Mei’ hallup sang, tui’ taih a si tam zaw

Mei’ hallup sang, tui’ taih a si tam zaw

A khangto gamte ah zu dawn pen buaipih khollo uh a, zudawn man in insurance man/premium tamtuam cih om khollo hi. Zatep tep bel buaipih uh hi. Insurance man/premium tamsak tuam mahmah hi.

Ei’ Zogam ah bel zatep hoih hi cihna hi tuanlo, za pen za ahihman in a khangto gamte mah tawh a hoihlohna kibang peuhmah lel ding hi. Ahih hang, ei’ ading in zatep tep sang zudawn hoihlo zaw thamtham mawk hi. A taktak in i buaipih mahmah “zuhang” i cihte pen mite’n zu a zong ong simsak loh “rice wine” hilel hi.

Ahi zong in Zogam ah khangno, khanglai tampi tak in hih zuhang/rice wine dawnna hang in hunlo pi in ong sihsan uh hi. Zatep/mei’ hallup a khangno, khanglai si cih kiza ngei khollo a, ahih hang zudawn a khanglai si, tui’ taih cih kiza mun mahmah hi.

Bang kisam ahi diam?

– A zu dawn dan siamlo, uang dawn lua i hi diam? Kidop zia ding kihilh theih a om diam?

– A zu siangtho lo, silngo/chemical hoihlo tam kizang lua ahi diam?

Ngaihsut huai mahmah hi. Zu sang zatep a ki-kihtak zawk hun, tui’ taih cihsang mei’ hallup cih i zak leh i kihtak zawk hun ong tun ding lam-etna tawh i lunggulh mahmah hi. Pau Khat Suan