Na thauval ding kidawm in

Na thauval ding kidawm in

“United Nations Food and Agricultural Organization” kankhiatna ah United States pen leitung ah mithauval (Obese) atampenpen gam hinawnlo hi ci’n Report uhhi. Leitung ah mithauval atampenpen gam ahihleh Mexico gam hita ci uhhi.

Mexico gamsung aom mihing Population ii 32.8% pen mithauval (Obese) in ki ciamteh hi. Kum 20 tungsiah te ii Body Mass Index (BMI) pen 30 val hamtangpha cimawk hi. Tua ahih manin United States sangin tamzawta uhhi. United States sungah mithauval in akiciamteh pen Population ii 31.8% ahihi.

Leitung mithauval atampen athumna ahihleh Syria gam hi a, Population ii 31.6% pen athaulua Obese in ki ciamteh hi. Tuazom ah Venezuela leh Libya te hi uh a, hih gamnih pen 30.8% ahihi.

Zogam ah Zomi te athau kingkeng khawng kimuleh hoih kisa mahmah in, “na thau in, nahoih ciai” kicinong hihang. Gamdang ah mithau leh mithauval khawngpen hoih kisa masakhollo hi.

Mexico gambang ah mithauval atamna pen cidamna tawh akituakding ann leh tui nezolo uh ahih manin, cidamlo (Malnourished) in apumthau kingkung gawp uhhi kicihsan lel hi. Mithau tepen acidam penpente himasa hetlo ahih manin, thauluatkhawng nuamluatding himasa khollo hi.

Mexico’s National Nutrition Institute pan Physician khat ahi Abelardo Avila in agenkhiatna ah “Mithauval ihcihte pen acidam khollo Malnourished te hizaw hi a, mizawng te sungah Malnourished kitam ahih manin, mithauval tammahmah hi” ci’n genkhia hi.

Mexico gamsung ah kumkhat in zunkhum (Diabetes) tawh asi pen mi 70,000 pha cimawk a, kum 6 sung migilo Gangster te thahlup sangin, zunkhum in kumkhatsung athahlup tamzaw ci uhhi.

United Nations in leitungbup Level tawh a et uhciang in leitungbup aom mikhempeuh Total Population ii 12% pen mithauval (Obese) hi cimawk uhhi.

Alangkhat lamah enkikleng leitung ah mithauval atawm penpenna gam ahihleh Japan gam hi a, Japan Population ii 4.5 bekbek mithauval in ki ciamteh hi.

Tua hi in thauluat khawngpen ahoih himasalo a, nathauluat leh naci adamlohna khat aomkhawng hikhathei dinghi. Thauluatpen kipaakding hilo a, kidopding hizaw hi. ZD Sawltak 2013-07-10

Prevalence of obesity among adults in developed countries (% obese)

Source: United Nations Food and Agricultural Organization’s 2013 State of Food and Agriculture Report