Giabang Zuunni ~ Rev. Langh Za Kap

Giabang Zuunni ~ Rev. Langh Za Kap

Thu masa:
Zogamah 1899 kumin Pasian’ thu hong tung aa, tu hun ciangin Pasian’ hehpihna tawh i gam bup a tam zaw tham in Pasian bia khin ta hang. Pasiang thu hong hat semsemin i gam, i mimam zong khangto mahmah hi cih i mu hi. A hi zongin a thupi mahmah pawl khat i mangngilh kha hi. Khangto i cih ciangin biakna, nuntak kalsuanna khangto, pilna siamna a vekin a khantoh ciangin gam khangto, minam khangto kici thei pan ding hi. I mangngilh khak zel leh i phawk khak loh thu tuamtuamte sung pan a nuai aa thu nihte i khantoh nadingin kikumin gia bang zuun ni.

1. Ngeina:
Ngeina ih cih bang a hi hiam? Pu leh pa ii ngeina, beh leh phung khua leh tui minam khat ii gamtat kampau ngaihsut dan teng ahi hi. (Customs and traditions) Dr. Rechard Niebur in, “Ngeina ih cih pen Pasian’ bawlsa nate tunga a piang sawnsawn mihingte’ bawltawm a ki zomtoto kim leh pam cihna hi a, tua sungah kampau, zongsatnate, ngaihsutna, thucinte, leh thu upte, pupa ngeina, khua le tui beh le phung ki lawmtatnate, man ki seh man neihna (value) gamtat luhek dan cihte ki hel hi,” na ci hi. Leitungah Ngeina ki thupi ngaihsut mahmah ahih manin, kumsimin May 21 ni pen “Leitung bup ngeina khantohna ni,” ci-in ki ciamteh hi.

Leitung pilna siamna leh biakna lamah i khantoh aa i thahat ciangin, i pu leh i pate’ Ngeina cih pen kiphawk kha lo thei zel hi. Leitungah minam tampi tak om aa, minam khempeuh in ‘Ngeina’ ki nei ciat hi. ‘Ngeina’ in i minam hong kip sak, hong it sak hi. Ei Zomite pen, u le nau Beh le phung a it pha diak, ngeina bulletin zu hawm sa hawmna-ah hamphatna sangin a ngeina bangin a hi ciatciat bek a deih minam i hi hi. Biakna lam a kikhan toh semsem ciangin i pu i pa Ngeinate dawi biak ngeina-in ki ngaihsunin pu le pa’ van pawl khat bang a haltum liang tampi ki om hi. Biakna leh Ngeina pen a kigal neih leh a ki do ding hilo-in a tonkhawm ding ahi hi. Biakna leh Ngeina i khen siam loh manin upna thu leh kalsuan zia-ah zong buaina tampi i tuak hi. Lai Siangtho siam Paul Tillich in, “Biakna in Ngeina ii zungpi hi a, Ngeina in biakna a etlawm sak form hi,” na ci hi.

Tu laitak aa a minthang Theology khat in, ‘Asian Theology’ hi aa i gam leh i lei i mun tawh kizui, Ngeinate tawh Pasian biak ding, thu sut ding leh lungdamna thu gen ding cih ahi hi. Gam thak (Mission) na sepna-ah zong amau ngeina tawh kalsuan pih Pasian biakpih leng lawhcing zaw ding hi cih makaite’ muhna ahi hi. I Zo Ngeina khuang le zam le zolate tawh Passian phat leng zong siatna om ding hiam. Pupa’ Ngeinate tawh Pasian i bia thei nai kei zongin i Ngeina ih theih ding leh i kan ding kisam ka sa hi. La phuak siam papi khat in hih bangin la na phuak aa…

(a) Sian sinthu leh Pupa sinthu khang damtui bang gawm thei leng kilawm pen ee,
(b) Ki lawm pen ee Pupa’ sinthu zong tung sianmang in ni bang awi hi, ni bang awi hi ee,! na ci hi.

Judah mi te’n pawi thupi tuamtuam na nei uh a tuate sung pan khat pen “The feast of Tabernicle” kici anlak zawh lungdam koh pawi ahi hi. I Topa Jesu (Jesuh) in zong hih pawi na sim hi. (John. 7:10) Judah mite bangin ei Zomi te’n zong pawi thupi mahmah khat “Khuado pawi (Chin new year) cih i nei hi. Hakha te’n “Thlai thar” Falam te’n “Fang er, Hualngo te’n, “Kut” Thado-kuki te’n, “Cavang kut,” Kanpetlet te’n “Zudan” Matupi te’n “Cangzom” Mindat te’n “Graita-ei” Paletwa te’n ” A ning,” cih bangin min tuamtuamin na nei uh hi. Hih pawi pen anlak zawh ciang Pasian’ tungah lungdam koh pawi a hih manin, biakna sungah zong a zat huai mahmah pawi ahi hi. Pu leh pa te’n a bawl uh ciangin khua sung aa om dawite hawl khia, do ci-in a sing a suang satin kum thak na muak uh hi. Tua ahih manin Khuado pawi na kici hi. Anuai a late ngaihsunin Pasian minthan nadingin kanin zang siam ni.

(a) Pupa phuhsa kum khuadona simsing bang ngil den hen aw,
(b) Simsing bang ngil den hen aw, khang sawn momno te’n gia bang zuun lengee,

(a) Hong kitawi vua, lia le taang aw, Pupa pian zil meei bang theng kuan ee,
(b) Meei bang theng kuan Pupa pian zil, nahzu bang puah dih ni guai aw ee,

Tu hun ciangin i pu i pate’ ngeina a thei nawnlo bek hilo-in i pau, i lai, i late nangawn a theilo Zomi tampi ki om ta hi. Tua ahih manin, i gam i minam i it ding zahin i it thei kei hi. I gam i minam i it theih nading leh a khantoh theih nadingin gia bang zuun hun ta hi.

I zo ngeina mangngilh loin Pasian thu zui Zomi Christian-te hi ciat ni.” (Dr. Kam Khen Thang). “Zomi-in kei ka piang aa, Zomi bangin ka nung ta,” (Rev. Khup Za Go).

2. Unau khat hihna:
I pu i pate Mongolia gam panin sen (China) gam leh Tibet gam kantanin chindwin gun dung zui-in kawl gamah na lut uh aa, tua panin khamtung gam (Chin State) Zo gam AD 1300-1500 sungin na luah na teng uh hi. Mun tuamtuamah ki busa ciatin phung le nam ki vawh ciatin kam pau tuamtuam hong piang khia hi. Zomite kam pau haute i hi a, Chin State sung bekah pau nam sawmguk (60) val bang om hi. Bangzahin pau i hau ta zongin hun sawt nai lo lai-in pau nam khat bek a pau minam i hi hi. I pu i pa te’n vokpi khat sa ne khawm, tui nak khat dawn khawm nu le pa a kiman ciat hi hang, ci-in sisan ki nai na unau khat hihna na gen uh hi. Zomite i vekin unau khat, pum khat a ki-it den ding leh a kikhen thei lo dingte i hi hi. Pilna siamna, hatnate khang to-in i om ciangin unau khat i hihnate i mangngilh kha thei hi.

Zomite i vekpi-in unau khat i hih manin, i gam leh i minam khantoh nadingin lungsim ki khatin mapang khawm den, kalsuan khawng den le’ng i Zogam hong paallun ding aa, i gam i minam in thupha ngahin Pasian min hong thang ding hi. Zomi te’n hih bangin paunak thupi mahmah khat nei hi hang, “Nupa ki lungtuak khua khat in zolo, khuata ki lungtuak, khua kua in zolo,” na ci uh a, tua banah hi bangin la na nei lai uh hi.

(a) I tung solkha vang taang i cih, ak si’n zem a, a vang taang hi ee,
(b) I khang damtui luan’ ging i cih, a kaih tam a, a luan’ ging hi ee,

ci-in la-in na sa uh a, hih la in pum khat banga na sep kalsuanna leh i manphatna hong lak hi.

Zomite i vekpi-in unau khat i hihna i pau leh i nam i phung te’n hong khen zolo a, unau khat banga kalsuan khawm den thei Zomite i hih nangin tun le zua, lia le taang aw gia bang zuun ciat ni.

Thukhupna:
Pu leh pate ngeina hoihte akem cing ding, a hoih lote puah a zuun ding, Ki-itna, ki pumkhatna, unau khat hihna a kemcing, a zuun ding, Pilna siamna, hatna masawn ding leh a tangzai sak ding, i gam, i lei, i minam bup a khangto sak dingin i biak Pasian in nang teekteek hong lamen hi. Ni tengin thum lo tau lo, ngaklah lo, kitat sat loin, GEEL NI, SEM NI, PUAH NI, ZUUN NI.

Rev. Langh Za Kap
GS, ZZBA
Emmanuel Baptist Church
Lashio