Nang hilecin Na-bangcih tammaw? ~ Pu Zokhai

Written on 20 December 2008
Sanggamte,
Tuni ka-lungzuang simsim ahihman-in Zonet pawlmi sanggamte’ kiang-ah ka-lungngaih thu-khat hongsung nuam-ing, banghanghiam cihleh mihingte kibanglo, meelkidang, ngaihsut kidang, pianzia-zong kidangkim hang-a, tuasungpan-in thumaan midikte’ kibatna khat om-in, tua-pen zuaugen ngamlohna ahihi. Hih kongsunsuk thu-pen nang mahmah ding-in kibulh-in, na lungsim sungbek-ah thukhenna nabawl inla, na thukhenna-pen Zonet pawlmite’ kiang-ah pulaak nawnkei lecin cih hongngen masa nuam-ing, banghanghiam cihleh nang’ thukhenna-pen nang’ thukhenna bekmah hi-a, milip’ thukhenna hilo ahihman-in milip’ thukhenzia dingtawh saaikaak-in “Kei hitaktakleng bangkacih tammaw?” cihtheihding kisinna ahihi.

Athu Khatna:

Tuma kum 2 leh ni 48 hunlian-in Jalan Choo Cheng Khay leiseek innpi inndei thumna, varanda-ah ding-in ka-om laaitak phone hongging-in sanggam Zomi khat-in,

“Halaw, nang kua-na?”  hongci ngiau-hi. Keizong,

“Lawm, nang kua’ phone ahopih ahia? Hih phone Zokhai’-a hiven. Kua-tawh kiho-nuam nahia?” Kacihciang-in amahzong kisuang simsim-in honghopih zomhi,

“U Khai, hehpihna-tawh ka-zii nausuakding nongna-buaipih maive. Keilah passport-tawi hilo baan-ah tua vabuaipihleng ka-nasep taanding-a, ka-zii ka-ta-tawh neektawmding nangawn haksa luading ahihteh, honghuh hamtang theilecin!”

Kadawngkiik pahhi,
“Na-lawmnu koi-ah om ahia? Nongpaisak thei-tam ahihkeileh kei’n hong ladingmaw?”

“Hong paisak ning-ei. Nitaaklam nai 3 pawl-in!”
“Hoihpah-ei, lawm! Na vaansak ning-ei!”

Hih-pen muhlehtuah (experience) tampi lak-ah 3 hi-a, makaai upa panmun aleen mi khat’ zawhding akilawm thu ahihi.

Tua nitaak-in azii hongtung-a, aziingciang ziingsang-in Hang Tuah Maternal Clinic ka paipihhi. Azii-in UN laai-lah neilo, passport-lah nilo ahihman-in hap katuak dikdek-a, tua-ni mah-in UN-ah paitohpih pah-in haksatna’ tungtawn-a UN laai ngahtheih nading ka-phuut sak-hi. Pasian’ hoihna akicin mahbang-in UN laai ngahpah, Hang Tuah Clinic pan-in GH Maternity-ah, nausuak theita. Sum 1,100 beidingpen UN laai’ hang-in 400 tawh lemtaang. Nausuah khitteh ciahpih, Zomi Innpi-ah giaksak, nau-in ci-eng (jaundice) hongnei, zatopi paipihkiik, daatmei-tawh hong emsak-uh, ni 3 khitteh ciahpihkiik, hearing test vabawlpih leuleu, immunisation va kisutpih; keima’ ta mahbang-in ka-itna leh ka thatangte siitlo-in nuam kasa mahmahhi.

Kha 1 khitteh nau-leh nu-tawh UN-ah apa-uh luutpih. Vaaiteng alem khitteh apa-uh’ nasepna-ah a-innkuan-uh’n vaciah uh-a, amaute leh keimah ka-lungdam mahmah-uhhi.

Tuabangdaan vaaitampi ka-buaipih kawmkaal-ah thu kizaaklohzong sawt, amauzong abuainateng mahtawh honghopih mannawnlo-in gam 3-na na-leengkhin uhhi. Atunna-uh gam 3na-ah kei hong paakta Zomi khat-tawh kimu uh-a,

“Zokhai na-theikha uhhia?” acihleh,

“Theimah hang-ei, Zomi kipawlna daankhat bawl-in nai-ngan-yey tamaa khat-hi. Laai mite’ khawng langpanden pongmawk-in Zomite’ hamphat nadingteng khaaktanden mipoi khat-hi, hopihzong hopih ngeise-khang.” cihi.

“Nai-ngai-yey tamaa nacih, amah’n bangseem ahia? Kei’ zaakna-ah eimite UN laai angah theihna ding-in ahihtheih zahzahtawh huh, cina, dongtuakte ahihtheih zahzahtawh panpih cihte zabek veng-in tuate-lah nai-ngan-yey kicilo ahihteh, a nai-ngan-yey sep khatbeek honggen sin-awle!”

“Tua mihingpen migina mahmah hikei, zong kikup taakkei. Ama’ innkuan, azii atate nangawn huhzolo, sum thalawhlo, naseem nuamlo-a minam vaaipeuh aseem hilel, mi thadahpi khat-hilel in-ah, gennawn dahmai-ni!” cihsan ziau-hi.

Tua mipa-in gam 3na pan-in phone-tawh hong hopih-a,
“U Khai, Pasian’ huhna-tawh gam 3na na-tung ung-in, kong zaaksak manlohzong kisuang mahmah ing-ei. Ahizong-in nong huhlaai kuul-inciai. Ka naute nupa Malaysia na-tung uh-in UN aluut theihnading nangbekmah hong muang ing-ei.”

Nang hilecin na-bangci dawntam?
Zomi Innpi sung-ah akisuang masa-pen Pasian’ Kammal: “Nangmah Na ki-it bangkeek-in Na-veengmi It-in!” ahihi. ZAM Moto:”Itna Sung-ah Mapankhawmna-in Gualzawhna Hongtun Khinzo-hi” (Going Hand In Hand In Love Has Brought Victory”

Kei’ dawnna: “Aw, Topa’ Thupha hi-ei. Na naute nupa Zomi Innpi hongpaisak lecinmaw.”

Aziingteh hongpai uhhi. Dengkil Zomi Giahphual-ah ka-paisak pah-a, UN te-in mi 178 alaakna lak-ah kihelthei uhhi.

Athu Nihna:

Passport neilo Gamdang mite kikhumna phual-ah ka-om laaitak-in thongpi pan-in Zomi tampi hongtungte’ lak-ah khat-in,
“Khai, keipen gamgi hongkipuak zenzenleh KL paikiik nading ahihkeileh Kawlgam ciahnading sumneilo, hong samding mi-lah omlo, hong vaaihawmsak dihve!” hongci ngeungau ahihman-in,

“UN na-lungluut hia-leh? Sumlehpaai lamsangbel keizong ahicipi hi’ng-in UN lamsangbel hong huh thei-ing.” kaci-hi.

“Tua ahihleh nuam mahmah ing-ei. Ka taangthu dingzong honggeelsak inla, gamgi hongkipuakloh nading inzong hongvaansakpah mai-ou. Gamdangkhawng tungleng tuateh lungdam hongkiko kiikzo saamlodia.” hongci laaizanghi.

“Lungdam kikoh tangtang cihzong ngiahsun ngeikeng-e, zong lamen tuankeng, na vaai alem theihding thupi” kacihsanhi.

UN uliante honghawh ciang-in kagenhi. Topa’ hoihna akicin mahbang-in vaaiteng lemthei-a, interview dingbang kisinsak ngiatngiat-in hong lawhcing peetmahhi. Sawtlo-in camp pan-in gamgi kipuakding haanciam leuleu-hi. Tua hunsung UN minsaanna angahsa mite gamgi kipuakloh ding-in UN te-in Immigration te’ kiang-ah thuphah aneihsung ahihman-in tua-pa gamgi kipuakding immigration te-in phallo uhhi.

Ahizong-in “haksatna nei-ing, hong gensak tapeuh-in” hongcih tantan ciang-in UN te ka hopih-a ‘azii atate a-vaan nading van-gikpi aneihlam deihtak-in kagensak ciang-in kaal nihna-ah gamgi kipuak-a, tua-pan KL atunkiik ciang-in Zomi pawlkhatte’ kikhopna-ah,

“Topa hoihhi! Ka thungetna hongdawng tawntung-in thongsung, haksatna sungpan tu-in hong honkhia-hi. Sawtlo-inzong gam 3na hongkipuak laaidinghi. Thunget haat peuhlehang Topa-in hongdawng denhi. Zokhai bangpen camp sung-ah om-om lel-in kei’ sang-a luut masazaw, kei’ sang-in suakta nunung zawhi. Pasian’ kammal, “amasate nunungding, anunungte masading” acih maan mahmahhi. Mawhna nei-a tutanvei asawtzong hilel dinghi. Ahihkeileh akhuak maan nawnlo-a cap sungkhawng nuamsasa himai inteh, keibangbel UN ka-ngah phet-a pusuahding bekmah thunget-a ka-neihhi.” ci-in teci-pang bilbelhi.

Sawtlo-in camp pan-in ka suakta-a, Zomi mipil misiam, itnanei Zomite-in ZAM phut-in tualaai-ah zattangzaang khatding-in hongkiseh ahihman-in lawptak-in kaseemhi.

Ni-khat phone hongluut-a,
“Khai, nang hongdammaw? Nuamtak hang-ei. Nong huhdingmah kisam zeel ing-ei. UN-ah kapai sim-in ‘Kongsap-uh na-ngaak lel-in’ hongci denkeei-in hong hopihsak tapeuh-ou!” hongci-hi.

Nang hilecin na-bangci dawntam?
“Zomi Innpi-ah hongpai photphotve, vaaihawmtheih a-omleh i-vaaihawmkhawm keidiam.” kaci-a, amahzong honghawhhi. UN phualpi-ah ama’ file malsimtawh paito-in kavagenpih-a, kaalkhat khitciang-in gam 3na’ ading interview bawlpahhi. Dotna adawnzia kipelhsak ahihman-in lawhsamhi. Homeland Security-ah appeal kagelhsak leuleu-a lawhcinghi.

Athu Thumna:

Gam 3na khatpan-in mi khat-in honghopih-a, “Zokhai, ka sangamnu banglampi banglampi-tawh UN na-luutsak zawhleh US tuul nih tuul thum hongpia dinghi’ng, hehpihna-tawh navaan-in” hongci-a, keizong, ” Tuabang-in sumtawh vaaihawm ngeikhang-e, na haanciampih ning-in i-lawhcinleh kei’ ading hilo, Zomi Innpi’ ading tutphah dawhkaan khatpeuh hong leisak lecinbel na-minzong kiciamteh ding-a, thuphabawl suakzawding naive.” kaci-hi.

Sawtlo-hi, tua asanggamnu UN luuttheihi. Tua gam 3na-a numei-in dangka 100 hongkhaak-a, ZAM laaibupi sung-ah kiciamtehhi. Anungciang-in tua numei-in,

“UN na-luutnop uhleh ZAM te sum 100 khawng pia-peuhle uhcin luutthei lelnucia.” acihthu kazaak ciang-in ka hopih-a, “Sanggamnu-aw, na-paudaan kilawmlo ahihman-in nasum hongkhaak kiikning, ahihkeileh nasanggamnu napia ning-aw” kacihleh, “Na piave, UN ngahnazong no’ hang hituanlo lel-a, Pasian’ Thupha hilel hiven” hongci ahihman-in ka-pia kiik-hi.

Sawtkei, Homeland Security te-in tuanu’ sanggamnu nolh uhhi. Tuaciang-in phone hongluut leuleu-a,

“Sia Khai, banglehbangleh nong huhna-mah kisamzeel ung-ei. Sanggamnu’ vaai na-vaansak dih-ou. Abeisa thute maaimang saklel-in, banghanghiam cihleh mipicing te-in thusiate ciamtehteh selo ahihteh nangzong hongmuang lel-ing!”

Nang hilecin na-koici dawnkiiktam?
“Aw, ei’ huhtheih a-omleh i-haanciam keidiammaw!” ci-in Homeland Security-ah appeal ka-khaak leuleu-hi.

Atawpna:

Camp sung-ah sawtta kahihman-in upa-in hongkikoih-a, anbeelto dingte keima’ sehloh-in kuamah kimawkguan theilohi. Kawlte khat kaseh hi-in, tuapa-pen gamgi kipuakding hita-hi. Tuapa beelto-a kakoih sung-in an 4bang 5bang’ khamding hongpia den-a, Zomi pawlkhatte piaden kahihman-in nuamtuam mahmahhi. Zomi khat-in ngetcihtak-in hongngen ahihman-in Kawlpa’ mun-ah kaguanghi.

Sawtkei, kaalnih khawngbek-hi. 4 leh 5′ khamding anpen nih’ khamding hongkipuak ahihman-in ankuang ka-uumpihtezong nuamsa lo-in tua beeltopa’ kiang-ah avagen ciang-in beeltopa-in, “Anbuuk vaaihawmna hongsai kei-un. Keima’ thuthu ahihlam theilo-maw?” ci-in na-hapgawp zawzenhi.

Sawtkei, tua’ zawh ni 3 ciang-in Hassan akici Kawl Muslim te, mi-that, kanza-zuakzeel mipa-tawh hongkitawg ahihman-in palikte-in anihtuak-in phualpi-ah puak uhhi. Tua laai-ah palikte nangawn-in hongzahtaakbawl uh-a, tuami nihte: Zomi beeltopa leh Hassan’ tungtaang kei hongdong uhhi.

“Muukmulpa-aw, hih mi 2te Kajang Thong puakding hi’ng. Nang bangcisa nahiam?” hongci-hi. Tuaciang-in beeltopa-in, “U Khai, nang’ cihcih palikte-in hong mangding ahihteh honghuh-oumaw” ci-in akhitui luangsak-hi.

Nang hilecin na-bangcih tammaw?

Palik ulianpipa’ kiang-ah,
“Hih beeltopa-pen ka’ sanggam hi-in, Hassan-pen miciteng anawngkaaisak khat-hi.” kacih ciang-in,
“Anihtuak-in khial-uh ahihman-in beeltopa Block kheekding, Block C puakding. Hassan-pen Kajang Jail puakding, mate!”
“Aw!” Kacihleh Hassan-in,

“Muukmulpa, na kidawm-ou. KL khuasung-ah Hassan atheilo omkenteh. Camp pan na-pusuah hunhun-in kaal khatvaal KL ah hing keiniteh.” hongci-hi. Tua khitzawh kha 2 ciang-in tuapa gamgi kipuak-a, KL apaikiikna lamkaal-ah mite-in thatlum uhhi.

Beeltopa Block C akipuak ciang-in beelto ding-in Zomi khatmah ka’ guanghi. Sawtlo-in Block C beeltopa mitawh kitawng leuleu-in Block A hongkipuak leuleuhi. Tuaciang-in beelto athak ka’ guanpa phin leuleu-a, “Kei beelto luui hing. Nang kua’ hongguan ahihiam?” acihciang-in beelto thakpa-in “Kei U Khai’ hong sehhi” ci-hi. Tuaciang-in,

“Kuakua ka’ kihtaak omkei, Malaysia-ah Gangster group-a akihel Zomi keibek hi’ng. Tu-inzong samziauleng camp nangawn hongluh unteh. Zokhai lah kihtakeng, Kawlkhai lah kihtakeng” ci-in hong kilaai-uh, akiim apaam-ate inzong vuagawp. Palik te-in manleuleu, Kajang Thong puakdingvaai hongdong leuleu.

“Janggut, hihpa anihveina-hi, Kajang Jail puakding nong-awi hialeh?” Beeltopa-in, “U Khai, Jail puakken ci-ou, nang cipeuhlecin hongmanglel unteh, ka-paukhial a-omleh hongmaaisak inla….”

Nang hilecin na-bangci dawntam?
“Block na-kheek buangkeileh Jail bel hong puaksak keihamtang-aw. Khangno lungsim tengtawh akitawngpak hi-in, nong-telsiampih na’ng-in hong thuum-ing,.” kacihciang-in Jail puaklo-in Block B puak-hi. Tua nangawn, “Zokhai’ hang-a Block hongki-kheeksak, naki ngaihsun tadihhen.” cilaai-hi.

Hihbangdaan thute tamsimsim ka-tuakkha khin-a, ahun laaitak-in dawnkiik pak nadingpen awmbing zotham saamhi, ahihang-in Zomi Innpi-a akisuang masa: “Nangmah Na Ki-it bangkeek-in Na-veengmi It-in!” pen ka-khahsuah loh nading naakpi-in ka-haanciam tawntunghi.

Nang hilecin na-bangcih tammaw? Na-lungsim sung-ah hongdawng inmaw!

Lungdam!
Zokhai