Na Thei Na? ~ Dr. Dongno

Na Thei Na? ~ Dr. Dongno

ZOPAU APAU MI TAM PEENPEEN – Chin State sung aa om pau nam tuamtuamte lak pan — Dr J. Suan Za Dong

Zomi pawl khatin midangte pau khat pepeuh mi tampi-in azat pau, athupizaw sa kha thei uh aa a lungsim tawng uah piimuh lua kha thei uh hi. Tua ahih manin mi lak ah mai-ngaltakin Zopau pau iau-iau nuam/ngam lo-in midangte pau khat tawmtawm pau thei le uh gualtungtuanna khatin la kha-in zang nuam mahmah sawnsawn uh hi. Hih pen, thu kan lo, thu theih lohna hangin “mi-nuai-ah-om” kisa kha-in, amah-leh-amah kiniam-ngaihsutna ahi hi. Hi napi, nei napi ahih lam, aneih lam kithei lo ahih manin lungmuan lungnop hamphatna tampi taan hi. Ahehpihhuai ahi hi. Tua bang mite-in ‘Khamtung gam ah mi atampeenin azat pau, Zopau ahih lam’ atheih ding uh i deihsak hi.

Kampau-in khat leh khat ong kiho thei sak, ong kilamnaih sakin, ong gawm khawm aa minam khat ong suak sak hi. Awsuah/awkaih kibang lian takei leh i zat kammalte kibang peuh leh minam khat i hihna kilangin ong ki-it sak hi.

Tu-in, ‘pau’ dialect, cih kammal leh ‘awkaih/awsuah’ accent, cih kammal limtak i khen tel theih ding thupi masa hi.

Pau nam tuam i cih ciangin, ki hopih thei lo, i gen nop thu kisang thei lote pau kibang lo, pau ‘dialects’ nam tuam ciat ahi hi. Gtn. in Zopau leh Paletwa Khumite ‘pau’ kibang lo, ki ho thei lo i hih manin, ‘pau nam tuam’ tuak ahi hi.

Ahih hangin, awsuah/awkaih akilamdang bek pen, ‘pau kilamdang’ ci-in i ngaihsun khial kha den hi. Gtn. in, Tedim, Tonzang, Cikha gam sung aa om awkaih/awsuah tuamtuamte, “ pau” tuamtuam bang khatin i ngaihsun kha hi. Hihte “pau” -dialects, tuamtuam hi lo-in, “awsuah/awkaih”, accent, kilamdang bek ahi hi.

Tedim, Tonzang, Cikha sung aa om mi khempeuh leh Falam gam aa om, Ngawn mite tawh ( anuai ah acingzawin) ‘pau’ kibang, pau nam khat – Zopau, azang khawm ihi hi. I pu i pate tanglai pekin pau nam khat, awsuah/awkaih kibangin na pau uh hinapi, Ciimnuai pan sak leh khang ah mual leh guamin ong halin kikhenthangin mun tuamtuam i tun ciangin damdamin, i awkaih/awsuah ong kikheel hi.

Tua awsuah zui-in, “minam” tuam kisa kha-in minam (minamkee) ci-in min tuamtuam tawh, Teizang, Khuano, Saizang, Sihzang, Losau(Lamzang), Zo, Thahdo, Paihte cih bangin, “minam” tuamtuam i kisa kha hi. Ataktakin, minam tuamtuam hi lo-in Zomi nam khat, awkaih/awsuah, accent, tawm a kilamdang ciat tawh pau nam khat – Zopau, apau i hi hi. Minam khat i hih manin, i min, i tangthu, i la, i ngeina, i thu ngaihsut zia, i pom daan, leh i tat zia zong kibang hi.

Chin State sung i et ciangin, subdivision dang khempeuh amau subdivision sung ciat ah pau nam tuamtuam om uh aa, tua paute khat leh khat kibang lo-in amau pau ciat tawh kiho thei lo uh hi. Tua ahih manin tua subdivision sung mahmah ah ‘minam’ leh ‘pau’ atuamtuamin ki khen sawn lai uh hi.

Tedim lehTonzang subdivisions gam sungteng ah i vekpi-in kiho thei i hih ciangin, ‘PAU TUAMTUAM OM LO hi. Awkaih tuamtuam tawh Zopau apau ciat i hi hi. Hih pen Pasian ong piak hamphatna thupha lianpi khat ahi hi.

Hih hamphatna i tel kim ding thu phamawh khatin i ngaihsun ciat ding hi. Limtak ngaihsun lopi-in “awkaih” ( pau hi lo) zui-in “ minam” tuamtuam bang khatin i kingaihsutna pen a kiKHIAL mahmah, a MAAN LO ngaihsutna ahi hi.

Tedim-Tonzang-Cikha sung ah, “minamte” leh “kampaute” cih ding OM LO hi. Minam khat BEK, (Zomi), — awsuah, awkaih (‘kampau’ hi lo) kilamdang” i cih ding ahi hi. Gtn. “Khuano minam leh Khuano pau” i ci thei zeel hi. HI LO hi. ”Khuano leh Khuano awsuah”, ahi hi. Tua mah bangin, “Teizang leh Teizang awkaih”, “Sihzang leh Sihzang awsuaih” AHI HI. ( awkaih leh awsuah cih kammal khat pepeuh i zang phot ding hi)

Minam’ tuam kisakna-in i lungsim sung ah ong kinai sak taktak zo lo-in mi dangpi bangin kingaihsunin kikhenna kipatna bulpi ahi hi. Minam khat bek i hihna leh “awkaih/awsuah” tawm kilamdang bek ihihna sang thei kim lehang i lungsim ong kinaizawin midang ihih lohna leh nam khat sa khat ihihna thahat ong kipan ding hi. Ahi lopi, “tuate minam” ci-in, “tuate pau” i kici hi. Hih pen limtak i ngaihsut lohna leh i tel cian lohna hang hi aa “ong khen kham kammal” ahi hi. Bangzah ta-in ei leh ei kiliam suah, kisiat suah ihi hiam; i supna lianpi khat ahi hi.

Ahi lopi, amaan lopi, tua bang ngaihsutna hangin i kikhen thaang hi. Unau khat, sanggam khat, bawng khat, minam khat – Zomi ahi kimlai, pau kibang khat awsuah kilamdanna bek tawh, pau nam tuamtuam kisa kha-in minam tuamtuam bangin i kikhen hi. Hih ngaihsutna pen Zomite adingin asia mahmah, gu, ahi hi.

I tu i tate, i u i naute, i lawm i gualte kihilh sawnin, sang leh pawlpi tuamtuam ah zong siate-in hilhin, aneu alianin i theih kim ding, i pom kim ding thuphamawh khatin i ngihsut ding hoih hi.

Tu-in, pau nam khat pepeuh azang mi phazah igen ciangin haksatna tampi om hi. Tua lian study abawl ki-om nai lo ahih ciangin data om lo hi. Tua baan ah akibawl hangin zong maan lianin kingah thei lo ding hi.

Tua ahih ciangin, hih study, sung ah, pau nam khat pepeuh i gen ciangin, mi khatin, pau dang khat apau theih hangin, a inn sung ah a zat anu pau azang in kisim hi. Gentehna-in, Zotung pa Haka pau a pau theih hangin, Zotung pau leh Haka pau kibang lo-in, pau nam tuam tuak ahih ciangin Zotung pau azangte sung ah ki koih hi.

Tua mah bangin, Khualsim pa khatin Laizo pau a pau theih hangin inn ah azat a nu pau Khualsim pau azangte sung ah kikoih hi. Banghang hiamcih leh, Khualsim leh Laizo pau pen awkaih, accent, bek kilamdang hi lo-in pau nam tuam tuak ahi. hi. Ahih hangin, Zahau pau leh Laizo pau pen accent bek kilamdang, pau nam khat kici thei ahih ciangin tuate, Laizo pau azangte sung ah kigawm hi.

Zopau pen avekpi-in akibang hi aa, awkaih bek kilamdang ahih ciangin, Zomi khempeuhin Zopau zang khin ahi hi.

1. ZOPAU : TEDIM, TONZANG leh CIKHA GAM : Miphazah (96,000+32,000+12,000) 140,000. (2013 census).:

Kumpi-in Tedim/Tonzang/Cikha gam sung ah ‘pau’ zui-in mi ‘nam’ 10 kiim omin ong ciamteh KHIAL hi. Teizang, Saizang, Losau(Lamzang), Zo, Sihzang, Khuano, Phaileng, Hualngo, Paihte, Thado, Dim, cih bangin ‘pau’ ci-in ‘awsuah’ tawh ki zui-in ong khen hi. Ataktakin, ei mi upa pawlkhatte mahmahin, amau ngaihsutna bangin ana genna hang uh ahi hi. (Tedim pau ong pian khiatna-JSZD) Tua upate-in” pau” leh “awsuah” na khentel thei lo kha uh hi.

Hih pen kiKHIAL hi, MAAN LO hi. DIK LO TAKTAK hi. Tua bang aa ong kikhen ciangin, ei mahmahin zong limtak ngaihsun lo-in, ‘pau’ tuamtuam ci-in, tua zui-in ‘minam’ tuamtuam (minamkee tuamtuam) mah ikisa KHA hi.

Hi lo hi. Ataktakin atung ah i gen sa mah bangin, tua ‘pau’ icihte, ‘pau nam’ tuamtuam hi lo-in, khua khat leh khua khat “awkaih / awsuah” daan, “accent”, kilamdang hi bek hi. Zat daan tawm kilamdang ciang bek ahi hi. I vekin i kithei khin aa pau nam tuamtuam hi peuhmah lo-in, pau nam KHAT (Zopau)BEK azang – i awsuah kibang lo BEK ahi hi.

Tua ahih manin, “Kamphen kul lo” i kici hi. “Ki thei kim” cihna hi aa, “kibang” cihna zong ahi hi.”Kibang” cih ciangin, “nam khat “ ihi hi. Tua ahih ciangin, kamphen kul lo, pau nam khat – Zopau, awkaih, accent, atuamtuam ciat tawh apau ihi hi.

Mangpau, English zong tua bang ngeingei ahi hi. American leh Canadian-te nangawn accent, ‘awsuah’ kilamdang lai uh hi, gtn., “ … out in the boat”, ci le uh awsuah kilamdang pah lian hi. Amau zong ki ciamnuih thei uh hi. British leh American-te ‘awkaih’ kilamdang aa, adiakin, kammal khat pepeuh vowel khit teh ‘r’ in a zuih ciangin ahi zongin, ‘r’ tawh a tawp nakleh kilamdang pah lian hi. Kammal zat zong akibang lo tampi om hi. Gtn. khat, Brtish-te-in ninpa acih uh ciangin, ‘rubbish’ ci aa, American-te-in ‘trash’ ci uh hi.

America gam sung mahmah ah, Northern leh Southern-te awkaih, accent, kilamdang pha mahmah aa khatveivei amau-leh-amau nangawn kitel lo thei uh hi. England mite pau leh, South African-te, Australian-te awkaih, accent, zong atuam ciat ahi hi; kibang lo uh hi. Sihzang awkaih, Saizang awkaih, Teizang awkaih ih cih bang linlian ahi hi. Pau nam tuam hi lo-in “awkaih”, accent, kilamdang hi bek aa amau zong “kamphen kul lo” pau nam khat – English peen, awkaih, accent, atuamtuam ciat mah tawh apau tek uh ahi hi.

Kawl pau zong, Yangon khuasungte awkaih leh Kawlpi kiim leh Zaw-te awkaih, accent kilamdang mahmah hi. Yangon ten buh leh meh acih uh ciangin, ‘htamin hin’ ci-uh aa, Kawlpi kiim leh Zaw-te’n, “htamang haang” ci uh hi. A dang tampi om lai hi. Ahih hangin, Kawl pau mah hi veve hi. Kikhen tuan lo uh hi.

Tua mah bang lianin“ kamphen kul lo” a kici teng kuakua i pau ciangin “PAU TUAMTUAM HI LO-in awkaih, ‘accent’ kilamdang tawh “ZOPAU” NAM KHAT BEK AZANG, Zomi , MINAM KHAT BEK ihi hi.

Tua ahih ciangin Zopau thu atel mahmah J H Cope Topa-in, Tedim, Tonzang gam ah i pau khempeuh pen, Ukpipa tam sakin,“Kam Hau Dialect” ci-in pau nam khat bekin na ciamteh aa, a mite zong “Kam Hau mi” ci-in “pau nam khat – minam khat” bekin I hihna na ciamteh hi.

Tua ban ah anuai ah i muh ding mah bangin, Falam gam sung aa om Ngawn minamte, ei pau tawh kibang aa ‘awkaih’ tuam zang uh ahih ciangin, Chin State sung ah Zopau azang mi (140,000 + Falam gam aa Ngawnte phazah) om hi.

Zat daan kilamdanna nengneng bel om mah hi. Gtn. in, (shall, will) pen, ‘di’, ‘ing’, ding, ‘tu’, “vai” cih bang; (‘Th’) pen ‘s’ aw in Teizang awsuah tawh kizang aa, (not) pen, ‘o’, ‘bo’, lo’, cihbangin aw kinai mahmah vive-in kizang hi. Exceptions tawm nono akilamdang bel om hi. Na-te min, nouns, pawlkhat mun khat leh mun khat lawh daan kilamdang pen leitung pau khempeuh ah om kawikawi lel hi. Gtn. Thuklai ah vatawt pen ngumpai ci-in, Tungzang te’n mawza khetuam (socks) pen, ngalzial, cihbangin a nengneng om kawikawi saam hi. Atung aa British leh American-te’n ‘ninpa’ acih uh atuam tuak ahih bang daan mah ahi hi.

Tua ciangin, Teizang, Sihzang, Dim, Phaileng, Paite, leh Khuano awkaihte aw neemin aw zol tawh, kaai pian uh ahih manin, America gam Southern accent ‘awkaih’ daan tawh ki valaak pian aa, Saizang, Losau/Lamzang, Thahdo leh Zo awkaih peen British accent ‘awkaih’, daan tawh ki valaak hi. “British accent, American accent” kici bek aa pau nam tuam hi lo-in English, pau nam khat ahih bang mahin, Tedim, Tonzang leh Cikha sung aa awsuah teng pen paunam tuam hi lo-in “awkaih”, accent, tuamtuam tawh Zopau nam khat bek kipau ahi hi.

Falam gam sung ah Ngawnte tawh zong Zopau i zang khawm lai hi. Ngawn awsuah peen, Saizang, Teizang, Sihzang awsuah leh kammal kigawm khawm ahi hi. Kamphen kul lo hi. Kammal bulpi kibang hi. Gtn. “Ong phawk mahmah ing” acih uh ciangin, “Phawk mahtak ing hi” ci ngeu uh aa, Zopau kam ciik mahmah zang uh hi. Tua ban ah, Thawmte, Guite, Samte, Dopmul, Thangsiah, cihbangin i behte vive ahi uh hi. Tua hangin amau zong Tedimmi mahin kingaihsun zaw uh aa, Falam minam dangte-in zong Tedimmi mahin tuat uh hi. Tua ahih ciangin, Cikha khuakhung pan Valung khuataw ciang kamphen kul lo-in, Zopau khat bek kizang hi.

Kale-Kabaw kuam sung leh Tamu kuam ah Chin State sung aa om Zomi sangin Zomi atamzaw, >140,000, om hi.Tua ci leng, Chin State leh Kawlpi kuam sung ah
Zomi vekpi : 140,000 + Ngawn phazah + > 140,000 = 300,000 val pha hi.

Metropolitan Yangon khuapi ah Zomi 7,218 pha hi.(Prof. C Tnang Za Tuan May 2018)

India gam Manipur leh Mizo gam, mun tuamtuam ah zong Zopau azang, Paite, Gangte, Thado cih bang leh Thangkhal, leh Teizangmi ci-in Kawlgam aa zah, 300,000 mah pha dingin ki um hi. Tuate-in zong amau accent, awkaih tek uh tawh Zopau zang ciat uh hi.

KUMPI SANGTE AH ZOLAI KISIN – RADIO leh FM ah ZOPAU

1962 kumin U Ni Win-in ong uk zawh Chin Affiars Council-in Khamtung gam ong uk ciangin,

1. Sagaing, Ywa Thit Gyi, Taing Yintha Phwenhphyuye Collage Sangpi ah 1964 kum aa kipan, tuni ciang dong Zolai leh Zopau kisin hi.
2. Maymyo Defence College ah zong Zolai 1999 – 2000 kisin hi.

3. Mandalay ah 2000 kum pan kipan No. 1 Tatmadaw broadcasting panin Radio leh FM ah tuni dong nisimin nai khat sung Zopau-in thupiang tuamtuam leh Zola kikhah khia hi. Program pen Myawady News tadensa sung ah ki suak sak hi. (Sia Nang Khan Lang, Haka Infantry Btn..May, 2019)
Ahih hangin, tuciang dong Kawlgam sung ah mimal 300,000 valte zat Zopau MRTV ah hun om nai lo-in thu lamdangpi khat ahi hi.

4. Haka khuapi, Galkap Kha Lah Ya 266, ah 2003 kum pan kipan tuni dong kumsimin galkap 30-50 ciang Zolai kisin sakin asiam deuhte khasum Ks 20,000 kikhan hi. Sangnaupangte’n hanciam mahmah uh hi.
Zomi pen, amimal in tam, India tawh kizopna ol, sumbawlmi tam, mi tampi-in Zopau zang uh aa, Zopau sin nopin theih baih kisa hi.

KAWLGAM leh INDIA GAM AH ZOPAU AZANG , a tomin et kikna : –

1. CHIN STATE Tedim, Tonzang, Cikha ah……140,000 + Falam Ngawnte
2. KALE-KABAW leh Tamu kuam sung ah …>140,000 (sang tamzaw)
3. YANGON…………………………………………..7,218 ( avekin Zopau)
4. KAWLGAM ah avek aa gawm : …………….300,000 val.
5. India gam Mizo/Manipur States ah , Paite, Gangte, Thado, Thangkhal, Teizang 300,000

Tua ahih ciangin, Zopau azang Kawl gam leh India ah avekpi-in : 600,000 val pha hi. Hih mimal 600,000-te pau, Zopau, pau MRTV sung ah om nai lo hi.

2. LAIZO PAU : FALAM leh RIHKHUADAR : Mi phazah: (46,000+6,000) = 52,000. (2013 census)

Falam gam sung ah zong pau nam tuamtuam om hi. Laizo, Sim, Zahau, Tlaisun, Zangiat, Khualsim, Ngawn, Hlawnceu, Hualngo, Tapung, Lente, Congheng, cihbangin minamkee sawm val khawng mah om hi. Awkaih kilamdang ciang bek hi lo-in ‘pau’ nam khat leh khat kithei lo tampi om uh hi. Gtn. in Lumbang (Zangiat)te leh tai lang ki gamla, Parte(Tapung)te pau kithei lo uh hi. Falam khua sung aa kizang Laizo pau leh tai thum ki gamla Tlaisun khuate pau ki bang lo-in kithei lo uh hi. Zangiat pau leh Khualsim pau atuam vilvel ahi hi. Lente leh Ngawnte pau atuam tuak ahi hi.

Laizo, Zahau leh Simte pau kilamdang ciat napi, ‘awsuah’ kilamdang pau nam khat kici thei ding hih teng thum om aa, Laizo pau kici Falam Lai pau ahi hi. Tua lo Zangiat, Khualsim. Tapung, Tlaishun, Ngawn cihbangin ki thei lo uh ahih ciangin ‘pau tuam’ ciat ahi hi. ( Thomas P. Hre, Sydney April, 2019) Tuate lak ah “Ngawnte pau pen Zopau ahi hi” i ci khin zo hi.

Falam gam sung ah Laizo pau azang mi phazah [ 52,000 – (Zangiat + Ngawn * Tapung + Tlaisun + Khualsim pau azang teng) lakhia leng] alang = 25,000 kiim, atampeenpeen, hi ding hi

MRTV Program sung ah mi 25,000-in azat Laizo pau om hi.

Kale-Kabaw kuam sung ah Falam mite a-om uh hangin Chin State sung aa om zah pha lo uh hi. Tua baan ah, Falam minam tuamtuamte Kawlzaang atun uh ciangin amau paukee ciat uh zang aa, Laizo pau zang nawn lo uh hi.

KAWLGAM AH LAIZO PAU INN SUNG AA AZANG :

1. CHIN STATE AH… [52,000 – (Khualsim + Ngawn + Zangiat+Tapung+Tlaisun, etc)] = 25,000 kiim om hi.
2. KALE- Kabaw leh Tamu kuam sung ah….< 25,000 sang tawmzaw in Laizo pau zang bek ding hi.
3. YANGON….(Khuang Lian, May 2018)1,012 , (ii alang = 500 bek in Laizo tong zang)

A. HAKA LAI PAU : HAKA, THANTLANG mi phazah : 64,00+53,000=117,000. (2013 census)
Haka leh Thantlang gam sung ah zong minamkee tuamtuam om uh aa, pau nam tampi om hi. Zo Miphun (Zo Minam) kici, Zotung, Zophei, Mara, Lautu leh Senthang Zominam, Mi-e, Bual, Zanak, Vanzam, Khuarin Tlang cihbangin om uh aa apau uh kibang lo-in akithei lo tampi om uh hi. Haka Lai pau zang lo uh hi. Tua ahih manin ‘awkaih’ kilamdang bek hi lo-in pau tuamtuam hi aa minam zong atuamtuam in kikhen uh hi.

Zo Miphunte pen Haka gam ii population 70% bang pha hi.(U Tin Aung, (Zotung), Sydney – 2019) Haka, Thantlang, Matupi, leh Kanpetlet ciang ah om uh hi. A pau (awsuah hi lo) uh ki lamdang ciat uh aa Lai Siangtho leh Labu nei tuam ciat uh hi. Mundang atun uh ciangin, Haka pau za lo uh ahih ciangin thei nawn lo uh hi.

2017 kum, August kha-in Oklahoma City, US ah Zotung pastor, Sia Ro Ling Thang tawh ka ki ho kha uh hi. Ka theih nop khat omin, “Haka pau-in bang kici” ka cih leh ”Haka pau thei keng ( “na ma le bu” ) ong ci hi. Lamdang sa in ka dong phapha hi. Amah kum 30 val hi aa US atun zawh kum 5 bek pha hi. Haka pau thei lo hi.

Tu laitak Haka Lai pau azang taktak Haka leh Thantlang ah mi 40,000 kiim (30% of 117,000) pha hi. Khualzin, sumbawl, kumpi nasem tawmkhat sim loh akhua ciat uah amau pau ciat bek thei uh hi.
Haka Zo miphunte Gangaw gam ah zong om uh hi. Tuate-in Haka lai pau zang lo uh aa amau pau ciat uh zangin nam khat leh khat Kawlpau tawh kiho uh hi.

Kale-Kabaw kuam sung ah a om Zo Miphunte zong amau pau ciatin pau-in Haka lai pau zang lo uh hi.

“Lai pau” tuaktuak hinapi-in Haka ‘Lai holh’ leh Falam ‘Lai tong’ kibang lo-in atuam tuak ahi hi. Ataktakin Falam Lai tong leh Zopau pau kinai mahmah aa Haka pau atuampi hi lai hi.

KAWLGAM SUNG AH HAKA LAI PAU AZANG :

• CHIN STATE Haka, Thantlang ah …( mipha zah ii 30%) ……..40,000
• KALE, KABAW leh Tamu kuam sung ah………..………….20,000
• YANGON..(Sang Lian Mang, 2018 )..5,213, ( ii 30% in Lai Holh zang)….1,400
• GANGAW gam ah Haka Zo miphunte-in Haka Lai pau thei lo uh hi.

INDIA GAM ah Mara minamte om uh aa, Mara pau zang uh hi.

B. MINDAT / KANPETLET MUN leh DAI PAU :

Mindat leh Kanpetlet gam : Mi phazah : 55,000 + 22,000 = 77,000 (2013 census)

Mindat leh Kanpetlet gam sung ah minam, Dai, Mun, M’kang, Uppu, Runtu, Rungtu cihbangin atuamtuam om uh hi. A pau uh zong atuam ciat ahi hi. Mun leh Dai-te tampen uh aa, Mindat/Kanpetlet ah miphazah ii 60% kiim hi ding hi. Saya Sing Phe Ling, 2019 Dai leh Mun-te awsuah/awkaih ki lamdang hi bekin pau nam khat kici thei hi. Mindat Cho mite sung ah, Dai leh Mun pau azang tampeen-in 46,000 kiim, (60%kiim) in azat pau ahi hi.

MRTV ah tua mimal 46,000-te-in azat Mun leh Dai pau program nei uh hi.

KAWLGAM SUNG AH DAI LEH MUN PAU AZANG

• CHIN STATE : …Mindat / Kanpetlet ah (60%) ………. ……….. 46,000
• YANGON : .(.Shing Ling Aung, Roger Mana Naing May 2018 ) ..695 .(ii 60%) = 360 kiim

C. MATUPI – BATU PAU : Mi phazah: 56,000. (2013 census) Matupi gam ah, Batu, Dai, Zotung, Miram leh Khumi cih bangin, minamkee om uh aa apau uh atuam ciat ahi hi. Batu kici Matu khuapi sung aa omte leh, Dai minamte pau 50% bang ki bang uh ahih ciangin Batu leh Dai pen ‘awkaih kibang lo’, pau nam khat kici thei hi.. Kuilan, Sydney April, 2019 Ahih hangin, Miram, Khumi leh Zotungte atuam ciat hi-in pau kithei lo uh ahih ciangin, minam tuam ciat ahi uh hi.

Tua ahih ciangin Matupi gam sung ah Matupi pau azang, awkaih kibang mimal : 56,000 – [Khumi +Zotung+Miram]= 30,000 kiim pawl ahi hi.

CHIN STATE AH INN SUNG AA MATUPI PAU (batu) AZANG MIMAL :

• MATUPI..…………………………… ………..30,000
• YANGON…..…Paw Lian Hlwan, May 2018..………< 565

D. PALETWA : Paletwa ah mi 98,660 om hi. ( 2013 census) Minamkee atuamtuam om uh aa, Khumi, Khawngtu, Lemi, Nise, Likhy, Rengca, Rakhine, Mara ci-in kikhen uh aa, pau zong atuamtuam vive mah ahi hi. Awkaih kibang cih ding taktak zong om lo hi. Tua lak ah Kaladan Khumite leh Khawngtu mite tampeen aa amau pau azang tampeen pah hi. Rev. Kingvel.

Tua ahih ciangin, Paletwa ah a tampenin azat Khumi pau pen atam penpenin 40,000 kiim hi ding hi.

KHUMI PAU AZANG :

• PALETWA ah…( mi phazah ii 50% bangin tuat leng ) ……….. < 40,000
• YANGON ah……Aung Kyawt, May 2018……………………… 638

Chin State sung bek i et kik ciangin inn sung aa kizang pau tuamtuamte leh a zang mimal phazah maan thei penpen dingin anuai aa bang ahi hi,

1. Tedim Tonzang, Cikha + Ngawn: Zopau azang mi,.140,000 + Ngawn
2. Falam gam ah Laizo, …….Laizo tong azang mi.… 25,000 (sang tawmzaw)
3. Haka/Thantlang ah………. Lai holh azang mi….… 50,000 (sang tawmzaw)
4. Mindat, Kanpetlet………….Mun, pau azang mi……. 46,000 (sang tawmzaw)
5. Matupi gam ah …… Matu pau azang mi…….. 30,000 (sang tawmzaw)
6. Paletwa gam ah … … Khumi pau azang mi……50,000 (sang tawmzaw)
7. (Kawl gam leh India gam ah Zopau azang mimal, 600,000 val pha hi)

Thukhupna leh vaikhakna
Kawlgam, Khamtungmite pau khempeuh lak ah pau dangte sangin, azah thum pan nga aa tamzaw mite-in azat Zopau, nang pau ahih manin bangzahin kiphatsakpihhuai hiam? Zopau nampipau ahih lam thei in la, milak ah, maingaltakin Zopau pau in! Dr J. Suan Za Dong