Australia ah Laimi khat migilo te’n a mawtaw suhsak

Australia ah Laimi khat migilo te’n a mawtaw suhsak

Australia, Brisbane khua aom Laimi khat anasepna pan aciahlaitak lamzikpi tungah midang aliamkhat mu ahih manin ahuhding in a mawtaw akhawlsakleh migilo te nahi uh a, a mawtaw ki suhsak cihthu Yahoo News pan kiza hi.

Mawtaw suh athuakpa minpen Bawi Hlawnching hi a, amahpen sagawhna Meat Factory khatah nasem ahihi. Zanni Tuesday (01 November) zankim madeuh in Ewing Road, Woodridge ah nasepna panin ama mawtaw tawh aciah laitak lamzikpi tungah mikhat alum mukha hi. Amahzong alung nuamlo in ahuhding in a mawtaw akhawlsakleh lamzikpi geipan in mi 4 hong pusuak uhhi.

Tua mi 3 te lakah mi 2 in thautawi uh a, Bawi Hlawnching inzong laulua in kalinggawp cihi. Tuapan in a phone zong suhsak uh a, a mawtaw tungah tuangin taisan vingveng uhhi.

Bawi Hlawnching zong tawmveisung bangcihding cih theipaklo in khuamial sungah dingcip a, khua hongphawkkikvat ciangin ageinai aom alawmte khat kiangah taiphei in huhna ngenphei hi.

Hih migilo tepen African mivomnam te hiding in ki ummawh a, palik te’n akancian laitak uh cih kiza hi.

Bawi Hlawnching ahihleh ami bangmah hongcihloh uh Pasian tung lungdam kako uh ci’n genkhia uhhi.

Lamzikpi tungkhawng ah atuk, aliam khawng aom ciangin akineih ahi khakding kidop huai cih hongphawksak hi. ZD Sawltak #zomidaily