Singapore ah numei te puansungsilh aguksakzel pasal khat kimanta

Update: Singapore ah numei te puansungsilh aguksakzel pasal khat kimanta

Singapore, Bedok vengsungteng ah numei te puansungsilh “Bra” aguksak zelzel pasalpa pen kimanta hi ci’n zanni Friday ni in Police te’n genkhia uhhi. Tuapapen kum 26 aphakhin khat ahihi.

Singapore, Bedok Reservoir Road sung aom Block 135 ah abeisa Monday ni in puansungsilh kigu aom ciangin Singaore Police te ki zasak a, tuapan in palik te’n tuapa pen azon akipan uh ahihi.

CCTV panin aki Record kha Video tetawh kancianna kibawl in, aki zonkhiat kipanpah hi. Bedok Police Division officers te’n Thursday ni in Bedok Reservoir Road sungteng mahah tuapa pen mankhia theipah uhhi.

Hihpa gamtatna pen guktat gamtatna, vanzu mah suak ahih manin, kum 3 bang thong kiatheiding cih kiza hi.

Pasal khatin numei puansungsilh khat aguk laitak CCTV pan kimu

Singapore, Bedok Reservoir Road sung aom innkhat ah pasal khatin numei te puansungsilh “Bra” aguksak laitak CCTV panin Video Record kibawlkha a, Social Media ah ki khahkhia hi.

Bedok Reservoir Road, Block 135 aom innpualam ah October 09 sunlam 12:30pm hunpawl in pasal khatin Bra puansungsilh aguk laitak akimu ahihi.

Tua CCTV Video sungah pasalkhat Phone kiho kawmkawm in paiphei hi. Phone akiho aman ciangin akiim apam enkawikawi masa in, kuamah omlo cih atheih ciangin tua pasal pa’n puan tuamtuam tampitak akikhaikhawm zihziah lakpanin numei te puansungsilh khat gukhia citciat hi.

Hih a puansungsilh aki guksak numeinu pen kum 26 aphakhin, Chen akici khat hi a, ama genna ah abeisa khakhat khanih hunpawl akipan ka puansungsilh khatkhitkhat mangden cihi.

Tuaciangin banghang in akua in ka puansungsilh hong guksak sesehiam cih theihnopna tawh innpualam ah CCTV thuahsak hi. Tua athuahzawh asawtlo nung October 09 ni in pasal khatin tua numeinu ii a puansungsilh aguksak laitak CCTV panin ki Record kha takpi hi.

Video: Man caught taking woman’s bra at Bedok Reservoir Road Block

Numeinu in agenna ah hihpen akhatveina hihetlo dinghi. Abeisa inzong ka puansungsilh pen 4 leh 5 mang mangkhin a, tuate zong hipah mahin hong guksak hiding hi ci’n genkhia hi.

Related: Bombi sungtenkawm ah vankham apua numei 4 Yangon Airport ah kiman

Hih thupiangteng CCTV panin amuh ciangin tua numeinu inzong Police Report bawlpah cihi. Numei te puansungsilh leh bombi sungten azatlai alunggulh citciat omthei hihtuak hi 🙂 Sawltak #zomidaily