Nu aw ~ Filip Zampu

Nu aw ~ Filip Zampu

Tuni a tam khollo thu tawmkhat hong gelh ing. Hehpihna tawh na simsak inla, midangte tungah zong na hawmsawm sak in cih hong cial nuam ing.

May kha nipi nihna pen Nute’ Ni ci’n i zat zelzel ahi hi. Tua hun ciangin i Nute i itna, i Ngaihna, i phawkna, Nute’n hong itna, a tate adingin hong kipiakkhiat nate tampi tak i sut ciat hi. Hoih mahmah hi. Ahi zongin tuni kong gennop thu in Nute tungah thumnopna leh kutna hong nei nuam ka hih manin Hehpihna tawh tawmvei na hun hong pia inla na simsak in maw…

Leitung hun paizia tawh kituak in khua hunte hong kikhel in muhdan tatzia tampi tak hong kikhel khel hi. Ahi zongin ei thu um mite adingin i Lai Siangtho pen kikhel ngei peuhmah lo hi. Siavuan tampi tak leh mipil tampi takin ”Ta tampi neih kul kei, a tam pen nih hileh phazo” ci’n hong pulak khiat tak uh ciang ta deihlote leh ta tampi neih a ut lote in na sang thei mahmah uh hi.

Tua ahih manin numei kipawlna ah thuhilh in a pai kawikawite in bang ci hiam cih leh ”Na tate uh zong vak zo ngap lo ta tampi pi na neih uh kisam kei, khawlta un, khakta un” cih bangin Pasian’ tanu tapate na zo mahmah uh hi. Tua ahih manin mi pawlkhatte in bang ci hiam cih leh, ” Ih nuntakna i sum ngahnate i ngaihsut ciang ta nih leh thum khawng neih ding bek mah hi” ci’n ta a deih mahmah uh hang nei ngam nawn lo hi.

Ahi zongin Lai Siangtho in ”Tate pen Pasian’ hong piak Letsong aa…Late 124:3″ na ci hi. Na tate nang ma vak dingin na ngaihsut leh na lungkham ding hi. Ahih zongin ta khat na neih ciang Pasian in Letsong hong pia na hizaw hi. Khat bek na neih lai in hamsa nasak hang khat na neih kik ciang Pasian’ Letsong a sang thuah nahih manin na upmawh sang nekledawm puansilh nikten hong kicing cingzaw lel ding hi. Tua pen Pasian in a tate a angvan dan ahi hi.

Tua ahih manin Nauphiat, nautolhsak, naukhak den nahih pen Pasian’ thuphate a khakkhak na hi hi. Tua bek thamlo mithat tualthat nahih lam zong hong theisak nuam ing. Tualthatna a deih lo Pasian in Nang tungah hong thukkik ding lauhuai mahmah hi. “Zatang nek bek hi e, zatui sut bek hi e, pasalte’ natui a khak bek hi e, kha khat pha pan a asia sak hing e, kha nih kha thum hi pan tolhsak siasak lel ning” na cih pen ol no in na ngaihsut hang ”Tualthat, mi that” nahih lam hong telsak nuam ing.

Mipilte Siavuante thugensiamte in bangbangin a gen zong i Lai Siangtho tawh a kituak keileh na zuihloh pah ding pen hong vaikha nuam ing. Pasian’ tate nahih manin na mawh khakna a omleh mawh maina ngen lecin aman hong maisak pah dinga nang Ama hehna pan a suakta ding na hipah hi.

Hi bangin Nute gil sung pan susia, nau no ngek senlai a siasak, a suah khitteh kipaai, a gol ciang taisan cih bangin Nute nong om uh pen hidan a thuak naupangte in Nute’ kipahtawina a bilkha ah za ciaiciai in ”Nute’ itna khuaizu bangin khum kici a bang hangin ka Nu’n hi banga hong bawl a le” ci’n na thumthum uh hi.

“Itna lak pan Nute’ itna manpha pen Nute kan a hong it ding om lo kici na pi’n tun ka nu’n nisim in nautolhza tawh hong thatthat” ci’n a hehpihhuai naute kahna hong ki koko hi. “Nu aw, ta pil deih hilo nahiam, banghang Khaini, Kunza, Kunpawng, Za, Zu, Guihtheih khamtheihte tawh na gil sunga nata hong hi ci bawl lawmlawm na hia?”cin a hehpihhuai naute’ thumna aw hong za ta in maw Nute…

“Ka neulai in kata aw ci’n na nawizu nong tepsak hangin bang hangin Nu aw natate leh ka pa hong nusia ta na hiam? Nu aw nisimin na aw za denden nuam ung a, banghangin ko tawh a kigamla theithei ah hong paisan nahia?”ci’n na taisat natate’n a Nu nangmah hong ngai in gawm ngeungau in milak ah zong kihel ngam loin a Nu nangmah hong ngai in kapkap uh hi.

Tuni-in kong gennop thu in: Nungak lai in Kamsiatna tawh nau nei nahih leh zong na neihpihte tawh Nu hidingin kiging inla “NU” gina dingin khentat in. Na ta in ”NU” hong cih ding hong ngak lah mahmah hi. Nupi khin hi napi ta deih ngam nawn lo aihkei leh nei ngam nawn lo a omte in ”A Piang zahzah Pasian letsong hi” cin sang siam inla, ”Pasian in ka ta ading hongsik ding hi” cih lametna nei in.

Tua bangin nau na khakkhak na pen Nang sihna ding gu a nene nahih lam zong hong theisak nuam ing. “Tate It ing” na cih takpi leh Guihtheih khamtheihte tawh kidek in tuni a kipan zatsawm nawn kei inla, a siangtho sinsen in om sawm tawntung ding kisin in. Tua hileh Thongkia mi tawm dinga mi gina lo zulesa tawh kidiahmi a mangthang mi tawmtuam pah ding hi.

A tawpna ah tate thalegal ngak dingin khentat zaw in maw Nute.. Nupa sung innkuan sung thulehla tampi a om hangin natate mah hong huaizaw veve un maw… Naungek senlai nusia in tate veilehtak zong thei loin nusia cih pen cizekhuai lua hi. Vasate naleng a picin mateng a Nu nusia lo hi. Nang ganhing hilo nahih manin nasih dong nangma vaipuak hi cih hong theisak nuam ing.

Nute’ Itna manpha a mahpha pen Khuaizu bangin khumin tehpih om lo zah dongin kigen ahih manin Nute’ aw natate’n Nang “Nu” in hong neih pen pen Manpha sa maw, aih keileh Kamsiam kisa cih pen nang “a NU” khut sungah om liuleu hi.

Tua ahih manin Nu Manpha a Pahtaknu hi dingin tuni Nute’ Ni ah NU khempeuh i biak Vanglian Topa Pasian in Thupha hong pia kim ciat tahen. Amen. Filip Zampu