News update: Russia – Ukraine vai (May 03, 2022)

News update: Russia – Ukraine vai (May 03, 2022)

1. U.S Numei Basketball national team selection khat ahi Ms. Birttney Griner pen Russia gam va hawh laitak Russia thu nei ten man uh aa, US state department in belh mawhna om lopi amat uh hi ci in thu suahna bawl uh hi. US gam aading Olympic gold medal nih vei ngah nang ahanciam pih Ms. Griner pen nung kha sungin Moscow airport ah Russia ten maan uh hi.

2. Ukraine galkap ten Russia galkapna omna leh phualsatna mun tampi Military drones te tawh sim uh aa, galkap te omna mun tampi kisia cip hi ci in Ukrainian Armed Forces Southern Operation Command ten video khah khia uh hi. Tulai tak Russia lam pan zong Ukraine gam mun tampi Gal vanleng leh Missiles tawh kap hi ci uh hi.

3. Russia in Eastern leh Southern Ukraine gam teng buluh nuam ahih manin hong tung ding May 09 ni in Ukraine gam tung gal sim na “declaring war – “ taangko khiat ding geelna nei hi ci in US leh EU gam te in genkhia uh hi. May 09 ni pen Galpi nihna 1945 kum in Russia in Nazis te in gualzawhna ni “Victory day” tawh kituak hi ci uh hi.

4. European Football Associations (UEFA) in Russia ten Ukraine gam buluhna hangin Russia football club team leh national team peuh mah kidemna khempeuh ah kimawl sak nawnloh dingun khensatna nei uh hi. July kha England gam ah akibawl ding Women’s EURO 2022 final kidemna ah zong kihel thei nawnlo ding ahih manin ama mun ah Portugal team kimawl ding hi ci uh hi.

5. Ukrainian military in Russia gamgi aa khua khat ahi Kharkiv khua ngei teng Russia te khut sung pan lakhia kik zo hi ci in Ukriane thu nei lam ten genkhia uh hi. US leh gamdang te huhna tawh Ukraine ten Russia te buluh gam tampi la kik zo uh hi ci uh hi.

6. US gam in M777 Howitzers akici thaupi 70 Ukraine te pia uh aa, tua azang ding Ukraine galkap 200 val siamsin na (training) pia uh hi. Abeisa nai 24 sung US in Ukraine te Vanleng tawh 13 vei huhna puak ta uh hi ci in US defense lam pan genkhia uh hi.

7. Russia-Ukraine buaina tawh February 14 pek pan akikhak US Embassy zong Ukraine te Khuapi Kyiv ah May kha bei lam in kihong kik ta ding hi ci in US Embassy pan thu nei ten genkhia uh hi. Russia te buluhna hangin US Embassy pen Lviv khua ah them vei sung tuah uh hi.

8. U.S House Speaker Pi Nacy Pelosi pen Ukraine te Khuapi Kyiv ah upmawh lopi in va hawh vat in Ukraine President Volodymyr Zelensky tawh kimu in thu tampi kikhupna nei uh hi. U.S Kumpi lam pan asang pen thu nei officer khat amasa pen va pai na zong ahi hi.

More: Leitungbup Zomite sungah kidop/ kikep ziading pulak nopna

Tulai tak Pu Biden in Ukraine gam huhna $ 33 billion piak thuah ding a gel lai tak hi aa, U.S Congress pan zong thukimpihna nei uh hi ci uh hi. Ref: CNN breaking news, Twitter *** Zing nitak ciang News Update zong LIVE tawh kikhah ding ahih manin kimu tek ni. Thomas On Sian Mung Thomas Mung Guite) Washington D.C May 03, 2022