Kachin, Myitkyina aom Kanbawza Bank ah damiah lut, thein 920 puakhia

Kachin, Myitkyina khuasung aom Kanbawza Bank ah damiah lut, sum thein 920 puakhia

Myanmar, Kachin State ii Capital khuapi ahi Myitkyina City sung aom Kanbawza Bank ah damiah lutin sum tengzakua leh sawmnih (thein 920) puakhia uh cih 7Day Daily pan kiza hi.

Myitkyina Myoma Market sung aom dawlkhatna ah akihong ahi Kanbawza Mini Bank sungah zanni (Tuesday) nitaklam 3pm hunpawl in damiah alut ahihi. Damiah tepen mi 4 pha uh a, Motorycle lukhu akhusa in Bank sungah lut uh cihi.

Myitkyina Police khat ii genkhiatna ah damiah ataihpen mi 4 pha uh a, sum akigawm in Thein 920 puakhia uhhi. Tuciangciang akiman kuamah omnailo hi ci’n nitaklam 5:20pm hunin genkhia hi.

Zanni nitaklam Bank aki khakkhitzawh nai 3 khitdeuh in damiah mi 4 te thakhatthu in Kanbawza Bank sungah lutsuk uh a, apuak uh thautawh Bank sungah nasemte ngimpah uhhi. Tuakhit ciangin Bank sungpan in sum akigawm in Thein 920 puakhia in, taimang vingveng uhhi ci’n Kanbawza Bank paninzong Statement khahkhia uhhi.

Hih damiah lutvaitawh kisai in Kanbawza Bank panin thunei te’n Myitkyina khuasung Police Station ah Report bawlpah uhhi.

Myitkyina khuasungmi amukha pawlkhat te genna ah Motorcycle lukhu khusa in mi 4 Bank sungah lut uh a, temta leh thautawh Bank sungah nasemte ngimpah uhhi. Bank nasem pawlkhat in akhamsawm uhhangin damiah te’n satsukziau uh a, Phone leh CCTV tezong suksiatsak uhhi ci’n genkhia hi.

Tua damiah lutna KBZ Mini Bank aphual ah a encian in apai Kachin State palik ulian Zaw Khin Aung kici in agenna ah tulaitak pen athu aki kanciansan laitak hi a, bangmah akician in genkhiattheih omnailo hi ci’n nitaklam 5pm pawlin genkhia hi.

Hih Kanbawza Bank damiah lutvai tawh kisai in khuasung lamzikpi pawlkhat palik te’n khakcip uh a, Checking pawlkhat pawl uhhi.

More: Kawlgam ah KBZ Bank pan sumguksawm khat kiman

Abeisa 2017 October khasung inzong Tanintharyi Region aom Myeik khuasung ah akihong Kanbawza Mini Bank ah pasal khatin thautawh damiah taihin sum honkhat puakhia ngeihi. Tuapa zong damiah ataih laitak in Motorcycle lukhu khusa in Kanbawza Bank sungah alut ahihi. Sawltak #zomidaily