Malaysia, Cheras vengsung ah Indonesia numeikhat in gammi te zasantui thehin sumbawm suhsawm

Malaysia, Cheras vengsung ah Indonesia numeikhat in gammi te zasantui thehin sumbawm suhsawm

Malaysia, Cheras vengsung aom mawtaw koihna ah guta khatin zasantui tawh nupi khatleh atupa thehgawp cih NST pan kiza hi. Cheras, Taman Maluri aom Shopping Mall khat ii Parking Lot ah Friday ni in thupiang hi a, zasantui tawh theh athuak pitu tepen mawtaw sungah alutsawmlian laitak in guta khatin athehgawp ahihi.

Tua guta pen numeikhat cisawnsawn a, Indonesia gammi hi in bangmah Permit zong aneilo illegal immigrant khat kici sawnsawn hi.

Nupi khatleh atupa mawtaw sungah lutdingin akithawilian laitak in Indonesia gutanu in zasantui tawh athehsuk hi a, tuakhit ciangin nupinu ii asumbawm “Handbag” asuh saksawm ahihi.

Ahi zongin tua Indonesia gutanu pen sumbawm tawh ataikhiatma in Police te’n ahunlap in mankhia theipah uhhi. Tua thupiang khempeuhzong Police te’n mukha uh cihi.

Zasantui pen Plastic ipsung ah hencip in tuatawh atheh hiding kici a, nupinu leh atupa pen zasantui hangin aci asa sagawp, sangawp in “first degree burn” kici hi.

Tua Shopping Mall aom Security tezong asawtlo in tungpah uh a, CCTV panin athupiang teng enkikpah uhhi. Tua Indonesia gutanu pen tuni tektekmah inzong Shopping Mall sungah vanleiding in apai nupi naupaai khat sum asuhsak ahihlam ki mukhia hi.

Hih thupiang khempeuh amanmah hi ci’n Cheras police chief Assistant Commissioner Mohamed Mokhsein Mohamed Zon inzong genkhia hi. Guta Indonesia numeinu pen kimanpah in “Section 393 of the Penal Code leh Immigration Act 1963” cih tetawh tua nupinu pen thubawlding in ki kemcippah hi. Damiah taih, guktakna hangleh Malaysia gamsungah Permit neilo in aomsimna hangtawh namnih in thu akibawlding ahihi.

More: Apasal tawh alumkhawm numeikhat azi in atheih ciangin avan sungah zasan hensak

Hih buaina apianlaitak in atuakkha Malaysia gammi numeikhat inzong Facebook ah suahsak a, hih thupiang hangin Malaysia gammi te hehmahmah uhhi. Banghang in Malaysia gamsung ah phalna neilo gamdangmi illegal immigrant te kimawk omsaksak hiam, avekin matmangding leh hawlkhiat mangdinghi ci’n hehmahmah uhhi. Sawltak #zomidaily