Numei in pasal uk theilo ahiam? ~ Job Cinpi

Numei in pasal uk theilo ahiam? ~ Job Cinpi

Numei pen Pasian in pasal a uk dingin bawl hi, cih pen Tapidawte sungah kiza ngei lo hi. Pasian kammal sungah Pasal a huh ding le a panpih dingin numei kibawl hi, na ci hi. Hih thu tawh kisai thu tampi gengen ding zong kisam ka sa nawn kei hi. Numei naupang nangawn in kothei hi. A theitel taktak om pha lo.

Numei pen pasal a huh ding le a panpih dingin pasian in bawl hi, cih thu hangin pasal pawlkhat in a zite ukna le thuneihna peuhmah thusim nawn loin numei thu peuumah thu lutsak nawn lo kha thei uh hi. Tua bang pasal pen a om hangin a tam thu a mu lo zaw deih le thu a ngaihsun lo zaw deuhte bek in tua lungsim nei lai ding uh ahih manin Zomite sungah tua bang mi tam dingin ka um nawn kei hi. Ahi zong khat le nih kiom kha thei lai veve kha dingin ka um hi.

Huh ding panpih ding cih pen a deihna thuk mahmah hi. A gamtat hoih lo khat a hoih sak ding zong huhna mah ahi hi. Pasal khat in zu dawn-a a zi in thu a hilh leh tua pen bang a kici tam? Zu a dawn pasal thu a hilh pen a zi hi leh pawlkhat in a pasal ama uk ding hi kei, ama thuhilh ding hi kei ci kha ding uh hi. Ahi zongin thu a mute in a pasal a huh hi ci ding uh hi. A huh dan a siam le a siam lote tungah muhna kibanglo om kawikawi thei kha mah ding hi.

Tua zong ngaihsut ding a kisam thei khat ahi hi. Numei in zu a dawndawn a pasal kiangah zu dawn nawn ken a cih pen ukna le thuneihna hi lo hi. Gamtat hoih lo khat a hoih dingin a puah ahih manin a pasal a huh a panpih ahi hi. A pasal zu dawnna hangin a innkuan sung uh nopna sangin lunggimna om zaw ding hi cih pen kinial thei lo hi.

A pasal in sum kem leh zu le sa dawnna in zang mang kha pah ahih manin a zi in a innkuan sum lut khempeuh kem ding hi. Pawlkhat in tua pen pasalte thuneihna a la numei ci-in khialsak nuam ding uh hi. A pasal kep sang ama kep muanhuai zaw ahih naka, a sum zekdan uh kicing zaw, nuam zaw ahih leh a huh a panpih mah ahi hi. Tua bek tham loin a pasal in zu a dawn anding sum nei lo zaw pah ding ahih manin a pasal pumpi siatna pan a kem ahi zaw hi.

Hih bang ka cih ciangin innkuan sungah numei in lutang sem thei hi. Numeite pen pasalte tungah a tungtuang dingte hi a ci nuam ka hi masa kei hi. Khat veivei pasal pawlkhat in huhna le panpihna a kisam ngailo bangin a zite thu peuhmah thulutsak nuam lo uh hi. Innkuan khat bang zahtakin nuam hiam cih a kiettheihna thu nih om hi.

Tua i nnkuan sungah numei in a pasal bang zahtakin zahtak ahiam cih tawh kien thei hi. Zahtak le lau cih pen a deihna kikelki lian hi. Zi in a pasal zahtaklo a hau ahih leh tua innkuan sungah innkuan kim ngei lo kha ding uh hi. Cihnopna ah zi in a pasal a taisan ngam kei zongin a tate khang hun ciangin a nu in a pa lau cih pen tate zong maingap nading om nawn lo hi. Tua hangin a tate a gol ciangin khualzin khiain mun dang gam dang ah om nuam zaw ding uh hi.

Tua innkuan sungah pasal in a zi thu bang zahin ngaihsutpih hiam? Pasal khat in ama zi thu zui nuam lo a, a zi pen thu mu lo, thu thei lo bangin a ngaihsut leh tua bang zi a nei amah zong sial vom le sial vom kingai mah suak dingin ka um hi. Pasal pilte in a zite thu a zui mahmah tawh kibang uh hi. Ahi zongin a taktak ciangin a zite’n ama thu a zui na hi zaw hi.

Bang hang hiam cih leh pasal pilte in a zi lungkim nadingin thu neu tampi zui uh hi. Tua thuneu tampite a zi lungkimna bangin zui uh ahih manin thu lian khat a om ciangin ama thu a zi in a zuih ding haksa sa nawn lo hi. Numeite/zite lungkimna cih pen pasalte ading naupangvai, numeivai a cihte uh hi sese ahih manin numei a thupisim lote’n tua teng mah zuih haksa sa zel uh hi.

Tua ahih manin numei in a pasal thu a zuih ding a kisap mah bangin pasal in zong a zi a thusim ding kisam hi. Pasal pawlkhat in a zite uh Laisiangtho sungah numei hoihte nuntakzia bangin nungtasak nuam uh hi. Sarah in a pasal Abraham pen ka topa ci hi cih pen pasalte zaknopsa mahmah tangthu khat ahi hi.

Sarah pen numei hoih, numei ciim le numei gina ahihlam phatin gengen uh hi. Ahi zongin phawk ding a kisam le a thupi mahmah khat om kasa hi. Sarah in pasal gina lo, amah a thusim lo pasal khat topa a ci hi peuhmah lo hi. Abaraham pen mi mawkmawk hi lo hi. Pasian upna muanna lam ah amah a etteh huai, a ettehtak mahmah mi khat ahi hi.

Mi khat tawh ni khat ni nih kithuah ding pen tua mi pen a zahtak huai kei zongin kinaihsiamna tawh kizahtak zo thei hi. Ahi zongin damsung khantawn kithuah ding pen kineihsiamna tawh zahtakna lak ding cih pen mangin zong kiman nuam lo kha ding hi. (mi khat pen a innkuan pihte’n thupisim lo, zahtak lo ahih leh kisapna tampi mah nei ahi pah uh hi. Innkuan knat sang lungsim a kitheitel zaw ding midang omlo hi.)

Tua ahih manin a tawp a khakna ah pasal pilte peuhmah numeite’n zahtak uh hi. midangte’n zahtak napi a zi a tate’n a zahtak zawh kei leh tua zong ngaihsut huai hi. midangte muhna ah kinaih ding baih a innkuanpihte tungah konaih ding haksa hi. numeite zong tua mah ahi pah hi. Pasalte ading deihsakna tawh a huh a panpih a om mah bangin thusimlohna tawh a neusek zong om kha thei leuleu uh hi.

Tua ahih manin na pasal pen itna le deihsakna tawh a huh a panpih hi zaw inla neusekna tawh a uk nuam hi kei zaw in. Na innkuan sung le na tate ading hoih lo ding hi. Numei in pasal uk thei lua hi. Ahi zongin a huh a panpih ding ahih mahin a hoih a phat nading lam ah a uk ding kisam hi. Mun khempeuhah pasal tungah thu nei nuam cihte ahih leh pasalte neusekna hi thei leuleu hi. Tua ding zong kidop huai mahmah hi. Numei pilte tuabangin ta lo uh hi. Lungdam, Job Cinpi (Zomi Laisim Nuamte)