Nuntakna ah gualzawhna taktak ~ Khup Lian Thang

Nuntakna ah gualzawhna taktak ~ Khup Lian Thang

Galpi nihna kipat hun British Empire in zumhuai takin a gal lelhna ding pan in hansan takin a gam makaih in gualzawhna a ngah pih a makaipi Winston Churchill in “Gualzawhna ngahna bek pen ih ngimna tawpna hilo a, guallelhna khempeuh zong ih beimangna hi tuanlo hi. Gualzo taleh guallel ta leh atuntun na ah khawllo leh hangsan tak ih ma ih phot na in minam thupi mi thupi te pianzia ahi hi” na ci hi.

Sen gam aa Online vaizuakna, Alibaba anei pa ahi Jack Ma in “Ko Company tawh kisai hita leh, kei tawh kisai hita leh laibu tampi ki at hi. Ka hoihna, ka company uh a gualzawhna cihte sim zawhloh zah dong dingin ki at hi. Ahih hangin kei thu, ka company thute ken a at ding hi leng, ka sepkhialhna ka guallelhna nam 1000 cih thulu guan in laibu ka bawl ding hi” na ci hi.

America ah mivom te a ki nenniam hun laitak in, haksatna tampi kawmkal pan in mipil pi khat suakin in muhkhiatna thak tampi a nei Dr. Booker T. Washington in “Gual zawhna taktak pen panmun neihna, sum leh pai neihna, piltung tuangna cihte bek tawh kiteh lo zaw a, a nuntakna ah a tuahkhak haksatna, buaina leh gimna lianpipi te bangci bangin nawk aa bang ci kantan zo hiam cih tawh kiteh zaw hi” na ci hi.

Ngal Hapaksa Tum Kiklo

Hih paunak pen a hoih lam in ki zangin ki lenkip thei hi le a hoih mahmah hi a, a sia lam ah zong aki zang den kha gige paunak khat na hi hi. Khatvei lawm kingai nih Movie en dingin hong vaihawm uh hi. Anu leh pa’ tungtuak pan in phalna ngen in nai 3 sungbek vak khopna dingin hun ngah uh hi. A nih un lawp mahmah leh hunnuam khat zangkhawm thei ding uh ahih manin kipak mahmah sa in va pai uh hi. Movie etna ding innphual pi a tun uh ciangin movie et theih ding a nam tuamtuam na om hi.

A nih un hoihpen in ciai ci-in a upmawh pen uh ki thutuak tak in ticket $ 20 man tawh lei uh hi. Movie et sungin nek theih tuamtuam zong lei uh hi. A movie hong kipan ta hi. A upmawh zah sangin a Movie et uh pen na hoih tuak hetlo citciat hi. A lawmpa in, ciah lel in pak-huan ah tukhawm hithiat zaw in kiho zaw ni. Movie a hoihlo khat tawh nai 2 sung hun ih bei ding pen pammaih lua lel hi, ci in a lawmnu kiangah gen hi.

A lawmnu in, ciah mawkmawk buanglo ee maw… $20 bang bei aa ticket ih lei hi. Ih nek dinga ih lei te zong ne gai nai lo hi hang, ahoih loh hang en veve ding ci-in na nial tentan hi. A lawmpa zong, aw hi maw, ci-in a movie en suak uh hi. A movie pen a masa lam sang in hong hoihlo tektek zaw hi. A movie sunga thupiangte hangin hehna tawh kidim uh a, hun ngah sunsun aa a et uh tuaklo sawnsawn ahihna hangin a hehna, tua tegel kigawm in a ciah uh ciangin pau zo nawnlo uh, mangpha nangawn kikhak zo lo in tua ni zan a hun manpha mahmah teng uh sup lawh uh hi.

A lawmpa in a zol in, a sumbei sa te pammaih sa lua selo in, a cihsa a vaihawm sa khello ding ci teta dihdih nawnlo in, a ngimna bulpi taktak uh ahi amau tegel in hun hoih hunpha a ngah sunsun uh noptak in zatkhop theihna ding lam ah na tel kha uh hi zen leh, tua nitak a ki kholhkhopna uh pen man nei mahmah ding hi.

America te in Vietnam gal (1955-1975) sungin a gammi galkap tampi takte’ nuntakna suplawh uh hi. America te in leitaw lam Vietnam te pan pih in, a alang khat ah Russia leh Sente in leilu lam Vietnam te panpih uh hi. Tua hun laitak pen Communist leh Democracy upna leh kalsuanzia te’ kidemna zong ki ci thei a, Cold War tawh a kizom zong ahi hi. (Tua hun ma in, Vietnam gam pen France te’ khut sung hi in, suahtakna ding nakpi tak gal kido na tawh Vietnam te in France te zo in suahtakna a ngah uh ahi hi.

Vietnam te pen amau mun leh mual ahihna leh, galsiam, hangsan uh ahih manin France te a na zo pikpek uh hi gige hi.) America te in hih Vietnam gal ah kihel in, tawmvei sungin a zo ding a ki sak uh pen, na zo paklo uh in hun hong sawt toto hi. Galkap a si zong tam semsem aa, galvan leina leh gal vai hangin a sum leh apai tampi bei lawh uh hi. Gamvai nasem te hita leh mipi te in, tua Vietnam gal hangin phattuamna om hetlo in, sihna baina bek America te ngah ding ahihna, lungpho in kham uh hi.

Ahih hangin a gam makaite in a cihsa a do sa gal pen guallel nuamlo pong uh aa, na do tenten veve uh hi. Kum 20 sung bang a sawt khit teh, amau panpih leitawh lam Vietnam in guallel veve uh hi. Hun sawtpi a do uh tua gal hangin a galkap tampi tak in sihlawh a, gal hangin sum tampi bei lawh uh hi.

America te in gal lel in South Vietnam pan nungkik uh a, South Veitnam zong Commnunist gam suak veve hi. Communist te in Democracy a zo suak hi. Tua hangin America te in amau gam ii tangthu ah aki phiatkik thei nawnlo ding liam-ma lianpi a nei suak uh hi. Galvai tangthu kante in, Amercia te in kum 20 dek tak a thatang, a galkapte leh a sum leh pai te a zat uh pen khial mahmah uh hi ci hi. A cil lam in hoihtak ngaihsun in tua Vietnam gal pan in khawl uh leh a bangbang ah met na om zaw ding thamtham ding hi ci ciat uh hi.

Mihing Lungsim Puakzia Nam Nih

2004 kum in Singapore ah Kawlgam leh Singapore te Tiger Cup (Suzuki cup, AFF chiampionship in kilaih) Bawhlung semi-final ki sui uh hi. A khe pen Kawlte hoih zaw mahmah uh hi. A masa in Kawlte in goal 2 khum masa uh hi. Lawp huai mahmah in tha ngah mahmah uh hi. A sawt lo in Singapore in goal khat na khum hi. Tua pan kipan in Kawlte pen a kimawl zia hong ki lamdang hiaihiai pah lian hi.

A lel uh zong hi nailo uh in, goal khat a khupsak kik bek pen thangpai pong uh in hehpong uh hi. Khauhtak in kimawl bangbang uh a, a bawhlung kimawl ding sangin a mi mahmah su in a keng siah zaw uh hi. Tua hangin Yellow Card ngah ziahziah uh a, tua bangin a ki mawl nawnloh na dingin phitmut pa in hoihtak in kham hi. Kidawm tuanlo uh ahih manin a mai-kah-pa Red Card pia-n ki hawlkhia ta hi. Kawlte in a lungsim uh khiam tuanlo in khauh mawllua veve uh a hih manin Penalty ngah sawnsawn uh hi.

Tua ciangin Kawlte khat hehlua in buaitui tawh a phitmut pa deng hi. Tua hangin Red Card ngah leuleu ahih manin Kawlte nih in Red Card a ngah suakta hi. Tua penalty pen Sinapore te in khumlo kiau se hi. Ahih hangin Kawlte mi 9 bek hita ahih manin kikhai lua mahmah ta hi. A sawtlo in Singapore in goal khat khum uh ahih manin 2:2 ki din ta hi.

Minutes 90 kimawl hun beita in a hunval min 30 kimawl uh hi. Mi 9 leh 11 ahih manin genna vet omlo a, Singapore in goal 3 tak nop tak in khum in, Kawlte in maizum huai takin guallel uh hi. Kawlte in tua kimawlna khatvei a lelhna uh pen a leitung uh a bei zah dong dingin nasa in, gamta bungbung zen uh hi. Zum huai lua mahmah hi. Tuni ciang dong tua lungsim paizo nailo uh hi.

2018kum World cup bawhlung kimawl na ah, Japan in Belgium goal 2 tawh a zawh laitak in a langlamte hong hat vat ahih manin goal thum tak na khum kik uh ahih manin puanlom zial in innlam ciah kha uh hi. A ciah ciangin a mau tawl ngakna a khan uh hoihtak in siangsak sitset a, inntek a sem Russia te tungah “Lungdam” ci in amau Russia lai tawh at sitset in lungdam ko lai uh hi.

Tua ni in, Japan mi a bawhlung ente mahmah in zong, upmawh loh laitak in a guallelhna hangin dahmahmah heh mahmah hi ta se mah leh, bawllung etna tutna aa nin ki paite, tuibung hawmte hoihtak in tawm sitset veve uh hi. Kap kawm sa bangin nin a phiat nin a khawm bang om zawzen hi. Tua ni kimawlna a lelh zenzen hangun leitung ah amau gamtatna amu khempeuh in thupi sa lua mahmah uh a, ci-hik-mul bang hong tho sak liang hi.

Belgium a lelhna na thu sangin, a lelh khit aa kapkawm sa khitui naptui nulkawm sa aa a gamtat ziate ki gengen zaw hi. Kiphawk zaw in, et teh huai gam leh minam ahihna lak uh a tua in a gambup lamsang in a pahtawi uh na hi gige mawk uh hi. Ki mawlna ah khatvei a gualelhna uh pen, a gambup ii bawhlung kimawlna ii a beimangna a leitung beina ahih zenzenloh na pen tel mahmah uh cihna hi hi.

2018kum World cup mah ah, Korea leh Germany kimawl uh hi. Korea in tua kimawlna a zawh hangin kah tuanlo ding hi. Germany in bel ki din leh zong kah ding hi. Ahih hangin Korea in a thatang neihzah zangin ahoih pen in hanciam in kimawl veve ahih manin leitung 2014kum aa Chiampion lui ahi leh 2018kum Chiampion dingin mi khempeuh in amuan ahi Germany pen goal 2 tak in hong zo hiaumawk uh hi.

Leitung bup in tuni dongin lamdang sa uh a, Germany te nangawn in zong a cihna ding theilo in kamka bek uh hi. Korea kimawl siamte’ lungsim uh nak thupit lua zen hi. Korea te in gualzawhna leh guallelhna cihte sangin mihing khat hihna tawh a kilawm akituak in, a neih vaipuak te citak tak leh gina tak in sepsuak uh hi. Tua bangin a kimawlna hangin leitung bup Korea bawhlung teamte thupi sa in zahtakna ngah uh a, a Korea gam leh minam mahmah zong ki pi et in thupi kisa hi.

Gawl Zawhna Taktak

Zomite a kua mapeuh in zong a tung aa thu teng khat vei khinkhai kik in,

1) Lawm kingai nihte leh Vietnam gal aa American te bangin, metna a omlo, phattuamna a om kilkello thute ah, tua zah ka kipiak khiat sa hi, tua zah ki bei khit sa hi, ci-in nusia ngamlo in na om tentan lai kha hiam? Na vaipuak na nasep na vaipuak ii ngimna taktak tel lo kha in, a kisam lo pi in nang ii kiphatsakna, nang ii theihna bek na thupi sak tentan kha lai hiam?

2) Kawlgam bawhlung team te bangin, na khat peuhpeuh ah nang ii gelna ngaihsutna bangin hong piang loh ciangin hehgawp kipei gawp na nuak gawp kha thei hiam? Tua dan in na gamtat ciangin a guallel taktak na hi pan zaw hi. Hoihtak in manawt nawnlo, ki hehsak sak gawp, ki hehpihhuai sak gawp cih kalsuan zia pen a tualniam mite pianzia ahi hi. Tua dan gamtat zia te pen thu thei nailo naupang vai kici hi. Tua in gam leh minam, pawlpi leh kipawlna, innkuan nuntakna hong sangkhai vangvang zo hetlo ding hi.

3) Japan bawhlung team te bangin, gualzo thei ding dinmun pan in upmawh hetlo pi in a gualleh hangin, picing takin a tawpdong a kimawl veve na uh thupi lua hi. Japan bawhlung team te in khatvei kimawlna in amau ii mailam ding, Japan te’ a bawhlung leitung a beita hilo ahihna tel mahmah uh hi. Zomite in zong, mimal nuntakna ah ahi zongin, minam leh gam, pawlpi leh kipawlna makaih kalsuanna ah ahi zongin, na sumzon na paizonna na nasepna leh vaipuak na neihna khat peuhpeuh ah a tawpdong mah citaktak leh gina takin sem suak in.

Tua kimawlna ah a lel Japan kimawl siamte in, siangtho takin kimawl in, a tawlngakna inn sung leh kimawlna a en a Japan mite in a ninte uh a siangtho’ sak sitset na hangin, leitung bup leh minam khempeuh ii lungtang khempeuh na zo veve uh hi. Minam picing, minam leh gam khangto dingte lungsim puakzia ahi hi. Tua bang lungsim puakzia in minam leh gamte khangto sak hi. Nang ee bang Japante mun ah om lecin na bang ci ding a? Gual lelhna puaksiam inla, lungsim picinna tawh gual lelhna na zawh ding thu pi hi. Tua in gual lelhna tungah gualzawhna kici hi. Tua in gawlzawhna taktak hipan hi.

4) Korea bawllung team te mah bangin, tu laitak na maban na vaipuak na nasep pen a lawphuai penpen leh a uthuai penpen hi hetlo kha thei mah ding hi. Tu laitkak na dinmun pen Korea bawhlung team te bangin lungkhamna tawh kidim in mailam lam-etna a oml hetlo na hi kha thei mai ding hi. Ahih hangin Korea bawhlung teamte mah bangin hoihtak gina tak leh hanciam takin na ma na nawt veve in.

Tua bangin na gamtatna hangin mite in, na mipih na sapih te in, na seppih na lawmte in, na company na boss te in, na pawlpi mite in, na makaih’ ahi na mipih na sapih te in, cihtak tak-in na sepna hangin lungkim leh na angtang mahmah ding uh hi. Tua in lam etna zingni thak hong tan kik dinga, tua bang lungsim puakzia in na minam leh nang mahmah zong nikhat ni teitei ciangin hong lamsang to velval ding hi.

“Gual zawhna ngahna bek pen ih ngimna tawpna hilo a, gual lelhna khempeuh zong ih beimangna hi tuanlo hi. Gualzo ta leng guallel ta leng ih tuntun na ah khawllo leh hangsan tak ih ma ih phut na in minam thupi mi thupi te pianzia ahi hi” – Winston Churchill

“Gual zawhna taktak pen panmun neihna, sum leh pai neihna, piltung tuangna cihte bek tawh kiteh lo zaw a, a nuntakna ah a tuahkhak haksatna, buaina leh gimna lianpipi te bangci bangin nawk aa bangci kantan zo hiam cih tawh kiteh zaw hi” – Dr. Booker T. Washington Lungdam, Khup Lian Thang