Neu lua cih omlo ~ Rev. Nang Ngaih Lian

Neu lua cih omlo ~ Rev. Nang Ngaih Lian

Innkuan sung, pawlpi sung, khua sung le gam sung buaina a om theih zelna pen thunei kituhna le i kilat nop luat man khawng hi thei gige hi. Tua tawh kizui-in Topa hong koihna mun pen ‘neu lua’ ci loin i sep theih bangin i sep theih tek nadingin Andazih nuntakna tung tawnin tha lakhawm le’ng ut ing.

Andazih tangthu tomkim:
Andazih pen Galilee mi hi-in Bethsaida khua ah suakin Kapizanawng khua ah khangkhia hi (Jn.1:44). Pawlpi tangthu khatah Andazih pen Topa Zeisu’ nungzui a masapen hi, ci-in kiciamteh hi. Ngabeng, mizawng khat ahih hangin a thuman a citak mi ahi hi. Topa Zeisu nung a zuih ma-in Tuiphum Zawhang nungzui ngei hi (Jn.1:35-37). Andazih a khiatna pen “Pasal mahmah” cihna hi.

Kiphawk kha lo:
Andazih pen Topa Zeisu nung a zui masapen hi napin Lai Siangtho sungah Pitazuh kimasak den hi. Thuciamthak sungah Pitazuh min 156 vei bang om a, Andazih min 9 vei bek om hi. Getasimani huanah Topa Zeisun thu a nget lai-in Pitazuh le Zebedi tapa nih sam a, Andazih kisam lo, kiphawk kha lo hi (Mt 26:37).

Tuhun thu umte hi le’ng nungzui tektek Pitazuh sam a, kei hong sam lo, ci-in a nung zui nawn lo, kikhawm nawn lo, sumpi pia nawn loin zu khawng ne gawp kha ding hi hang. Andazih tua ci lo hi. Zeisu teel khin ahih manin Zeisu koihna munmunah hahkat takin na sem hi.

Andazih’ lungtup:
Topa Zeisu kiangah mi ahi a, van ahi zongin tunpih ding cih ahi hi. A masapenin Topa Zeisu kiangah a innkuanpihte tunpih hi. Tua banah Greek mi pawlkhat va tun leuleu hi (Jn.12:20-22). Topa Zeisu in mi 5000 a vaak ding lai-in a lawmten ahi lo lam vive a gengen laitakin Andazih in khomun pum nga le ngasa tawn nih a pua naupangno Topa Zeisu kiangah va paipih hi (Mt.14:17).

Naupangno’ sunsiah neuno khat Zeisu khut sung a tun ciangin mipi tulnga in kham takin ne thei hi. Zeisu in A khut sung a kitunte a zatzia ding thei hi.

A sih dongin:
Andazih thugenna tung tawnin Akhaia gam ukpi Aaegass’ zi le a sanggampa piangthak ahih manin Aaegass heh mahmah hi. Aaegass in “Andazih aw, Zeisu nial in, nungta ding hi teh” a cih leh Andazih in “Zeisu um in, nungta ding hi teh” ci-in a dawn ciangin heh semsem ahih manin “Andazih singlamteh tungah khailum un” ci hi. Nasemten Andazih sing tungah khai-in sawtpi a gim nadingin khauhual tawh hen uh hi. Andazih in a nuai a galkapte tungah lungdamnathu gen veve hi. A khai zawh uh ni nih ciangin Andazih in A na a sepsak Zeisu kiang zuan ta hi.

Nungzuipi Andazih bangin Topa hong koihna mun, ‘neu lua’ ci loin hong koihna munmunah citak takin Topa’ na sem ni. Khamangthang tampi Zeisu kiangah a tunpih dingin Topan thupha hong pia ta hen. Rev Nang Ngaih Lian