Mithak ~ JK Kam

Mithak ~ JK Kam

1. SEPNA & SEPSA
Biakna dangte in mihing ii SEPNA kal a, Christian biakna bek ah Jesuh SEPSA up ding thu kigen hi. Tawntung nuntakna pen ei sepna tawh ngah zawh ding nam hi hetlo ahih manin Jesuh in hong sepsak in tua Ama sepsa ih upna tawh gupna a ngah ih hi hi.

2. TELKHIAL
“Jesuh in sem khin zo ahih manin ken ka ut ut ka sep hangin nuntak tawntungna ngahta, Pasian gam tung ding” cih pen ahilo lam in ki lakhial zel hi. Piangthak sa te ut leh piangthak nailote ut pen kibang thei ngeilo ding hi. Piangthak, Gupna ngah, Pasian’ ta ka hi ci napi in Pasian deihloh nasep ding phamawh ih sak theih kei le bel a piangthak ngei nailo, piangthak a kisa kha, a thu bek a thei in lungsim le kha tawh sang zo taktak nailo kihi zaw kha ding hi.

3. PUMPI & LUNGSIM SIKAN
Biakna dangte in PUMPI ii sep ding SIKAN gen uh a, Christian biakna ah Topa Jesuh in “Pumpi ii sep ding sangin LUNGSIM SIKAN thu gen hi. Banghang hiam cih leh Pumpi ii sep ding teng Aman hong sep sak khin a, lungsim le kha ii upna tawh ih zop dingin hong koihsak hi. Jesuh in a kimu thei ih pumpi ii mawhna teng hong maisak napi, ih sel sim ih mawhna teng hong pholh khia ta leu leu hi. Pumpi sikan sangin lungsim sikan pen baihlo zaw pek hi.

4. A ZUNG & A GAH
A kimu ih mawhna GAH pen ih lungsim sunga mawhna ZUNG hang ahih manin Topa Jesuh in a gah tawh buai lo in a zung hong lot khiat sak nuam ahi hi. A gah heuh bek pen a kum kik ciang gah kik thei a, a zung bot khia lehang gah nawnlo ding hi.

Tua a zung ngiat a kikhel pen (IICor 5:17) a Paul ii gen MITHAK acih pen ahi hi. A zung ah Satan pang nawnloin Pasian Khasiangtho pang ta ahih manin a teh, a pak, a gah kikhel hi. A zung a kikhel nak leh a gah kikhel hamtang ding hi. Tua ahih manin Jesuh in a gah thu lim gen lo in a zung thu a limgen ahi hi.

“Gupngah khin ka hih manin ka utut ka gamta zong Pasian ta hi lel ing” cih pen “Ka ut ut ka gah zongin ka zung Pasian Khasiangtho tawh kizom lel ing” cihna suak ahih manin, ih gah en lehang Khasiangtho zung pan hong gah ahi le hilo pen ki tel mahmah ding hi. Mithak in zung thak nei dinga, gah thak zong a neih kul ding hi.
(JK Kam)