Naungek suakcil anungtalai in ninbung sungah kipai, miksi in dehgawp

Naungek suakcil anungtalai in ninbung sungah kipai, miksi in dehgawp

India gamsung ah naungek asuakcil khat numei ahih manin, anu apa te’n deihlo in ninbung sungah paiziau cih Daily Mail pan kiza hi. Tua naungek pen ninbung, Plastic Bag sungah akipai hi a, ahunlap in ki honkhiathei hi.

Central India, Madhya Pradesh State sungah thupiang hi a, Bhopal Police te’n agenna ah hih naungek pen pasal hilo ahih manin, anu apa te’n deihlo in apaih uh hiding cihi.

Ninbungsung panin akitopkhiat ciangin miksi tampi in apumpi tungah bawmngeingai cihi. Ageinai ah anawkkha khatin naungek kap azak ciangin Rubbish Container sungah amukhiat hi a, hih naungek pen agihna zong ageina sangin niamzaw “Underweight” cihi.

Amukhia Dheeraj Rathore kici ii genna ah Saturday zingsangtunglam in naungek kap kaza hi. Ninbung geiah kanawk laitak in kazak hi a, ninbungsung ka et ciangin naungek asuakcil khat kamu a, kapatau mahmah cihi.

Tua naungek ii alu leh apumpi khempeuh ah miksi vive in bawmngeingai hi. Tuaciang in alawmte kiangah huhna ngenin, tua naungek pumpi tungpan in miksi te hemkhia uh a, puanza tawh tuam uhhi. Tuakhit ciangin amanlang in ageinai aom Hospital khatah paipih uhhi.

Hospital panin Medical Staff te’n agenna ah hih naungek pen agihna 3.5 pound bek pha in, Critical Condition hi. Naungek suakcil pen 5.5 lb panin 8.8 lb kikal pen angeina hi a, hihpen angeina te sangin agihna tawmlua mahmah cihi.

Zato ah hoihtak aki etcian ciangin apumpi tungahzong liamma, akikui cihkhawng omkawikawi ahih manin, asuahkhiat limin kibawlsia “physical abuse” kibawl hiding cisawnsawn hi.

Police te’n thu bawlding in Case Register uh a, anu apa kuahiam cih kankhiading cihi.

India gamsung ah tapasal bekbek kideihlua mahmah ahih manin, naungek numei asuah ciangin hihbang in apaiziau pawlkhat ommawk uhhi.

India pawlkhat te ngeina ah numei in pasal aneihding ciangin sum, neihlelam tampi tawh leikul sakmawk uhhi. Numei in apasalding sum tampi bei in leikul, numei in pasal zahin anu apa te kemlo in, pasal aneih ciangin midangta suakziau cihbang ngaihsutna tengtawh tanu neihding pen hamsa asamahmah pawlkhat omlaimawk uhhi.

Related: Yangon Hlaingthaya ah naungek asuakcil akipaai khat anungtalai in kimu ~ ZD

Tapasal tepen gamhluahding, innkuan ii sumzon paizomna aluahding ci’n kimu a, tanumei sangin kidelhzaw mawk hi. Hihbang ngaihsutna ahoihlo te aomloh nadingin Campaign tuamtuam kibawl zelzel himahleh ngaihsutna akilaihzolo pawlkhatmah omlai veve hi. Sawltak #zomidaily