Na ngaihsun kha ngei maw? ~ Pu Tong Seal

Na ngaihsun kha ngei maw? ~ Pu Tong Seal

African Hero

Nelson Mandela in kum 27 sung, a thongkiat khitciang, amah thongsung aa a khia, agal te tawh nasepkhop ding, vaihawm khopding poimawh salo hi. Na hong sepkhop takciang in, a sunglam pan kipuahphatna tampi hong piangto hi. Gal leh sa un, a ki delh delh lai, a pua lampan, kamal tulsawm a ot khiat sang in, a sung lampan kamal 1 bek bek a pau kio pen in, hong man nei zaw ta hi.

Tua man in, ki puahphatna ding, mipi phatuamna ding a deihte in, a sung lam pan hong sep theihding kisam hi. Politics sung ah, gal le sa hi den khol lo thei hi. Lawm le gual in kimat a kul ni zong om hi. Nelson Mandela in a tawpna ciang, nidang aa a galpipa a hi ngei pen mah tawh pahtawina hawm khawm lai hi. Nobel Peace Prize sang khawm uh hi.

Burmese Woman

Aungsan Suukyi zong, Gam sung mipi i muan pha mahmah, suahtaakna leh gamsung khantona ding hong pattahnang i lametpi i Pi pen, tun a gal te tawh, ankuang hong uum theita mawk ee, ci in Kawlgammi leitung khempeuh ten- encik in lung himawh ngeingai uh hi. Aungsan Suukyi in Minister post khat hong ngah aa, parliament innpi te ah na hong sem leh, ama i kamal khat hong pau pen- man nei mahmah ta ding hi.

Opposition party leader min tawh NLD makai aa a pua lam pan hong ot ot kam 1000 a pau sang, kumpi sung aa kam 1 apau pen, thu in kisang zaw ding hi. Gentehna kumpi te in, gamdang mun khat khawng ah Ambasador za khawng tawh va nawl khin leh bel, tua a sepna gam gam neucik khat khawng hi lel in, kawlgam pressure a pia zo khol lo ding gam khawng hi leh bel, kimanna nei khol lo ding hi.

African Woman

Nobel Peace Prize 2004 kum in a ngah, Wangari Maathai in bangci gen hiam cih leh nidang lai in gamsung aa, myonee, pyinee, bahuu kumpi te hoihlo zia gengen aa, ka ot ot lai sang in, tu in Member of Parliament khat ka hih khit ciang aa, ka kamal 1 in man nei zaw tham hi ci hi, kamal tampi ot ot kul nawnlo aa, a kul te igen ciang in, kumpi in hong sepsak hi ci hi..

Nidang in bel, media munci teng Radio, Newspaper, Television te ah kumpi sung makaai te hoihlo na bekbek agen nu hi ing ci. Tun bel a gengen pen hi nawnlo aa, a sem ding pen hi ta ing. Tua hangin, Media te ah nidang ka ot ot dan in, tu in hong za nawnlo hi uh teh. Tun a sem hi ta ing.

NLD bang kimuang pha mahmah napi kumpi sung ah, ei hong represent thei ding om kei leh ei aa ding man nei tuanlo ding hi. Tua bang mah in, i party neih adang tuamtuam te zong ei hong represent ding, kumpi sung ah, a om kei leh ei lungulhna tangtung zo ngeilo ding hi.

Pu Nang Lian Thang leh, Pu Salai Kip (amau tawh ki mu ngeilo hi mah tase leng) Amau zong, amau om na le circumstances tuamtuam te hang in, nasepna tavuan a kiguatna zong om thei kha mah ding hi. A hihangin, amau te pen, ei mipi te ii Voice (i aw) ding, ideihna a genkhia ding te, a sung khia ding te hi. I lungkim lo na te zong hong sunkhiatsak, hong pulaak sak ding te hi.

Mipi lungulhna te hong puaksak, hong puakpih ding mi, koi koi ah kisam hi hang. Tua bangmi a om lo ciangin, i ot ot, i paupau, i phun phun, i ciakciak te huih sung ah bei lel a, mawkna lel thei hi. Thau hui, thau tang lawng tampi tawh i ki kaap sang in, kamal khat hong genkhiat sak kiau dingmi om leh nakpitak in man nei zaw thei ding hi. Tua te phawk ni in, mi khat pepeuh pen gal le sa in muh sawm pahpah kei zaw ni. Pu Tong Seal