Uganda gam a Lake Albert kici ah gunkuang tum

Uganda gam a Lake Albert kici ah gunkuang tum

Dec. 27, 2016: Africa continent sunga bual (lake) golpen 7na Lake Albert kici ah Lungdam bawl ni-in Buliisa district nitumna lam-a om Kaweibanda khua panin Hoima district ah football kimawl ding leh en dingin kuan uh a, tuate tuanna gunkuang (boat) kilumlet in bual ah tum (capsized) hi.

Hih gunkuang tuahsiatna tuak pen ah mi 45 tuang hi. Buliisa police ulian John Rutagira in tu dong hih tuahsiatna tuakte siluang 9 kimu ta a, mi 15 suakta in, a dangte kimu nai lo hi ci hi ci-in Daily Monitor in suaksak hi. Gunkuang tuahsia pen Ugandan football team leh a fans-te uh Kaweibanda khuate ahi uh hi.

Hih gunkuang tuahsiatna tuak mit tawh mu ten a genna uh-ah a gunkuang ah mi tuang dim phitphet a, a tuangte gunkuang pang peuh-ah tuang uh hi ci uh hi ci-in Rutagira in zan in ci hi. News agency in a genna ah gunkuang a kilumlet ma-in huih hat mahmah a, gunkuang a kilumlet khit nunga tuipeek thei teng suakta uh hi ci uh hi ci-in gen hi.

The Ugandan local news agency in Lake Albert pen leitung adingin bual gol pawl hi a, DR Congo gamgi leh Uganda gamgi a om hi a, hih bual-ah gunkuang tuahsiatna piang mun mahmah hi ci hi.

More: South Africa ah kamsang akici pa’n thoza tawh natna damsak theihing kici

2014 in Congo gam panin galtai mi 250 kiim Uganda ah lut dingin kithawi-in a tuanna uh gunkuang kibung/kilumlet a, mi tampi in sihna tuak hi. August 2010 in zong hih bual mah-ah gunkuang tuahsiatna hangin mi 33 si in, mi 17 suakta uh hi. Source: News agencies/Thang Khan Lian