Nupa ki muanmawhna thu ~ Job Cinpi

Nupa ki muanmawhna thu ~ Job Cinpi

Nupa kaal sungah kimuanmawhna a om ciangin tua nupa kaal sung pen nop lam sangin noploh lam manawh zaw den hi. Na zi na muanmawh man, na pasal na muanmawh manin na nupa kaal sung a nuam zaw dingin na um kha hiam?

Cihnopna ah mi pawlkhat in a zi ahi a, a pasal ahi zongin muangmawhin encik den leh kisuang den ding uh a, tua kisuanna un amah a it sak semsem amah a lungkimsak zaw semsem ding bangin a ngaihsun kha mi pawlkhat om uh hi. Tua pen numei in zong ngaihsun thei a, pasal in zong ngaihsun thei hi. Tua bang lungsim om leh bang ci cih ding?

Na zi ahi a na pasal tungah ahi zongin muanmawhna lungsim na neih a kipan nang le nang na kisittel ding kisam hi. Muangmawh cih pen thutak hi nai lo a, upmawh thu hi cih pen a muangmawhte lam pan ngaihsut ding kisam hi. Bang hang hiam cih leh muanmawhna pen upmawh thu pan kipan masa den hi.

Tua ahih manin hih ka muanmawhna pen upmawh hi phot a thu kician le mitmuh taktak om lo hi cih pen a muangmawhte lam pan phawk den ding thupi mahmah hi. Tua bang hi kei leh upmawhna lian semsem leh ipmawh pen a taktakin kisang kha thei hi. Tua bang muanmawhna lungsim tawh na zi ahi a na pasal ahi zongin na etcik ciangin na muanmawh lam hong kithei ding hi.

Tua hi leh muanmawh a thuakte lam pan kei hong kimuangmawh hi ta a, cih lungsim nei ding uh a, a om dan ding uh nuam sa loin a hek a tat uh hong kilamdang pian pah ding hi. Tua bangin a hek a tat uh kildang ahih manin na lungsim sungah ka upmawh mah hi, ka etcik lam hong theih ciang a hek a tat kilamdang mah ci-in na mu kha lai ding hi. Tua pen lungsim hong lut ciangin khialna lianpi hong piang toto thei hi. Mi pawlkhat in upmawh thu pen theihna sa kha uh hi.

Tua bangin nupa kaal sungah khat zawzaw in muanmawhna lungsim hong naih ciangin muanmawh a thuakte lam pan na mahmah hi. Hihlohna kimuanmawh pen a thuak hak mahmah thu khat ahi hi. Tua manin tu a na muanmawh pen na it mahmah na zi , na pasal hi cih na phak den ding kisam hi. Muanmawh a thuakte in a hihlohnapi khat uh a kimawhsak ciangin ngaihsut loh ding thu peuh ngaihsun kha thei uh hi.

Ka hihloh lam tak nong theih gigesa hi. Nong neuseknop manin hih bang thu a mu khia hi teh, kei tawh na kigawm noploh man hi lel ding hi. Nong it nong ngaihna kiamta hi ding hi. A dang khat zong nuam a kei hong nawnkhin na hi hi, ci-in ama thutanna tungah kisuanna om lo lua mahmah ahih manin a lungsim ut thu khat ngaihsun kha thei ding uh hi. Tua in nupa kikhen ding baihsak mahmah hi.

Tua ahih manin nupa kaal sungah kimuanmawhna khatpeuh a om ciangin kipum muanmawh khak loh ding kisam hi. Zite ahi a pasalte ahi zongin khat le khat kimuanmawhna om thei hi. A tam zaw pen itna hangin kimuangmawh khial thei ahih manin kidop huai mahmah hi. (Siapi P Moe Nin Laibu sung pan thu tomlak) Lungdam, Job Cinpi (Zomi Laisim Nuamte)