New Zealand gambup Zomite’ Khuado Pawipi a (4) veina nuamtak kizo

NEW ZEALAND GAMBUP ZOMITE’ KHUADO PAWIPI A (4) VEINA NUAMTAK KIZO

New Zealand gambup Zomite’ Khuado Pawipi A (4) veina pen October kha 23 pan 27 ni dong Ni 5 sung nuamtak-in Nelson Khuapi sungah kibawl hi. Ka theihkhialh leh zongh athei te’n hong genkik unla, Leitungbup muntuamtuam aa om Zomite’ Khuado pawipi kibawl khempeuh lak-ah asawtpen leh nitam abawl penpen “New Zealand Gambup Zomite’ Khuado Pawi” ahi ding in kilamen ungh.

Amasa pen in, hih Khuado pawipi pen kumsim in akibawl hi aa, New Zealand gamsung aa om Zomite’ tenna Khuapi 3 (Auckland, Wellington, Nelson) hih Khuapi 3 teng kigawmkhawm in kumsim in akibawl den ahihi. Ka om na khuapi te uh zongh vanleng tawh naikhat bang akileeng leh Bus tawh pai ding hilengzongh nai 10 bang akihawlna vive hi-in, kikawmna haksatna tuamtuam kawmkal ah Pasian in hong kem in kuamah tuahsiatna, natna cih te om hetlo in hong gualzawhpih man in Topa tungah lungdamna lianpi ko masa nuam hihang.

Anihna ah, mun gamlapi pek pan in ama’ kipiakkhiatna leh minam itna, veina lianpi tawh Khuado pawisiim in hong pai ahi, Rev. Dr. Gin Khan Khual tungah zongh nalpitak-in lungdam na lianpi kanei uhhi. Hih Zomite’ Khuado pawipi pen Pupa ngeina kepcingna bek hisak lo-in, Pasian thu mahmah tawh kop in cialpi tawh akithuah pahpah pawi khat aa kazat uh ahihi. Pasian in thupha ong pia in, tukum bang zongh kumdang tawh kibang lo-in atuam vilvel in Pasian nasem Rev. Dr. Gin Khan Khual (UK) zongh kote tawh hong kihel theih ahihman in nakpitak-in lungdam in ka kipak mahmah uhhi. Pasian in zongh Siapa hong zatsak in ih Zomi ngeina, tangthu, thu manpha thu tuamtuam leh Pasian’ thu mahmah tawh zongh thapiakna hong neihpih den ahihmanin kalung uh dam mahmah hi.

Hih Khuado pawipi ni 5 sung ah nitaksimphial pen Pasian’thu nungta tawh thapiakna leh biakpiak khopna kinei aa, Siapa. Dr. Khual in Pasian thu nungta tawh kha-ann vakna hong nei den hi. Thu kikupna, dotna dawnna te zongh kinei thei in asawtlo-in Leitungbup Zomite’ ettheih leh ngaihtheih ding in zongh Youtube pan in hong kikhahkhia ding aa, tua ban ah Zomi Innkuan New Zealand (ZINZ) te’ Official Website te ah zongh hong kikhah ding hi.

Athumna ah, hih Khuado pawipi sungah New Zealand gam maikai tuamtuam te zongh hong kihel thei in, adiakdiak in, Nelson khuapi sungah panmun nei Ulian tuamtuam te leh biakna Makai sia, Pastor te zongh hong kihel theih ban vuah, Community tuamtuam te, Bhutanese, Burmese leh Kayan community te pan in zongh ngeina lam tuamtuam te tawh hong kihel thei uh ahihman tha kingah mahmah hi.

Atawpna leh thukhupna ah, tukum khuado pawipen Nelson Khuapi ah kibawl hi aa, nuam mahmah leh mipi zongh tha kingah mahmah hi. Kum dang in ka neih ngeiloh uh Chief Guest khat Rev. Dr. Gin Khan Khual ong kiheltheihna zongh kalung uh dam mahmah leh mailam ah zongh Zomi Pasian nasem, Zomi gam makai tuamtuam te zongh, na mite’ uh hong van hong en in hong zin kawikawi zo ding in Pasian in thupha hong pia hen la, maikum ah, Auckland Khuapi ah New Zealand Gambup Zomite’ Khuado Pawipi A (5) veina kibawl lai ding ahihman in, kua hong kipia in, Khuado pawi hong sim ding cih hong kisasa khol un ci-in Zomi Inkuan New Zealand te tang in kong sam khol uhhi. Ih biak Pasian in ih omna ciat ah hong kem den ta hen.

Lungdam,
Zomi Innkuan New Zealand