Vondeih Kep Ding – 149 (Dimno’ Pa)

Vondeih Kep Ding – 149 (Dimno’ Pa)

Tawngno, Tawngno aw, na pa in kong laikhakte ah laisim ding kong limgen mahmah hangin ken zong a simsim zo hituan peuhmah lo hing. Laibu 10 ka leina panin 3 khawng bek a vek in sim gai zo ding hing. Pawlkhat ka lei hangin kei adingin ka lei hi lo-in, no unau sim ding leh nidang ciang ih sim khop ding ci-in ka lei ngiat zong om hi.

Ka lunggulh lian pen ahih leh laisim manphatna thei-in, laibu sung panin pilna sin in, tua tawh nong khankhiat theih ding leh na dangdangte na siau sangin laibu sim na siau ding lunggulh penpen ing. Tua hang mah in zong laisim ding hong limgelh zek hi ing. Bang hanghiam cih leh a khangto mite in laisim a, laisim lo mi, laisim lo minam peuhmah khangto lo pah hi.

Kong genngeisa mah bangin tu laitak leitung a sumhau pente zongin lai nakpitak in simsim lai a, a laisim uh pen ei phak zawh ding hituak lo hi. Tua zah dongin mihauten laibu na sim ta zen uh hi. Laisim cih pen thu kaikawmkawm hipah hi.

Pension la khin Dr. Khin Mg Nyo –Ph.D zong khuata khat panin a khangkhia hi-a, college kah a kipan in library pai-in laibu kasim manin Ph.D ciang a tung zo hing,’ ci-in a thugenna khat ah a gen za ngei ing. Dr. Khin Mg Nyo –Ph.D pen na pa in ka deih mahmah kawlgam laigelh siamte lak ah khat hi-a, ka deih pen cileng zong khial kei mai ning. Tua manin ka khualzin ma hita leh ka khualzin khit hita leh ama laibu bawlte ka omom na panin lei theihna ding mun aom nak leh peel lo-in ka lei hamtang hi.

Ka cihsa mah bangin tuin zong ka sabuai tungah sim dinga library pan ka kawm bu 3, zingciang ka pick ding bu 2 leh a thak ka lei bu 2 om hi. Denciang koizaw sim ding cih a ngaihsunsun kawm hi ing.

Hong it,
Na Pa
August 12, 2018