Nang zong hong it hi ~ Zomi Quavadis

Nang zong hong it hi ~ Zomi Quavadis

Pawlpi ih cih pen zato inn tawh kibang sa ingh. Zato ah siavuan ten cina lunate kem in khoi uh hi. Cina om kei leh zato hon a kul diam? Mawhnei nang leh kei om lo hilehang pawlpi om a kul diam? Mawhneite om lo hileh Zeisu pen vantung pan hong kum sukin singlamteh tungah hong sih sese a kul diam? Leitungah mawhna om lo hileh Zeisu sisan a kisam diam?

Zeisu in mawhnei te thupi sak penpen hi. -Mawhnei te ading hong pai ka hihi, – cina te bekin siavuan kisam hi, – tuucinghpa in a tuu 99 te nusia in a mang tuuno khat zong in kuan khia hi, – Zeisu pen midang inah tung lo in siahdong Zekhe inn ah tung sese hi, – a kitangsak Farisaipa thungetna za lo in awm tum a thuum mawhneipa thungetna za zaw hi, – anne dingin a sam innteekpa Simon sangin a kizuak numeinu kisikkikna khitui in Zeisu lungkim sak zaw hi….

Zeisu tawh a kizom ngiat Pawlpi in mawhneite it in, a ang sungah pom in huai den hi. Nawlkhiin in pampaih ngei lo hi. Bang hang hiam cileh nuntaakna a nei lai mawhnei mite ading in bang zah takin a mawhna uh lian mah taleh lamet om lai hi. Soul zong Paul suak thei hi cih thu pen Pawlpi in tel mahmah hi.

Tua hangin Pope Francis in “Gay te leh Pasian om kei a cite tungah thukhen ding pa ka hi kei hi” na ci a, a ang sungah Muslim refugee te pom in a huai mah bangin amaute zong a itna ang sungah pom in na huai veve hi.

Zeisu in mi hoih mi sia tungah a kibangin ni taang sak hi. Zeisu in paih tuam nei lo in a bawlsa mihing khempeuh it hi. Nang zong hong it cihna hi. Zomi Quavadis