“Nu aw, kong it hi” ~ Hau Za Cin

“Nu aw, kong it hi” ~ Hau Za Cin

“Nu aw, hih pen kong it hi cih ka gen theih hun nunung pen hikha ding hi. Nu aw, kong it hi…” “Banghang in maw bawi?…. Ken zong kong it den hi.”

South Korea ah tembawpi tuahsia sungah Danwon High School sangnaupang 330 tuang uh hi. Amau pen Incheon khuapi pan tuikulh Jeju hawh ding, khuadak dinga pai ahi uh hi. A tembaw uh a tum ding laitak ion naupang khat in a nu kiangah thu khak a, sms text message: “Nu aw, hih pen kong it hi cih ka gen theih hun nunung pen hikha ding hi. Nu aw, kong it hi,” ci hi.

A nu in a tapa gennop tello ahih manin, “Banghang in maw bawi?” ciin thukkik pah hi. A dawnkikna ngahpah lo ahih manin a nu in, “Ken zong kong it den hi,” ciin khak kik saisai hi. A sawtlo in a tapa pen Sewol Tembaw tuahsia sungah a tuang ahih lam thei a, tuni in ni thum phazo a, a tapa tembaw tawh tui sungah a tumsuk pen hing maw, si maw kitheilo, kimu nailo hi.

Nu leh pa itna thu gengen leng a manpha semsem ahi hi. Na nu na pa itna thu na gengen hiam? Na hilhhilh man hiam? A kithuk theih nawnloh ciang na gen tamzaw kha diai.

Mihing 900 tuan theihna ding tembaw sungah mihing 470 bek tuang ahih hangin a paina ding mun uh tung manlo in a tembaw uh tuahsia kha hi. Sangnaupang 330 te khuadak dingin tuipi tungah nuamsa in a zin hialhial uh ahi hi. Khuahun vot hiuhiau in nuam mahmah a, khuadakna dingin hun nuam ahi hi. Ahi zongin a lamet loh uh leh a a mumang sung nangawn vuah a tuah noploh ding uh thu a tuak kha uh hi.

I nuntakna pen eima hihtheihzah in kikem in kidawm in kikhoi in, zatui zaha tawh kienzo himah lehang i nuntakna tung taktak ah thunei pen ei ihih loh lam kimu thei hi. I mailam i genkholh theihloh, i muhkholh theihloh dan hong langsak hi. Sangnaupangte leh a sungah tuang midangte zong a tup a sawmna tuikulh tung ding, khuadak ding, nuamsa taka inn tungkik dingin kingaihsun kha ding uh hi. A nu in a tapa laikhak, thukhak pen a deihna nangawn tel manlo in a tapa a patau ahih lam theilo hi. A nu in a nungtheih ciangin bangzah in a lungsim a na tam maw. A tapa tui in a kawng ciang, a awm ciang, a dip ciang, a ngawng ciang, a nak ciang, a mit ciang, a sip ciang tup suk hiaihiai in bangteng a ngaihsun zen tam maw… khasiat huai in lungzuanhuai a, nakpi takin mulkimhuai hi.

Tua naupang in patauhna lianpi si ding maw hing ding cih a theihloh laitak in a nu phawk velval hiding hi. A nu simloh a pa zong om kha ding hi. A sanggamte zong om ding hi. A lawm a gual zong tampi om kha ding hi. Ahi zongin a nu phawk velval sese hi. A ngaihsutna masa penpen leh a nunung penpen a nu tungah om himawk hi. Mihingte i lungkham luat ciang, i dah luat ciang, i gim luat, i heh luat, i haksat luat ciang i phawk masak penpen i pianna i nu na himawk hi. A nawitui tawh hong vak a, hong tawi a, hong pom a, hong kawi a hong pattah a hong huaipen i nute na himawk hi. Hih tembaw tuahsiatna tungtawn in i phawk velval ding thu khat hong om hi ciin ka ngaihsun hi. I hopih theih lai, i ki it theih lai in i pianna nu leh pa i it ding, i zahtak ding, i khual ding, i et ding, i kep ding ahi hi. I omkhop hun ding pen leitungah tomcik hi a, i kikhen khit vanglak ciang hih leitungah a kimu nawnlo ding ihi hi.

Youtube ah tunai in “The Toughest Job in the World” cih khat hong kikhah hi. Tua san ah “Nasem ding mi kideih hi” ciin kitangko a, a sem utte in ngetna khiat theih hi, ci uh hi. Tua leh mi tampi in ngen in kuateng in semthei ding cih a teelna uh interview video takpi kibawl hi. Nasem ding mi pen in sun tawh zan tawh nasep a khawl ngeilo dinga, sun tawh zan tawh a tamzaw dingsa in nasem dinga, tut hun ngah mello ding hi. Annek hun ding zong a seppihte tawh a kiton in a nekkhawm ahih kei buang leh a tuam a annek hun kipia lo ding hi. A khasum ding zong omlo a, a mawkna in a sep kul ding, kum nih sung bang a mawkna in a sep phot kul ding hi, kici hi. Tua pen a sem mi tampi omkhin a, tuate pen kua dang hilo in – NU te hi ciin a tawpna ah pulak uh hi. Interview ah kuante in a zak uh ciangin a dikngek uh na liangin NU te in hong itna a liatzia leh ei adingin a nak sep dan uh, a gim zia uh tel uh ahih manin a khasia liang uh hi.

World’s Toughest Job – #worldstoughestjob

https://www.youtube.com/watch?v=HB3xM93rXbY

Nute Ni hong tung pah ding hita a, nute itna thu a gen manlo a hun bei zangzang tampite pammaih mahmah hi. Tuni in na nu kiangah itna thu na gen khin hiam? Na gen ngei hiam? Na gengen ut hiam? Na gen theih nawnloh hun, na nuntakna, ama nuntakna nitum bangin a tum hun, na tuanna tembaw – na leitung nuntakna a bei hun hong tung leh na samkik thei nawn kei kha ding hi.hauzacin

“Nu aw, hong it ing” ciin na gen theih laiin am in, hanciam in na itna pulak in genkhia mengmeng lo ding na hi hiam. I tuanna tembaw ciat ni khat ni ciang a tum ding vive i hi hi. Nute hong itna mangngilh ngei kei ni. Topa in nute thupha pia kim ciatta hen. Hau Za Cin