khentat hi. Nuntak lungmuanna Zumpi (Life Insurance)ah na sem hi. Kum 41 a phak in a nu in sihsan ahih manin, mit khua mulo a sanggam nu kem dingin a nasepna pan tawlnga hi.

Anna Javis in a nu’ kitangsapnate hong naakphawk lua mahmah ahih manin NUTE PHAWKNA NI bawl dingin hong geelin hong ngaih sunsun a, USA gam vaihawmte’ tungah ngen zelzel hi. Kum 1908 May 10 ni in Biakna lam ah hong kizang hi. 1914 kum ciangin US gambup zat dingin American President Mr. Woodrow Wilson makaihna tawh Perliament kikhopna panin May kha nipi nihna “NUTE NIPI” a zat ding khentat uh hi.

Hih hunin nute phawkna lim dingin paakkual kaang (White Camation) kizangh ding vaihawm hi. Mikhempeuh in hoih kisa in kipakta ciat ahih manin asawtsawt ciang sum metbawlna dingin kinei hi. Anna Javis hehlua ahih manin 1925 kum Nute’ Ni kikhopna ah “Paakkual pen summet bawlna ding hi lo hi,” ci-in hong kitom gawp a, atawpna ah Palik ten thong ah khum uh hi. Thukan te in thu adot uh ciangin hih paakkual kang pen kei tupna bangin kizangh lo hi, kaphuat bang kisik phial ing” cih zah dongin genkhia hi. Paakkual kaang summet bawl nading hilo hi, cih a gen kawikawi na hangin kum 60 aphak ciangin hailawh in hong sihlawh zuzen hi.

Nute’ Ni pen biakna bek ah hilo, ki-ukna lamah zong kizangh a, tu-in ei kiang ah zong kizangh den ta hi.
Nu meilo-in innkuan suangtheilo hi. I nu I patawh I nuntak khopsung in Nute’ kisapna kiphawk khol lo hi. Nute’ om lohna bangkua pen bu a nei lo vasa hon omna tawh kibang hi. Nu tawh tagah kici loin, pa tawh tagahte tagah hi, kici hi.

Nute’ ni pen asisa nu phawkna hi. A nungta lai nute pen vaakna kisam hi. Kawlte’ thuciin ah, “Nanu a sih ciangin kah kei inla, a nuntak lai in vaak in,” ci hi. Tua hi a, “Phamsa ningtui hong tulhsangin, ka hin lai ningtui tulh aw, Ka hin lai in albang kah aw, Thangvan ah hil ding hing e, hong ci ding hi.

Behlapna:
Nute’ ni pen asisa nu phawkna hi. A nungta lai nute pen vaakna kisam hi. Kawlte’ thuciin ah, “Nanu a sih ciangin kah kei inla, a nuntak lai in vaak in,” ci hi. Tua hi a, “Phamsa ningtui hong tulhsangin, ka hin lai ningtui tulh aw, Ka hin lai in albang kah aw, Thangvan ah hil ding hing e, hong ci ding hi.

Nute’ thupitna Mipilte’ gen pawlkhatte

1. Nu hoih khat in Sia 100 tawh kikim hi. (George Herbert)

2. Nu hoih 3 hong pia le uh cin leitung buppi ka uk zo ding hi. ( Napoleon Bonarpat).

3. Pasian a zahtak nu a nei peuhmah genthei ngeilo hi. (Abraham Lincoln).

4. Nute in vantung kongpi tawhtang kemte ahi uh hi. ( Theodore Williams).

5. Nu hoih khat pen galkap kuan khat (Batalion 12) sangin manpha zaw hi. (H.Benson).

6. A lawhcing pasal peuhmah zi hoih neiteng ahi uh hi. (George Washington).

7. Nute hong pia dih un, amaute zangin leitung kong kilamdangsak ding hi. (St. Augustine).

8. “NU” cih kammal sungah lungnopna zatui namkim kiguang khawm hi. ( Bishop Thomson).

9. Nute in a tavuante uh hong zotekleh India gam in haksatna thuak lo ding hi. (Mahatama Ghandhi).

10. Nu banga Pawlpi a it lote in, Pasian zong Pa bangin it theilo hi. (Martin Luther).

Nute’ Laivuanna (Examination) thudotnate: (100 marks)

1. Na ta tawh thu na ngenkhawm zel hiam?

2. Na ta tawh Topa’ nasep khatpeuh na sem khawm ngei hiam?

3. Na ta tungah Lai Siangtho tangthu na gen ngei hiam?

4. Na ta Lai Siangtho kamngah na ngahsak hiam?

5. Na ta Sunday School thusinte na dongkik zel hiam?

6. Na ta, annek thunget na neihpih tangtang hiam?

7. Na ta in na Lai Siangtho sim laitak leh na thunget laitak hong mu kha ngei diam?

8. Ni sima na biak leh na pahtawipa pen Jesu Khris ahi, cih na ta in hong theih pih diam?

9. Innkuan kikhop na bawlpih hiam?

10. Na ta’ ading atuam vilvelin thungetna hun na neihsak zel hiam?

Mat bang zah na ngah a Zomi nute’ khempeuh a kia om lo dingin Zomi pate in kong lam en uh hi. Zomi Nute’ khempeuh in, Pasal tungpan a thupha, Pasian tungpan a thupha, teekte’ tungpan a thupha leh tate’ tungpan a thuphate a ngah kim dingin i kideihsak hi. Thawn