Ngahna le gahna

Ngahna le gahna

Kha Siangtho ngahna le Kha Siangtho’ gah gahna
Galatians 5: 22na ah “Kha Siangtho gah in itna hi” na ci hi. Ih Topa in thukham lianpen pen “Na ngaihsutna, na lungsim, na kha le na tha neih khempeuh tawh na Topa na Pasian it in” ci-in ong gen hi. Tua khit ciangin “nang le nang na ki-it bangin na vengte na it in” ci-in ong hilh hi. Hih itna ih neih theih nadingin Kha Siangtho ih ngah phot kul hi. Kha Siangtho ngah masa phot lo-in kigah thei lo hi. Banghang hiam cih leh Kha Siangtho ih ngah ciang bekin Pasian’ san theih ding itna kinei thei pan hi. Romans 8: 1-4na ah, Pasian’ thukham (Law) pen eite in ci le sa hanciamna (si le sa itna) tawh ih zui zo kei a, Kha Siangtho vangliatna bek tawh ih zui zo hi na ci hi. Zechariah 4: 6na ah “…keima tung pan’n na ngah vangliatna bek tawh na ma na tun zo ding hi” a cih mah bangin Kha Siangtho ih ngah ciang bekin Kha Siangtho vangliatna tawh itna ma ih tun zo bek ding hi. Ci le sa tawh thukham sawm (Itna) pen zuih zawh, neih zawh sawm kei in. Ahi zongin Kha Siangtho ngahin, Kha Siangtho tawh na kidim ciangin tua thukham sawm zuihna (itna) pen na nuntakna ah damdamin hong kimu to semsem ding hi zaw hi. Itna sungah ih nuntak ciangin thukham a kizui na hi pan hi. Romans 13: 8na ah, Paul in a it thei mite (Kha Siangtho a ngah khin mite) in thukham ii ahong kalh thu a zui zote a hi uh hi, na ci hi.

Ih gensa mah bangin Kha Siangtho gah in itna ahi hi. Banghang hiam cih leh Khrih tawh pumkhat ih hihna hangin, Kha sungah itna tawh ih kalsuan thei ta a, itna sungah ih nungta thei ta hi. Tua bangin Kha Siangtho ih ngah theihna dingin Jesuh Khrih pen tanpa le Topa a, ih san ciangin dikna ih ngah a, tua diktanna (righteouness) ih ngah theihna pen upna hang bek ahi hi. Upna in hong kisik saka kisikna in mawhna maisaka, mawhmaisakna pen Jesuh Khrih sisan sungah upna tawh kingah bek hi. Kisikna thu ah, khatvei kisik a tawntunga kimang ahih hangin nisim Christian te kisikkikna pen ci le sa tawh a nuntak hun sung tawntung ah a zat uh a kul lai ahi hi.

Kisikkikna ii a gah pen ih nisim nuntakna ah a kimu tawntung sak zo ih hihna in Christian taktak ih hihna hong lak pan ding hi zaw hi. Ih Topa Jesuh ii khatvei sep a tawntunga kimang paisuak ong tatkhiatna (Justification by Faith) thu in thu-ummite’n a khantawna a man theih ding uh kisikkikna piangsak ahih manin, ih nisim Christian nuntakna (sanctification life) ah mawhmaisakna (forgivenness) thu ih nget den lai kul hi. Tatkhiatna ahih kei leh diktanna ih cihcih tua Justification pen eite’ nisim mawhna hangin kiam tuan lo-in eite’ nisim nahoih sep zawh semsemna hangin zong khang tuan lo hi. Tua tatkhiatna hanga ih ngah diktanna (Justification) pen thu-ummi khat ciat tungah a tawntungin za ah za ahihna tawh kip ngitnget hi.

Ahi zongin gupkhiatna ahih kei leh siansuahna ih cihcih tua Sanctification pen mabaan nei Christian nuntakna ahi hi. Tatkhiat ngahsa (diktang mi) Christian te’ nisim nuntakna pen khantoh lam a manawh thei, maban a nei thei upna ahi hi. Ih nisim Christian nuntakna ah a sanna lam hong kahto thei sak nahoih sepnate pen a kisikkik mi ih hihna ahong lak, ahong kimutelsak thu na hi gige zaw hi. A kisikkik thu-ummi ih hihna hong kimuh theih tawntung kul hi. Tua bangdana kisikkikna tawh nuntakzia pen Christian upna ahi hi. Tua ih upna ih lah theihna dingin tuikiphumna (baptism) ih lak kul hi. Tui ih kiphum mana kipiangthak hi lo-in a piangthak ih hih mana tui kiphum hi zaw hi.

Tui ih kiphum ni-in Kha Siangtho kingah pah hi. Kha Siangtho ih ngah ciangin a tawm ngahzaw a tam ngahzaw cih bang om thei lo hi. Kha Siangtho a veka ngah pah lo cih bang om thei lo hi. Kha Siangtho pen Topa Jesuh mah bangin To khat (one person) ahi hi. Amah Kha Siangtho na ngah leh Amah Kha Siangtho a vekin a ngah hi pah teh. Ahi zongin tom gen rehang, Kha Siangtho tawh kidimzawk hun kidim lohzawk hun cih bel om thei hi. Ih gen nop thu ah pai kik rehang, Kha Siangtho a ngah mite bekin itna maan nei thei uh hi. Tua Kha Siangtho itna in khuamu hi.

Kha Siangtho gahte pen thukham sawmte hong hi pah dinga Gal. 5: 14, tua thukham sawmte pen Kha Siangtho’ vangliatna le huhna tawh damdamin na upna sungah hong gahgah thei pan ding na hi zaw hi. Kha Siangtho ih ngah ciangin a vekin a kingah hi pah hi. Ahi zongin Kha Siangtho gah pen a vekin kigah pah thei lo hi. Kha Siangtho gah pen thu-um mi khat in a sih dongin a gahgah lai kul hi. Ngah (recieve) pen gah (fruit) hi lo a, gah pen ngah hi lo hi. To receive the Holy Spirit as a person is a once for all. But to be fruitful is a process. Kha Siangtho ngah masa lo-in na gah thei kei ding hi.

Evan. Suang Dal