US, Nashville khuasung ansai ah mi 4 akaplumpa ki mankhiata

US, Nashville khuasung ansai ah mi 4 akaplumpa ki mankhiata

Tennessee Police te’n ansai ah mi 4 akaplumpa Monday ni in mankhiata uh cih AFP pan kiza hi. Abeisa Sunday zingsanglam in USA, Tennessee State ii khuapi ahi Nashville City sung aom Waffle House Restaurant ah pasal khatin ansai sungah thautawh mi akapgawp ahihi.

Waffle House Restaurant sungah mi 3 sipah in, adang khatpen zato ah kipuakman himahleh zato ah siveve hi.

Tua mithat, thautawh akappa pen amin Travis Reinking kici a, abeisa kum 4 hunlai inzong US President ii omna ahi White House sungah lutsawm ahih manin mat athuakngei khat ahihi.

Nashville Mayor David Briley in agenkhiatna ah khuasung mipi te zaksakna tawh kimankhia theita hi ci’n News Conference ah genkhia hi.

Thaukappa Travis Reinking pen bangmah liamna omlo in ama omna inngeinai aom Tennessee, Antioch, wooded area panin akimankhia ahihi. Akimat ciangin Police te’n thudotna neihsawm uh himahleh bangmah paukhia nuamlo in, Lawyer hong sapsak un cihciangbek genkhia hi.

Akimatkhiat laitak inzong Backpack thongkuahkhat pua a, tuasung ah Semi-automatic thaukhat leh thautang Ammunition pawlkhat apuak ki mukhia hi.

Video: The suspected gunman in the Nashville Waffle House shooting, Travis Reinking, has been taken into police custody. He is suspected of killing four people in the early morning hours of Sunday, April 22.

Tuapa pen Waffle House Restaurant sungah buaina apiangsakkhit ciangin ataimang hi a, Police te’n nai 24 valbang azonkawikawi uhhangin mankhiazo paklo uhhi. Akimatkhiat ciangin tuapa pen tawltuak, gimtuak mahmah hi ci’n Nashville police lieutenant Carlos Lara in genkhia hi.

Nashville Metropolitan Area sungteng ah mipi 1.8 Million bang aom hi a, buaina apianzawh ki lunghimawh mahmah hi. Mithatpa matkhiattheih nadingin thautawi Federal, State, Local Police te’n nikhatval zongkawikawi in buaipih mahmah uhhi.

Travis Reinking kicipa pen Sunday zingsanglam in Waffle House Restaurant sungah bangmahdang silhlo, teenglo in Jacket khatbek kikhuhsa in ansai sungah AR-15 Semi-automatic Riffle thaukhattawh aphialkapgawp ahihi.

More: US, Tennessee nupa kopkhat in kha 5 aphapan ata uh $3000 tawh Online pan zuaksawm

Tuabangin akapgawp ciangin ansai sungah anne in aom Restaurant Patron khat ahi kum 29 aphakhin James Shaw kici in hangsantak in napumbuan gawpin tuaciangin thaukap akhawlpan ahihi.

Tuakhit ciangin Travis Reinking pen ansai panin taimang in abucipsuak hi a, tu’n kimankhia theita ahih manin khuasung mipi tezong lungnop huai zawdeuhta hi. Sawltak #zomidaily