Na Pa Kua? ~ Rev. Khoi Lam Thang

Na Pa Kua? ~ Rev. Khoi Lam Thang

“PA” i cih kuate :: Pa i cih pen Pasal zinei, tanei, sate ahi hi. Tua bang “Pate” a pahtawi ihi hi. Zileta nei khin napi “Pa” a cing zolo pawl khat i om mah bangin, zi nei nailo mahin “Pa” lungsim a nei mi muanhuai tampi om hi. Zi na neih nai loh hangin “Pa” lungsim picing neih sawm in. Tuabang mite Pa muanhuai suak uh hi.

Innkuan thupisak ni :: Zomite in innkuan i thupisak ding hun hong tungta hi. Innkuan thupi’na i awlmawh kei leh, na khempeuh hong ki-songsawlawi dinga, puahphat zawh loh dingin i cimgawp ding hi. Innkuan kicim leh, Pawlpi kicim hi. Gam kicim a, minam kicim hi. Mizote Vanlalzualta in a gelh, “I inah hawng rawh” cih laibu Zuasiamte hanciamna tawh Rev Job Thawngno in “Na innah ciah in” ci-in hong khenkhia hi. Zomite in innkuan thupisak ding kisam hi. I ciah mengmeng kei leh, a ziakai khit ciangin kibawlpha thei nawnlo ding hi. Bang ciciah ding???

Leitung khuahun in hong talkaih ahih manin Zopate gamdang kipai henhan hi. Kum 10 phialphial zileta tawh kikhenin i om hi. Tua bangin innkuan tawh kikhen i om mah bangin, inn pan zinkhia hetlo napi zileta tawh a kigamla mahmah “PA” tampi om hihang. Khatvei Lusei papi khat a khe hek in nasa mahmah hi. A zi-in nitak thapai, luphun mateng mekmek sak hi. A zingciang a zi-in; “Papi, na khe i mekmek a noptuam hia?” a cih leh a papi in, “A natna lam nong meksak nailohpi” na cihsan hithiat hi. Pumpi omkhawm lungsim kikhen zong haksa mahmah ahi hi. Nupa kal lungsim kipia-in, nai takin i nungta hiam? Pawlpi nuam, gam nuam, minam picing i suah nang i innkuan pan bulpat ding hihang.

Pastor sem a, ka manlah mahmah hun, zinlevak siksana, khua sung pawl sung ka van hun tuma kum 10 lai-in ka tanu u bel Niang Sian Lun kum 3 pha hi. Anau kapkap a khemna in nau-oih la khat phuaktawm a, “Nau aw kapkap kei aw, Pa pa vak ee, nu nu om ee” ci hi. Ka lungsim vakvaklo ahih manin, ka tanu’ phuah nau-oih la in tam veipi hong phawng kikkik hi. Innkuan i cidam kei leh, Mi-in hong et ciang innkuan mah hi napi a sunglamah,a tam, a tan, a vang, a kitat, a sawi tampi a om leh vangam malep ahih sangin hellgam malep hi zaw kha ding hi. Hihbang tunte bulphuah in, “NA PA KUA? cih lungngai ni.

1. A khatna “na pa kua”?

Pa nei lo mihing i om kei hi. Ahih hangin i pa neih dan kibang lo hi. Tua ahih manin Pate ni hong tun ciang:

• Pawl khat ading angtan’na,
• Pawl khat ading maizumna,
• Pawl khat ading lungmuanna,
• Pawl khat ading lunglen’na a hi hi.

Leitung Pate bek i lamet tawpna hi leh a hehpihhuai mahmahte i hi ding hi. Leitung pianna i pate zong mihing mah hi uha, a ci uh na thei hi, heh thei hi, tawl thei hi, lung tom thei hi. Ni khat ni ciang a si dinghi lai hi. Late 118:8 in, “Mite i muan sangin, Pasian muan ding hoih zaw hi”ci hi. Mihing mah ahi i pate paihlet-in vantunga i Pa muan sawm ni. Tua vantung Pa in a hong itna le hong hehpihna a khangkhang in kip hi. Nang tua Pasian, PA in na muang nai hiaam? Israel mite in Pasian ta hihna kisak theihpih mahmah uh hi. Abraham paulap in ki-innbulsak uh hi. A hih hangin Topa Jesuh in, “Note na pa uh Dawimangpa, A kipat a kipan mithatpa, Zuau khem pa —–” John 8:55 cihsak hi.

Pasian theilo, mawhna sungah a mangthang mawhnei eite’ adingin, Jesuh tatkhiatna hangin Pasian tate cihna i ngah thei hi. Kha Siangtho in Pasian pen, “Pa aw Pa aw” hong cisak hi. (Rom 8:14-17, Gal 4:5- 7). Pasian na pa hia, nang Pasian’ tapa na hihna Kha Siangtho’ kipsakna tawh na lungmuang nai hiam? Eite Pa taktak in Pasian ahi hi. Pasian pen eite pa ahihna tawh leitung mi khempeuh in a kikim hamphatna i ngah ciat hi. Topa Jesuh in thunget zia ding hong hilhna ah, Pasian pen Pa aw ci-in hong samsak hi. Tua manin, “Vantunga om ko te’ Pa aw” i ci ngeungeu hi. Topa thungetna i nget ciang Pasian pen Pa taktak a kipsak ihi hi. Nang na pa kua hiam? “Ka pa taktak Pasian hi” a ci thei kim dingin Topa’n thupha hong pia ta hen!

2. A nihna “na pa kua”?

Pate’ dinmun gen dih ni. Na tate in, nong ‘Kua hi’ hong ci ding hiam? Na zi na tate in nang hong et ciang bang mel a mu ding hiam? Na ‘maipuak’ ah na ‘hihna’ tuang hi. Hong kihta maw, hong zahtak maw? A pa’ mel pailet in Pasian a mu thei na diam? Singapore ( T T C ) ka sangkahpih ka lawm Sia, Go Suan a nu hong si hi. Anu’ maan a et ciangin a khitui kikham zolo a, pasal pito kap hanhan hi. Ke’n tua maan ka et hangin ka kap kei-a, nupi khatin ka mu lel hi. Ke’n a kimu thei “a mel en”, a mah’n a kimu theilo ‘ahihna mu’ hi. Na tate in hong et ciang bang a mu diam?

Khat vei Youth-Camp khatah zu nene, a gilo mahmah khangno khat hong kikhel hi. Siapa tawh thu hong kikumkumin lumgnopna ngaha, vantung gam thu khawng kikum uh hi. Khangnopa in “Siapa tua ahih leh, vangamah ka pa a na om tam” ci-in a dot leh, siapa in zong, “Om ee, vangamah it ngaih teng kim dinga, nuam mahmah ding hi” na ci hi. Tua leh, tangvalpa in, “Siapa tua banga vangamah ka pa a om ding leh tung nuam keng, ut keng” ci hi. Bangmah kikup theih nawnlo hi. ‘PA’ hi napi tate in a kihtak om thei hi. Nang koi bang na hi hiam? Noah in lengngah zu a kham manin a tate pawlkhat thupha kipia a, pawlkhat kisamsiat hi. Amah leh amah kikem zolo liang dingin na omlo hi leh, leitung mi khempeuhin thupha sang ding hihang. Pa a ginat loh manin Tate’n gentheih a thuak ding Pasian in hong awilo hi.

Tu huh ciang in ei pate in i tate tungah; “No kong hilh zahin ganhing khat hilh leng zong pil in teh, hilhhilh hang hilh banglo, taklam bilin za, veilam pan pusuaksak—–thu manglo hon!——” ci-in kitawng ziahziah thei hi. Tate thuhilhlo Pa a om diam? hilh loh ta kua a om diam? Khatvei Papi khatin a zi a tate theihloh in zu dawn sim thei zel hi. Zingsang khat tho khiankhian in zu a va dawn leh, a tapa kum 7 pha pan a vak belbel khat a pa’ omna zusai hong tung velval mawk hi. Papi pa a mai lah zum si, lamdang lah sa si in a tapa kiangah, “Kua’n hih lai-ah hong paipih ahia?” a cih leh a tapa in; “Pa aw, kua mahin hong paipih kei, na khekhap zui-a kong paipai leh hihlai hong tung hing” na ci hi.

“Na hilhhilh teng na hilhloh; Na hilhloh teng na hilhhilh” hi thei hi. Na tate in nangmah hong etteh uh hi. Na tate in pate’ maitang hong et ciang:

• Pasian a it mahmah Pa musak in,
• Thupha a piapia Pa musak in,
• Tate a lungmuangsak Pa musak in,
• A lungduai Pa musak in,
• Zuau genlo Pa musak in,
• Tate a it mahmah Pa musak in.

Na tapa in na leisak zawh nailoh ding mortor cycle khat hong ngen niloh leh na bangci dawn diam? Khatpa in, “Tua bang thute ka zakna ah gen nawn ke’n. Leizo kei ni. Sum nei khang! Nong ngetnget lai leh na taw hong sat ding ka hi”, ci hi. A tapa lau mahmah hi, Ngen ngam nawnlo takpi hi. Khatpa in, “Tua bang pipi ei lei zawh ding hi lopi, ahih hang deih takpi na hih leh Pasian kiangah ngen ni maw, i Pasian hau hi lo maw! Kisam asak leh hong pia ding ai ve! Na khedap deih zong thu i nget leh Pasian in hong pia a, i leizo ve mate” ci hi. Leilo veve napi a tapa lungkim a, a pa tungtawn in Pasian muang thei hi. Nang a kua zaw na hiam? Paunakin; “NU hoih innkuan ading, PA hoih gam ading” ci hi. “Pa aw,” ci a hong sap a pa, nang hang in, na tate in van-a Pasian a muan lawh leh ‘Pa man pha’ na hi hi. Koi ci bang ‘Pa’ na hi hiam?

3. A thumna “na pa kua”?

Pate thu tate dinmun pan gen leuleu ni. I pate in lai theilo-in a hawmthawh huai mahmah phial zongin zahtak in, thupi sim ni. A mah i pianna ‘Pa’ ahi hi. Pasian in ei a tate tungah ‘Thunei’ dinga, a seh ahi hi. Nu le pa’ thupha a luahte hampha mahmah uha, enhuai mahmah uh hi. Nu le pa thupha a sanglote nuntak hamsia-a, lawhcinna nei ngeilo uh hi. Nahlawh pek ding na ut hiam? Tua ahih manin Pate i thupi sim leh, thupha in hong nungzuih pah liahliah dinga, Pa te i simmawh leh gentheih liangvaihna in hong sulzuih ngekngek ding hi. Thupha leh hamsiat koi i tel zaw diam?

‘Dawibia’ i cih pu le pate in, “Pusa” ci-in biakna nei-a, pu le pate kha a lungkimsak ahi uh hi. Lawkite zong a ban zolo Khristiante ihih khak ding dahhuai hi. I pu i pate-in “Nu le pa’ awi loh nah lawh peklo hi” ci-in na kithuhilh uh hi. ‘Nahlawhpek lo’ cih pen “Nuntakna kisongsawilawi” cih na hi. Milim bia i cih Buddhist-te in nu le pate pen Pasian nam khat in bia uh hi. A nungta Pasian a biate in milim biate sangin i niam ding maizumhuai lua hi. Nu le pa zahtakna in, “Nampi lungsim” hi a, minampite in nuntakpih uh hi. Tua milim bia i cihte in paunak nei uh a, “Nu le pa khitui malkhat, Taten zawn lawh khangkhat”, ci tanghial uh hi. Nu le pate khitui luangsak kei ni. Khasiasak kei ni. Lungdamsak ni. Lungkimsak ni. Angtang sak ni.

A nungta Pasain kammal Lai Siangtho ei a dingin kicing hi. Pu le pate paunak, milim biate paunak sangin zong kicing zaw hi. Muanhuai hi.Thu man hi. Paikhiatna 20 sunga thukham (10) thu Efesa 6 sungah i sim kik hi. Nu le pa zahtakna in Pasian thupiak lian khat hia, Khrisian ngeina hoih ahi hi. Khapna thu tawh kizom paih a, “Thu khempeuh hong hoihin na khansau ding” hi ci hi. Nah lawh hong pek ding hi. Sepna peuhah lawh cinna hong om ding hi. Cidam le khansau hong kithuap lai ding hi. Nu leh pa na simmawh leh a cizethuai hamsiatna nang tungah hong tung ding hi. Paunak sungah “A nu le a pa a tek ciangin a samsia mi-in khuazing sunga meivak kisumit bang ding hi” ci tazen hi. Khuazin zawh ciang meivak kisumit lailai leh nuntakna khuazingin buaina meei hong kai ding hi.

• A pa a simmawh mipa,
• A nu’ thu a mang muamlo mipa,
• Va-ak in a mittang khelsakin,
• Musane te-in a sane ding uh hi. Paunak 30:17

Hamsiatna sang pen ahi hi. Tua ahih manin kumkhat khat vei Pate’ ni a bawlte hi lo-in a khangkhanga thupha sang minamte i suah nang Pate a it, a pahtawi tawntung mite hi dingin Pasianin hong siam ta hen.

U te naute!

“Van tunga om kote’ pa aw” a ci thei dingin Kha Siangtho-in a thakin i lungsimah hong phawng ciat hen! Van-a pa hangin a lungmuang thu um mite hih sawm ni. Pate in tate’ ading limpha suakin Pasian kiang a tu’npih Pate i suah na’ng thungen ni. Van thupha lei thupha a kop-in i ngah nang pianna Pate tung pan thupha dawh siam ni. Rev. Khoi Lam Thang