Thai gamsung ah mawtaw tuahsia in, Myanmar gammi 13 si

Thai gamsung ah mawtaw tuahsia in, Myanmar gammi 13 si

Thailand gamsung ah Van mawtawneu khatleh Truck mawtawpi khat kitaihkha in, Van mawtaw sungah atuang Myanmar gammi 13 si cih AFP pan kiza hi. Central Thailand ah tuni Friday (Nov 24) ni in thupiang hi a, aki nakkha mawtaw tepen limsiat mahmah cihi.

Tua Van mawtaw pen Mae Sot khuapan in Bangkok zuanin atailaitak cihi. Mae Sot cihpen Thai gamsung ah Myanmar gammi nasem “Migrant Workers” te alutna gamgikhua “Border Town” khat ahihi.

Thai Police Officer khatin agenna ah tua Van mawtaw pen Singburi Province sungah Friday zingsangtung lamin Truck mawtawpi pei 10 anei “10-wheeler” khattawh kiphukha cihi.

Van mawtaw sungah atuang Myanmar gammi asi mi 13 tepen mawtaw aki phutkhak khitciangin meikanggawp sawnsawn ahih manin, amel asa hoihtak kicianlo a, kumpi thunei te’n aluanghawm te kuatenghiam, amin apuam kuatenghiam cih akansan laitak uh cihi.

Tua mawtaw ahawl pen Thai gammi khat ci a, tua Thai Driver zong tuahsiatna aphual mahah sisuakpah cihi.

Thailand gamsung pen lampi te hoihhetlo in, tuahsiatna piangpahpah a, mi tampipi in sihlawhden ci’n aki ciamteh ahihi.

Kumkhat in lamzikpi tungah tuahsiatna Accident tuamtuam hangin asipen mi 24,000 bang phaden hi ci’n World Health Organisation te’n Data pulakkhia uhhi. Tuabang in tuahsiatna te lakah alangphial bangpen Motorcycle, Bicycle leh khetawh apai Pedestrian cihte tuahsiat panin asi uh cihi.

Tualo Bus leh Van mawtaw tezong atuahsia tammahmah a, adiak in gamdangmi nasem “Migrant Workers” tampitak in Accident in sihlawhden uh cihi.

More: Tulaitak Malaysia – Thailand – Myanmar kikal leilam tawh nawkding lauhuai mahmah

Tukha kipatlam inzong Ayutthaya Province sungah Japanese Tourist te tuanna Van mawtaw khat tuahsia hi. Tua Van mawtaw sungah Japanese Tourist mi 4 leh Travel Guide khat atuang hi a, Truck mawtawpi khattawh kiphukha in, Van mawtaw sungah atuangteng meikanggawp in avek un si cihi. Sawltak #zomidaily