Nau neih (paai) theih nading (1) ~ Cing Van Kim

Nau neih (paai) theih nading (1) ~ Cing Van Kim

“Ta” cih pen Pasian’ piak ahi hi. Kawlte in, “vantung pan a kia phim khat le lei pan a kahto phim khat a kituah nading sangin mihing khat piang nading haksa zaw,” ci uh hi.

A. Nau (ta) a pianzia bulpi

*Niin kang nailo numei khanglai in kha khat-in khat vei, a niin neih kik ma kal nih kisap in khaicibu (ovary) pan numei’ khaici (ovum) tangkhat ta tuikhia hi. Ovulation kici hi.

*Tua numei’ khaici pen fallopian tube sungah a nuailam pen tuipeek-a ong kahto pasal’ khaici (sperm) khat tawh kigawm a, nau piang dingin ong hi. Fertilisation kici hi.

*Cell khat panin tampi piangtoto a, a nuailam-a om naubu sungah tuaksuk in, naubu kawm pangah belh (implantation) a, naupaai kici hi.

B. Banghun sungin nau kipaai thei?

*Niin neih cycle khat pen a huam pi-in kha khat bang sawt hi. Tua kha khat sungah nau neihtheih taktak hun pen ni 6 kiim bek ahi hi.

*Numei’ pumpi in pasal’ khaici tungah a kisap an pia a, numei’ pumpi sungah ni 5 sung nungta thei hi. Numei’ pumpi pualam ah hileh nai khat le lang pan nai 4 sungbek nungta hi. Numei’ khaici in a pusuah zawh pasal’ khaici tawh a kigawm man keileh nikhat sungbek nungta hi

*Tua ahih manin nauneih theih nading hun in numei’ khaici (ovum) a tuikhiatma ni 5 pan a tui khiat zawh ni 1 sung ahi hi. Hih ni 6 sungin nupa om khawm leh nau kipaai thei ding hi.

C. Numei khaici a pusuahhun bangci theihding?

*Niin neih ciil ni pen ni 1 in sim ding a, tuapan 2,3.. cih bangin sim toto leng ni 14 ni kiim in numei’ khaici tuikhia hi.

*Zingsang sim cisa teh leng numei’ khaici a pusuah khit ni 14 sungah a masa nite sangin 0.5°F kiim sa zaw hi.

*Zun sungah LH acih hormone sitna “ovulation predictor test kit” kizangthei hi. LH hormone kah zawh ni 1-2 sungin numei’ khaici tuikhia hi.

*Naubu pan a pusuak a tui/baal them pan zong kitheithei hi. Aktui a dat dan ahihleh nau neihtheih hun hi a, sah in saupi a kikang theih keileh nau neih theih loh hun ahi hi.

More: Minam limlang lai ~ Cing Van Kim

*Nau neih theih nading hunte theih nopleh mobile application tuamtuam zong ki zangthei hi. Gtn; Clue period tracker application NB: 1. Zop lai ding, 2. Ong kidong mun zawdeuh thute a kisuak sak ahi hi. Cing Van Kim