Na dau apai nuam hiam Luka 5:7

Khatvei Gennesaret Tuili gei ah Zeisu ding hithiat in aom laaitak in Mipi te in Pasian’ thu zanuam in Zeisu hongnehcip uh hi. Zeisu zong akhua daak leh tuigei ah gunkuang nih aom amu a, Tua gunkuang nei ngasa beng te a gunkuang pan un tuakkhia in tui sung ah angeen te uh asawp keei amu hi. Tua gunkuang te sungpan in Simon Peter akicipa I gunkuang sung ah Zeisu tuang a leitawh tawm akigamlaatna mun ah na gunkuang hotpheidih ve ci in Simon kiang ah Zeisu in a ngen hi.

Tuaciang in Zeisu Simon gunkuang sung ah tu a, tua laai pan in mipite thu thuhilhna kipan pah hi. Thu hilh na aman ciang in Simon kiang ah Tuithukna lam ah na gunkuang hot inla nangeen tawh ngasa khuh in aci hi. Ahizong in Simon te peen zantha paai ngen ana khuh kawikawi sa bangmah manlo a lungkia dikdek a ana om uh ahihman in akhuh hang ngasa manding in kilam en hetlo a, Sia aw zanthapaai ngasa ka khuh uh hang in khatzong makei ve ung aw.,, ahizong in nangcih ahihciang khuhpong ning ci in dawgkik hi.

Ngeen akhuh peetpeet leh zantha paai amatlohsa na munpan ngasa tampi tak man a angeen bang kikeek dektak liang hi. Amah zong nuamlua mahmah ahihman in agunkuang khat zaw a om alawmte akhut vanpah ziahziah in alawmte zong agunkuang uhtawh ongpai in agunkuang tegel dim un ngasa guang uh ahihman in tuisung ah tummang dektak liang uhhi.

Tuni in Inuntaakna sung ah ahizong in I innkuan sung ah ahizong in, isep ibawlna ah ahizong in, sumbawlna, pilna sinna ah ahizong in lawhsam kisa in, daupailo kisa in lungkia thaneem in I omkha hiam? Peter zong zantha paai ngasa beng in khatbeek zong manlo in lungkia thaneem in om ngiungeu hi. Ahizong in Zeisu tawh kimu in Zeisu ading in mun apiak ciang Zeisu in Peter kisap naak tel lua mahmah a, Peter in lamdang asakzahkhop in Peter ngenkhuh nading mun ah ngasa nakoih hi.

Tua Topa in nang le kei biak Pasian hi a, Peter bang in mun ipiakding bek ongngak a hi hi. Inun taakna sung ah, ilungtang sung ah tuni in Zeisu munpia in amah sam lehang, Sangkah kah taleeng igualzawhlohna sa mun, Sumbawlbawl taleeng imeet theih mahmah lohnasa mun, naseemseem taleeng sum ikholzawhlohna mun, Gamdang paitaleeng idau apaitheih mahmahlohna munte mah ah Zeisu in lawhcinna, gualzawhna nakoihsak ding a, ong daupaisak kik ding hi.

Tua Topan minthanna ngahtawntung ta hen!

Khawm Pau