Kum 6 aphapan atapa uh an ngawlh in a sisakliang US nupakop te thongkiata

Kum 6 aphapan atapa uh an ngawlh in a sisakliang US nupakop te thongkiata

USA, Illinois State sung aom nupa kopkhat te’n kum 6 aphapan atapa pen an pialo in gawtbawl uh ahih manin, atapa in sihlawhliang hi. Tuabang in atapa sihlawh liangzahdong in an a ngawlsak nupakop tepen kum tampisung thong akiading in thu kipia cih Alton Telegraph pan kiza hi.

Tua kum 6 bekbek aphapan naupang pen amin Liam Roberts kici a, anu apa te’n an ngawlhcip in, gilkiallua mahmah in asi ciliangmawk hi. Ataktak in hih thupiang pen 2017 kumin thupiang hi a, ahi zongin anu apa tepen tu’n athongkiat dingzah thukhenna kiciantak in akineita ahihi.

Liam Roberts pen kum 6 aphakhin ahih hangin asihhun laitak in apumpi agihna pen 8 kg bekbek phata lawmlawm hi. Naupang pasalno amahgual khat ii agihna pen azahthum, 24 kg bang aphading himahleh amahpen agihna 8 kg bekbek apha ahihi.

Asihma in agil kilalua mahmah ahih manin leilak ah anneng, ninthem akia amuh peuhpeuh aduhgawp zahdong in agil kialcip in anu apa te’n koihcip uh cimawk hi.

Hihbangin naupangno bangmah atheician nailo, kum 6 aphapan khat agawtbawl dikdek nupa tepen tukalsung in Illinois Court thukhenzum ah thusitna akinei ahihi. Naupangno ii apa ahi Michael L. Roberts pen kum 25 sung thong akiading in thu kipia hi. Anu (anu taktakbel hisamlo, anukik) ahi Georgena L. Roberts pen kum 20 sung thong kiading in thukipia hi.

Hihte nupa pen kum 43 tuak aphakhin uh hi a, anih un Illinois State sung aom Jerseyville khuasung pan akhangkhia te ahi uhhi. Naupangno ii asihna hangtawh First-degree Murder in thu akibawl hi a, amauzong anih un mawhkisa, khial kisa in kamawhmah uhhi ci’n pulakkhia uhhi.

Hihvai Illinois Court ah thukhenmangpi asem ahi Chief Circuit Judge Eric S. Pistorius in agenna ah “hihcibang thupiang aomding inzong ngaihsutzawhding hamsa mahmah hi” ci’n genkhialiang hi.

Kumpi thunei te’n agenna ah hih nupakop te’n tua naupangno pen gawtna “Punishment” in gilkial in akoihcip uh cihi. Asihkhit cianginzong Autospy kibawl a, asihna ahangpen apumpi sungah tha neihnading bangmah omvetlo in malnourishment tawh asi hi cimawk hi.

More: Malaysia gamsung ah HFMD natna hangin naupang tampitak in cinatlawh

Hihvai tawh kisai in Jersey County State’s Attorney Ben Goetten leh Jerseyville Police Chief Brad Blackorby te’nzong Joint Statement abawlna ah ahehpihhuai naupangno sihna hangin tua nupakop tepen thongsung ah tawlpikhat aomding uh hita hi ci’n genkhia uhhi. Sawltak #zomidaily