Naak nak na cia ~ Hau Za Cin

Naak nak na cia ~ Hau Za Cin

A lawmpan ci mawk ahih cianga amah zong a cihna ding theilo in, “I ihmut suak hiven,” ci suk ziau hi. Naksia pen naak noploh mahmah a, a kiang vuah ki ihmu thei vetlo hi. Naak ihmut theih kei leng naak noploh semsem a, naksia kiang peuhmah ah lup khak ding ki naak lau mahmah naak hi. Naksia lo dingin naak kisin mahmah in; kisin theih ahih leh.

Naksia i cih bang hanga om hi ding hiam cih ka naak theihloh pawl tak hi. Pawlkhat gen ka zakna ah bel lup ciang vandak lua in kamka kha ci uh hi. Tua cih dingin lah a vandak kamka khempeuh naak naksia lua tuanlo hi. A sawi lup pawlkhat zong tutphah tung khawngah sun kimkim in naak ging daapdaap uh hi. Khuplup ta leh naak ging, thallup taleh naak ging uh hi. Lupdan tawh kisai mah leh kisai khinlo zong hikha ding hi. Tua ahih manin kuate naksia a, kuate nak ging hiam cih theihnop huai mahmah hi.

Bawng zong thallup cih om ngeilo napi nak ging gamgam thei hi. Vok zong a ihmut ciang nak ging gamgam hi. Nawine ganhing namte bek nakging hi ding hiam cih kan huai mahmah hi. Whale ngapi pen nawine ahih manin a ihmut ciang (a ihmut uh leh) a nak ging tam cih theihnop huai leuleu hi. Kel leh Sakol te pawl a nak ging tam kitheilo a, a thei om pelmawh ding hi. A theite in hong gen leh naak zaknop ding hiven.

Nungak helna ah, tangval helna ah ihmu kha in na naak naksiat luat leh na helpa, na helnu hong muh dan kikhel thei ding hi. ‘Naak naksiat buang ei’ ciin, ‘cidamna kisam pawlkhat om hi inteh’ hong ci kha ding hi. Na ihmut khak, na lusuk khak lehzong naak naksiat sawm kenla, kidawm takin nak dildil zaw in. Mi inn ah na hawh ciang na lusuk khak leh na inntekte in hong lupsan kha ding hi. Hong lupsan kei zongin na naak daapdaap nuam sa mahmahlo thei uh hi.

Tua manin ihmut nuam, mangpha cih pen i kikhen ding ciang kikhakna kammal hoih mahmah hi a, kivaikhakna kammal khum mahmah ahi hi. Ihmut nuam in ihmu leng ki naksia daldal lo a, ki ihmusip thei hi. Mangpha cih bek sangin zong IHMUT NUAM cih kivaikhakna pen a manphazaw tawh kibang phial hi. Ihmut nuam omlo in MANGPHA kiman theilo ahih kik manin ‘mangpha’ mah kivaikhakna kammal zat tangzangpen hong suak leuleu hi.

Zingsang na thawh ciang na lawmte in “naak nak na cia” hong cih peuhmah leh na ihmut nuamlo, na mang pha lo, mangpha manlo cihna hi ding hi. I khan tawntung zan sim i laikhun tungah ihmusip thei tapeuh le’ng naak nop ding hiven leitung. Tua dingin sum, van, pilna, cidamna, etc… kicing tak neih kisam zel. Tua khempeuh a nei kim sitset leitung ah om theilo; khat nei napi, adang khat neilo citciat… Topa Pasian bek in tua i neihloh te mun luah thei hi; He is omnipresent. Tua mun Topa na pia hiam? Hau Za Cin