Ngaihsutna thupi mahmah ~ Tdkhen

Ngaihsutna thupi mahmah ~ Tdkhen

“Na lungsim ngaihsutnate nuntakna nak hi a, na neihsa a manpha pen bangin na kep ding ahi hi”(Pau 4:23)

1. Lungsim thanemte in nunglam thu sutsut uh a, lungsim thahatte in mailam hun geelgeel uh hi. A laihawlte in ahihleh, kimangngilhbawl’ lel uh hi.

2. Nunglamah a kinesa ankuang kimu dinga, mailamah a kithuuk ding anbeel kimu ding hi. Mai nawtna mah lamet om zaw hi.

3. Nunghei leng a hatlo teng kimu ding a, mailam en leng a hat teng kimu ding hi. Mai-a paite pha ding cih pen kimakaihna lakah a hoih pen ahi hi.

4. Mailam en-a paite nunghei bek lezong kisuikha in tuk thei hi. Khuadak lo-a pai’ding mah hihtuak pen hi.

5. A damlo te’n dam ci a, a hatlo te’n hat cihna pen, zingnino suak banga hong phong thuphanote ahi hi. Thuphanote ìtbawl’ in!

6. Lungkham napi lungdam ci a, dah napi nuam cihna pen, khitui hong nul’sak i tunnu tawh kibang hi. Lungkhamna leh dahna sungah zong kikhamuang thei veve lel hi.

7. Sam napi kicing ci a, zawng napi hauzo cihna pen, hong siampa thapiakna ahi hi. Amah tha na piakleh na dau a pai ding hi.

8. Lau napi a lau lo banga om a, lel napi a zo banga om’na pen, makaite thapiakna ahi hi. Makaite zong na tungah hong kinga thei lua ahi hi.

9. Kial napi, a vah banga om a, thep napi, a puak banga om’na pen makaite’ tunga makai hihna lim ahi hi. Makai picingte in a nuai-ate tai(kham)sak masa hi.

10. A piang bangbanga lungkimna in a piangsakpa a lungkim sak hi. “Topa sungah lungkim in, amah in na deihna hong pia ding hi” (Pau 37-4).

Na ngaihsutna pen phattuamna a piang ding hiam sittel in.

Hun beisate kipuahphat nadingin hoihmah hi. Ahi zongin tamlak ding hoih lo hi.

Lunglenna lam hong lutlut a, haksa na sakluatleh, na lawmhoihte’kiang zuan in.

Na guallelhnasate in hong veh kikkikleh, na gualzawhnasate tawh do in.

Na lungsim a tam’ciangin Lai Siangtho sim in, ahih keileh, naupangte tawh kimawl in! Tdkhen