Yangon Hlaingthaya ah naungek asuakcil akipaai khat anungtalai in kimu

Yangon Hlaingthaya ah naungek asuakcil akipaai khat anungtalai in kimu

Myanmar, Yangon Hlaingthaya Township sungah naupang asuakcil akipaai khat anungtalai in kimu cih Eleven News pan kiza hi. Tua naupangngek pen asuakcil alaigui zong kitanglo in omdeldal lai a, akipaihna ah zusa in bet in, tho leh miksi te’nzong petgawp kici hi.

Tuni Saturday (Mar 25) zingsang 4am hunpawl in naungek kapkap khat kiza ahih manin aki etkhiat ciangin Takhin Phoelahkyi lamzing 4 leh 5 kikal aom dailenbuk khat ii adumtung kiatlak panin aki mukhia ahihi.

Tua naupangngek pen Plastic khattawh kituam in akipaai hi a, zusa, tho leh mitsi te’nzong limpehkhit tuak mahmah hi ci’n amukhia masa Ko Myint Zaw in genkhia hi.

Zingsangtung innvengteng in anhuan in akibuaitek laitak, naungek kapkap khat kiza ci’n innveng sungteng kigensawn kawikawi hi. Tuaciangin Ko Myint Zaw in azonkhiat ciangin dailenbuk tungah amukhia ahihi.

Ama genna ah avengte’n datmei hongdet uh a, naungek pen ka laksawm laitak inzong zusa in napetliang cihi. Zusa hawlkhia in puanten tawh tuun in ka lakhia cihi.

Naungekno pen pasal hi a, silehnai tawh kidimcip in alaigui zong kitan nailo hi.

Tua naungek pen vengsung hausa te kiangah ki ap in, tuapan in khuasung zato ah kipuak cih kiza hi.

Vengsung hausa asem U Win Aung kicipa in agenna ah naungek asuakcil khat kimu ci’n phone tawh hongki zasak cihi. Naungek pen nungtalai in, vengsung Nurse siamah tetawh zato ah kipuak cihi.

More: Yangon, Tamwe ah naungek suakcil akipaai khat ahing in kimu

Naungek pen it huai ahih manin akemnuam zong omtuak. Akemzoding omleh naungek adingin lungmuanhuai dinghi ci’n genkhia hi. Nungdeuh mahmah inzong Yangon Tamwe ah naungek khat asuakcil akipaai khat omngei hi. ZD Sawltak #zomidaily