Indonesia, Bali ah nelvang sung vankham hento in apuasim mi 3 kiman

Indonesia, Bali ah nelvang sung vankham hento in apuasim mi 3 kiman

Indonesia gam ii tuikulh minthang mahmah ahi Bali Island ah vankham puasim in alutsawm mi 3 kiman cih Jakarta Post pan kiza hi. Tua mi 3 tepen numei 1 leh pasal 2 hi uh a, vankham pen anelvang tawsung ah hento in apuasim uh kici hi. Numei zawpen bangin anelvang leh azahmawh sungah vankham hento in puasim kici hi.

Tua akiman mi 3 te lakah Malaysian gammi khatleh Indonesian gammi 2 kihel uhhi. Hih mi 3 tepen Thailand, Bangkok panin vanleng Thai AirAsia FD 396 tawh abeisa March kalnihna sungin alengkhia uh hi a, Bali Island aom Ngurah Rai Airport panin akiman uh ahihi.

Tua akiman mi 3 tepen kum 23, 24, 25 cihbangbek hipan uh a, Thailand, Bangkok panin Indonesia, Bali Island ah zuakkikding in vankham honkhat apuasim uh ahihi.

Bali aom Ngurah Rai Airport alut uhciangin Security Check kibawl a, tua mi 3 tepen aomzia uh mantaklo, lauthawngpian, muanmawh huaipian tawh kibang in om uhhi. Tuaciangin X-ray tawh Scan akibawl ciangin apumpisung uhah muanmawhhuai van pawlkhat kimu hi ci’n Ngurah Rai Customs thunei te’n Press Conference ah Monday ni in genkhia uhhi.

Tuaciangin tua mi 3 tepen atuamin ki samkhia in, inndei sungkhat ah hoihtak in Checking kibawlkik leuleu hi. Tuabangin hoihtak sitcianna akineih ciangin vankham apuakteng hongki dawkkhiamang hi.

Amasa pen pasal khatpa sitcianna nei uh a, avanlak ah Methamphetamine 36.2g kimu masa hi. Apumpi zong aki velcian ciangin anelvang panin ahentoh vankham Packet 3 kimuhbeh a, tuate pen Methamphetamine vive hi in, agihna 36.25grams, 33.73grams, 20.73grams cihbang in ki mukhia hi.

Anihna pasal khatpa ki sitcian leuleu in, tuapa ii anelvang sungpanin Methamphetamine bekbek Packets 4 tak ki mukhia leuleu hi. Tuate ii agihna pen 42.32 g, 44.81g, 39.66g, 38.78g cihbang pha uhhi.

Athumna ah numeinu sitcianna kinei leuleu in, tua numeinu ii anelvang panin Methamphetamine tunnih leh azahmawh sungah ahentoh Methamphetamine tunnih, akigawm in Packet 4 tak ki mukhia hi. Tua numeinu tungpan akimukhia vankham bekbek ii agihna pen 140g bang phahi.

More: Myanmar leh Thai gamsung ah vankham tampi ki haltum

Tua mi 3 tepen vankham tawh thu kibawl in, amawhna kician mahmah cih aki muhkhiatleh sihdan “death penalty” kipiading cih kiza hi. Sawltak #zomidaily