Nu le Pa’ thumang, a nahlawh peek ~ Tuang Za Khai

Nu le Pa’ thumang, a nahlawh peek ~ Tuang Za Khai

“Paita o leh boih… Na lampi kihong tahen o…” Sumzong dingin a kithawikhia, kumsawm val deuh bek apha pan, Abd-el-Kader, a nu in, sumtang dangkasan (40) a piak khitciang, a kamvaikhakna-ahi hi.

“Thumaanlo peuhmah in gamta lo ding nai maw! Zuauthu genlo ding, ahoihlo in gamta limlim lo ding! Koi dih sin aw, hiah ka mai ah hong kiciam limlim dih, cikmah hunin zuauthu ka gen ngeikei ding hi, cidih…”

A nu’ sawl bangin, a tapa-anu’ mai ah khukdinsa in a kiciam khitciang, a nu in: “Na ma kihong ta hen, cidamin ki mukik ni.”

Tangvalpa-a lawmte pawlkhat tawh sumzong dingin a kuankhia ta uh ahi hi. Nithum nilii dingkhawng a paikhit uhciang, lametlohpi-in migilote tawh kitalsik mawk uh hi. Mi gilote in, hi tangvalte a banban in thusit ngekngek uh hi.

Sum zong ding hikei ung, sum neikei ung, damloh vai-in azin hi ung, bang mah kengkei ung, hong hehpih un.. ci-in, kitan semsem uh ahih manin, migilote in khah deudeu uh hi. Ahi zongin, a nunung penpen ah thu a kisit Kader tawh kisai-ah hong buaihuai simpian hi.

“Sum bangzah pua nahia?” Kader in; “Ka bombi-ipsung ah sumtang, dangkasan (40) nei-ing.” Ci-in dawngkik pah lian hi. Migilote nui ngeingai-kawmsa in; “Kalasa! Uphuai kei vial mahsi! Sum hau zawzeen sicia?” Ci-in nulhnau ngeingai uh hi.

Kader a ki thusit sawt simpian ahih manin, a lawmte lau in a taimang tawh, a bumang tawh, a tunna lam uh kitheilo in, a mahbek mah migilote’ mai ah ding vilvel laibek hi. Tualeh migilo khat in hong naih phei-in, dongh phakik leuleu hi.

“Sum bangzah pua nahia? Na neih zah a maantak in gen sin aw!” Kader in zongh, a cihngei bangh mah in, dangkasan (40) bek nei-ingh, a dang nei vetkeng ci teitei hi. Migilo te in um zolo uh ahih manin, a makaaipa uh sam uh hi. A makai pipa in;

“Hiah hong paidih sin! Sum bangzah taktak pua na hia? A maantaktak nong gen keileh, hong kaplum thei hi ung!” Ci-in, thau khat leh temkhat pei vatvat kawmsa in dongh leuleu hi. Kader zongh lau mahmah ta ahih manin, ling kekeuh bek aa- a-aw kisat kekeuh kawmsa in;

“Hia na nautaang nih te’ kiangah zongh ka genkhin hi. Ka bombi-ip sungah ka nu in hong guansak dangkasan tang 40 bek a om ahi hi.” Ci teitei hi.

“Heih… tua ahih leh a puanteng suahkhiatsak vo!” Ci-in, migilo bupa in a lawmte sam lualua hi. A lawmte zongh hongpai-in, Daker silh le teen teng suah khiatsak didek in, a sit didek vua leh, a ipsung ah, sumtang tang 40 mulian takpi uh hi.

“Ha… bang hangin na puakzah lian takpi mah gen lawmlawm mawk nahia, mihai?” Ci-in, migilo te in, haisa mahmah uh hi. “Hibang tawh hau haksi nicia, midangte hileh a puakzah uh a lang ii lang zong genlo in seel mang uh hiven! Nang hici lawmlawm!” Ci-in nulhnau in nuihsan ziahziah uhi.

Tua leh Daker in; “Himah hi…ka nu kiangah zuauthu genlo dingin, kiciam khin ka hih hang ahi hi.” A cihtak ciang, migilo makaipi pa hong pai-in;

“Aw… himaw… nangh na nu’ thu hizah aa- a mang hizen maw!! Kei zongh nang bangin ka nu’ thumangin, thumaan thutak nuntaakpih hilengh, hi bangin siat gamtat khalo mah ding hiveng maw!!” Ci-in, naakpitak in kisik in a khitui tak kekeuh kawmsa in “kisik ingh! Hi ka kisak laitak, ahi hetlo kahih lam na gamtatna tawh nong lahkhiat manin lungdam mahmah ing” ci khiankhian in, tua tangvalpa’ sum khempeuh a vekpi-in pia kik khin hi.

Mi gilo makaipipa in a nautangte a vekpi-in hong kikhawm in, tangvalpa mai ah mawhmaina ngen uh hi.

Hi tangvalpa pen hunkhat ciang French te ukna sungpan Algeria gam a kaaikhia zo pa le kum zalom 19 sung Algeria gammakai minthang pen khat a suakkhinta ahi hi. A nuntak hun : (1808-1883)

Hong tung ding NUTE NI ciangin, athak in, inute hong thuhilhna le hong deihsaknate a phawkthak thei ding leh a zuizo dingin tha asannuam mimalkim ahi dingin ibiak Pasianin hong makaih kimta hen. Tuang Za Khai Ref: ‘The Victorious Attitude’ a gelh ‘Dr. Orison Swett Marden’