Malaysia ah Passenger mi 39 atuanna Bus golpi khat meikuanggawp

Malaysia ah Passenger mi 39 atuanna Bus golpi khat meikuanggawp

Malaysia gamsung Tamparuli – Ranau Highway lamzikpi tungah zanni Sunday nitaklam in Passenger apua Bus mawtawpi khat meikuanggawp cih theStar pan kiza hi. Tua Bus sungah atuangtepen gamdangmi khualzin Tourist te hi in, Sen gammi “Chinese Tourist” vive kici hi.

Bus tungah Passenger bekbek akigawm in mi 39 atuang uh hi a, Driver tawh akigawm in mi 40 pha uh cihi.

Hihvai tawh kisai in palik thunei ahi Tuaran district police chief Deputy Supt Dzulbaharin Ismail in agenna ah Sabah, Tamparuli – Ranau lamzikpi tungah zanni Sunday 7:30pm hunpawl in thupiang cihi.

Mawtaw hawlpa in Rubber meikang gimnam azak ciangin Bus khawngsak in, mawtaw sungpanin kumkhia a, Checking bawl cihi. Tuaciangin anunglam mawtaw Tyre panin meikuang amuh ciangin, mawtaw sungah atuang Chinese Tourist 39 te amanlang in atuahkhiat mengmeng nadingin thupia hi.

Tuakhit ciangin Driver pa’n meiphelhding in kithawi a, ahi zongin meiphelhna ah azat Fire Extinguisher pen kicingzolo ahih manin, meikuang pen kilawh zatzat in, anunung ah Bus abuppi in kuangzaizai cimawk hi.

Anunung ah Bus avekpi in meikangtum in siacipgawp cihi.

Hih Bus meikatna hangin Passenger te asi aliam kuamah omlo bilbel in, avek un ahunlap in ki hemkhiathei uhhi. Bus mei akattum ciangin Bus Company te’n mawtaw adangkhat tawh Passenger te dawnsakkik uh a, Kota Kinabalu khua ah Passenger khempeuh ki ciahpihkik hi.

More: Malaysia, KL khuasung atai Bus khat meikang in agei aom mawtaw te lawh

Hih Bus meikatna tawh kisai in athu hoihtak akancian dingin Fire and Rescue Services Department’s forensic team te’n nasep kipanpah uh ci a, Brake kisiatna “Faulty Brakes System” hangin meikuang akipan hiding in ki ummawh cih kiza hi. Sawltak #zomidaily