Napoleon bang hanga si hiam?

Napoleon bang hanga si hiam?

French Emperor Napoleon pen a thei lo tam lou ding hi.A hun lai in thupi mah mah in gamza pi la zo hi.Tumguh lua ahihmanin ‘impossible’ kici thumal bang dictionary pan paihkhiat ding hoihsa hi.A tangthu zaknop gending tampi om hi.A sihdan tawh kisai tamlo gen dih ni.Napoleon pen exile in South Atlantic a St.Helena tuikulh-ah kikoih hi.Hih tuikulh pen British te khut sunga om ahi hi.St.Helena ah a om sungin a cidamna naakpi in kia hi.5th May 1821 ciangin si petmah hi.A sih in British Doctor 5 ten Post Mortem uh a,gilpi Cancer-a si ci uh hi.Ahizongin tua pen a um lo mi pawlkhat om hi.

A cinat sunga a keem pen Dr.Antommarchi ahi hi.Tua ma in Dr.O’meara in khawii ngei in ama’ gendan in Napoleon ha pen nget lua ci hi.Ihmut theihloh natna insomnia zong vei banah a khe bawk hi.Tua bek tham lo in lutang natna leh neek siat hanga natna scurvy zong vei lai ci hi.Hih pa’ natna gente tulai French Scientist khat Rene Maury in Arsenic Poisoning Symptoms tawh kibang ci hi.Arsenic pen kum zalom 19 cil lam in leitungin thei nailo hi.Maury gendan in Napoleon luang France gamah a kilak in muat nai lo ci hi. Tua manin arsenic natna hanga si hi dingin ngaihsun hi.Ahizongin Forensic siam ten tua pen um lo uh hi.A luang koihna hankuang thum tak kithuap hi.Tua in hankuang sunga huih lut ding dal hi.Tua banah St.Helena huih vawt in si luang muatsak lo ci uh hi.

Maury in Napoleon pen amah a keem khat in tul pia dan in gen hi.Tua pen Count de Montholon hi-in aman Napoleon wine dawn ding south Africa pan vaikhak sak zel hi.Amah pen sum tampi tawh Napoleon that dingin kicial dan in gen hi.Amah a khawi a keem Dr.Antommarchi gendan in Napoleon in Cancer banah sinkhang(sinlian) leh TB zong vei ci hi.

French writer pawlkhat in bel British ten a thahnop man un St.Helena, a cidam huailohna munah koih uh hi, ci in gen uh hi.British te leu leu in bel Personal Doctor Report pen kikhel ci uh hi.Napoleon te innkuan Cancer natna tawh a si tam mah mah ci lai uh hi.A koizaw a dik diam cih pen a hun sawt ta ahihmanin theihcian haksa mah mah hi.Amah Napoleon bel a sih khit hangin leitungah a min daai ngei nawn lo ding hi.

Pau Tun Thang