Nupa Innkuansung ki maingapna ~ Rev. Lian Za Tuang

Nupa Innkuansung ki maingapna (Intimacy in marriage and family) ~ Rev. Lian Za Tuang

Khanglui innsung khat pan khangkhia khat ka hihna le Pasian nasem a ka zin kawikawina pan, nupa sung, innkuan sung kimaingapna pen eimi sungah a kisap mahmah khat in ka mu hi. Innkuan kipawlcing thei mahmah napi’n ciamnuih bawlkhawm, kimawlkhawm, holimkhawm cihte kitawm muh hi. Maigum sa-in zingtho a khat le khat dam maw, na ihmut nuam hia kicihte om lo hi. Muksiam, kamsiam pen ei innsunga zat theih loh danin kingaihsun a, mi kiang, khualzinna mun beka zat ding danin kingaihsun bek hi. Nupa nangawn tukhawm, holimkhawm, khut kilena lam paikhawm cihte kimu ngei lo hi.

1. KIMAINGAPNA IH CIH IN BANG HIAM?

Mangkangte’n ‘intimacy’a cih pen ‘kimeltheihna, kimaingapna’ cih hi-a tua pen itna pan hong paikhia hi napin ih itte khempeuh kimaingap pah hetlo hi. Maingap theih mi om-a maingap theih het loh mi zong om veve hi. Tua manin kimaingapna ih cihin bang hi-a bangci bangin nupa sung, innkuan sung, lawm le gual sungah kimaingapna hong om thei ding hiam cihte theih huai ka sa mahmah hi.

Kimeltheihna,kimaingapna in lungtang nih kisukkhakna hi-a piakkhiat hun,ngah hun, gen hun, ngaih dide hun le neihkhop, zatkhop hun cihte om loh phamawh hi.

Kimeltheihna,kimaingapna ih cihin mite sung lam, pua lam telcianna le ei sung ei pua lam kitheihkhiat sakna kipulakna (transparency) a hi hi. Ih nuamna ih dahna,ih ngaihsutnate kitheihpih khawm-in, thuk taka kilawmtatna (intimate friendship) ahi hi.

Kimeltheih, kimaingapna ih cih pen a to het lo van manpha khat tawh kibanga dop mahmah kul hi. Zanni a kimeltheih, kimaingapna pen zing ciang dong kimanglo thei hi.

Kimeltheihna, kimaingapna pen nu le pa kilunggulhna (zawllenna) mun beka zat ding cih ciang lel hi lo-a tua tawh tehkak zawhloh a thupi zaw tham ahi hi. Mi dang khat kimeltheih kimaingap taka ih kihona in khauhtaka kilawmtatna piang sakin a lungsim khempeuh tuisuak sak zo hi.

2. BANG HUN TEH MIHING NUNTAKNA AH KIMELTHEIH, KIMAINGAPNA HONG OM HIAM?

Pasian in a bawlsa na khempeuh lak pan mihing a tuam vilvel in hong bawl hi. Amah i lungsim, ih nuntakna khempeuh tawh it-in thuk taka ih kizop theih nading le mi khempeuh tawh zong thuk taka itna tawh ih kizop theih ding a deihna in ‘Kimeltheih, kimaingapna’ nei in hong bawl hi.

Ih suah tung phetin kimeltheih, kimaingapna ih nei pah hi. Nu’ gil sung ih om lai-in a lungtang kisai nuai-ah lungmuang, khamuang takin ih tawlnga-a ih suahkhiat teh nu’ gil tungah tawlnga-in a nawi ih tepkawm-in ih nu’ maitang ih en to gige na tawh ka nu hong neihsa hong it mahmah khat hing cih lungmuanna ih ngah hi. Naungekte pen nu’ lungtang kisai tawh kitamzop khak semsem le hoih hi, ci’n mipilte’n gen hi.

Ih nu’n a nungzangah hong pua-a lungmuang tak, laulo takin ih khuadak a, ih diang ziahziah hi. Ih gilkial, dangtak hun teh a anglam ah hong koih in a nawi hong tep sak a, lungmuang tak mahin mit si dide kawmin ih tep hi. Khuadam teh puanlum tawh hong tun-in a khut, a cilum tawh hong lumsuah hi. Ih nu ih pa le sanggamte’n ih khut pan hong lenin lam pai hong sinpiha lungnuam sinnuam takin ih dianggawp hi. Tua banga hong kep hong donna itna khut tawh hong let hong pomnate pen ih gol khit dongah ih lunggulh den khat hi cih phawk ni. James J. Lynch in;

“Kimeltheih, kimaingapna om lohna in lungsim lam leh taksa lam kisia sak hi” (Lack of intimacy brings emotional and physical deterioration) Heart Connections p.24

Mangkangte danin kikawi, kipom; kitawp, kinam (kiss,hug) cih ih zat het loh pen ih supna lian pen khat in ka mu hi. 1998 kum India LSTho sang kikhak sungin Pastor Benjaminte kiang Ooty ah ka om-a sangkah dinga ka pai kik ding teh siapate nupa in hong kawi-in hong nap mawk pen, ka pian ka khan sung itna tawh kikawi kinapna ka thuah khak cilna ahih manin lungdam lua-in ka lungsim khempeuh hong tuisuak a ka khitui hong luangkhia demdam hi.

Itna laigil lunggulh a, a dangtak mahmah zomite hi hang cih ka mu a, zi le ta ka neih teh kisin-in ka nuntakpih khat a hi hi. Na innsungah khat le khat lungsim thuk taka kizopna na lunggulh leh na nupa kikal na tate tawh kikal-ah na panin Pasian hong deih sak nuntak zia a hih manin hong kilamdang pah dinga ZBC 100 sunga “Ih kimkot teng kilawmna innkuan ki-it leeng…” cih la a batin sa nawn lo in nang la tatak hong suak ding hi.

3. BANGHANG KIMELTHEIH KIMAINGAPNA NEIH THEIH NADING KISIN KUL HIAM?

A. Mawhna Sungah Mangthang Khin Hi.

LSTho Piancil sungah Adan le Eve in Eden huan sungah kilawmtatna ciangtan om lo (unlimited) in nuamtakin zangh hi, cih ih thei-a hih bangin bangtan sung om uh hiam cih bel ih thei kei hi. Pasian’ thu hong manloh khak mawk uh teh na khempeuh hong kisia gawpin mihing le na khempeuh kizopna (intimacy) teng hong bei pah hi. Pasian in mihing, ganhing le na khempeuh a kituak a kihual (harmony) a a bawl kim lai pen hong kigalneih hong kilem nawn lo ta hi.

Pasian tawh a kimaingapna, kimeltheihnate hong bei pah hi. Amau khialhna hangin maizumna lianpi hong nei pah uha, Pasian in “Koi-ah om na hi uh hiam?” Ci’n hong zong ta mawk hi. Pasian’ maiah a pulak ngap loh uh thusim hong nei ta uha tua in nidanga nuamtak a kizopnate kisia sak ta hi. Pasian huan sung hong lut teh a na dawntuah den uh pen tun hong bu kawikawi ta uh hi. A hoih pen dinga a tel uh in na khempeuh kisia sak ta ahih manin hong deih nawn lo uha hong bukpih ta uh hi.

Adan amah le amah Eve zong amah le amah in hong om ta uha a kikalah kawmpi (wall), lungsim galdona in dal ta hi. Adan in Eve a ngah cilin; “…keima’ guh le keima’ sate a hi hi…”A cih tawh hong kinak lamdan mahmaha, a mawhnate uh a hi bangin sang nuam lo-in khat le khat hong kimawk sak ta uh hi. Mawhna hong lut ma in na khempeuh tungah thunei uha a mihing hihna uh nuamsa mahmah kimlai pen Pasian in a mawhna hangun leitung pumpi ngiat samsia a, na khempeuh tawh kigalneihna hong om ta in, a it baang khat zong hong om nawn lo hi. Tua a kipan leitungah Pasian le mihing kikal, mi le mi kikalte ah thusim cih om den a kimeltheihna, kimaingapnate kisin kik lohin hong om thei nawn lo ta hi.

B. Jesu’n Tua Kizopna (intimacy) Hong Ngah Sak Kik Nuam Hi.

Mawhna hanga ih mansuahsa ki-itna, kimeltheih, kimaingapnate Jesu’n hong pia kik nuam hi.
Mawhsakna tawh a kidim leitungah Jesu in galkapte, sumbawlte, mi gilote, mi kheltatte, numei ginalote, naupangte, silate le biakna makaite khempeuh tawh a kithuah theih a kizop theihna thusim pen khat le khat kikal kizop theih nadingah ih kisap pelmawh khat a hi hi.

Amah le amah midangte mai-ah kimasak ngeilo hi. Miteng tawh a kilawmtat theih nadingin a mite hihna zui-in hong kithuahpih hi. Pilna theihna kikim lo, dinmun panmun kikim lo mi 12 kumnih sung bang hong kaikhawm-in kipawlna (team) khat hong phutkhia hi. Hih Jesu’ nuntakpih thusim (secret) in “Itna” ahi hi. Jn.13:34

“Note tunga kong piak thuthak in: Note khat le khat na ki-it ding uh ahi hi. Note ka hong it bangin note khat le khat na ki-it un. Note khat le khat na ki-it le u cin Keima’ nungzui na hihna uh mi khempeuh in hong thei ding hi”.

Hih pen mi khempeuh kikalah thuk taka kizopna aom theih nadinga kisam pelmawh khat ahi hi. Kimeltheih, kimaingapna a khan theih nadingin it sawm paha itna lahkhiat pah ding ahi hi. Jesu in mite din mun (a hau, a zawng; a lian, a neu) en lo-in amah a lunggulh khempeuh tungah a lungsimte na hon hi. Amah a zong mite kiangah na kipulak a, zan kima a hawh Nicodemus tung zongah ihmut hun ta na ci tuan lo hi. A innah a sam mite kiangah zong zui-in amah le amah a nuam theihthei dingin oma mi khempeuh lungkim sak hi.

Ama’ ngaihsutna, a nuamna, a dahna le a thuaknate zong midangte thei sak hi. Lazarus’ kiguina han-ah hong kapkhia hi. Thumaanna om lo biakinn sungah hehin kitom hi. Mite tawh nuikhawm in, naupangte u liante tawh holimkhawm hi. Dotna khempeuh a lungsim dan lianin dawng hi. A nungzuite tungah amah le amah a hibang lianin kipulak lo hi leh a nungzuite theologions hi zenzen lo hi.

Nupa sung, innsung le lawm le gual sungah thuk taka kizopna (intimacy) a om theih nadingin “Kei le kei hihna mite tungah ka pulak (transparency) hiam?” Cih kidong masa in. Nang le nang midangte tungah na kipulak zah ciangciang pen midangte hong meltheihna hong maingapna zah hi pah hi.

Na nuntakna kongvangte na hon ciacia in khuavak na ngah ding hi. Mite itna, meltheihna, maingapna, ngaihsut piakna, holimpihna cihte khempeuh hong om pan dinga, nang hangin mi tampi takin phattuamna a ngah bangin mite hangin zong phattuamna tampi na ngah dinga na nuntakna sungah Pasian’ gel dana gualzawhnate na mu toto ding hi.

Ka neu lai-in ka pa le ka u Mang ka kihta pha mahmaha sangsum ka nget ding simin siate’n a nungnung penni a cih teh sih le sih tah le tah ci phial mawkin lungsim sungah 1,2,3 bangzah vei hiam aw khat ka sim khin teh kingen ngam pana ih nget ni lian a hong kipia pah lo thei lai sawnsawn hi. Innah nu le pa le ute kihta, sangah siate kihta cih tawh khangto mawk hi hang. Khanglui innkuan maan kizaihna khawng et kik did ve, maigum, maipuam gemgam a ki-om gega zen hi veh aw.

Pasian’ Tapa Khuavak Jesu in khuamialna pan khuavakna lampi ah hong kalsuanpih ta hi. Khanglui ngeinate paai-in khangthak hunah, nuntakna luite nusia-in nuntakna thakah kalsuan ta ni. Ih makaipa Jesu’ lamhilhnate zui-in itna tawh nuntakna khuavak sungah lut ta ni. A sim mite khempeuh tungah Topa’n thupha hong pia ta hen. Rev. Lian Za Tuang (EBC, Tulsa)