Myanmar kumpi in khakhatsung in nasemding mi 23,204 gampualam ah paikhiasak

Myanmar kumpi in khakhatsung in nasemding mi 23,204 gampualam ah paikhiasak

Myanmar kumpi in abeisa May khasung khakhatsung bekbek in gamdang ah nasemding in gamtuamtuam ah mi 23,204 zinkhiasak hi ci’n Xinhua News te’n pulakkhia uhhi. Tuabangin Myanmar gampanin gampualam ah nasemding in apaikhia tepen Migrant Workers kici a, Myanmar gamsung ah nasepding omlo ahih manin gampua aki pusuak ngeingai ahihi.

Tuabangin Myanmar Authorities in gampualam apaisak te lakah mi 20,812 Workers tepen gamveng Thailand te kiangah hi a, gampua nasemding in aki paikhiasak lakah Thailand gamsung nasemding in apai tampenpen hi.

Tuazom ah mi 1603 Workers tepen Malaysia ah kipaikhiasak hi. Tuaban ah mi 342 Workers tepen South Korea, mi 201 Workers tepen Japan gamah cihbangin nasem in kipaisak hi.

Tuaban ah Jordan, Singapore, China’s Macao, United Arab Emirates (UAE), Qatar cihbang gamtuamtuam ahzong Myanmar gammi nasemding Migrant Workers dingin azinkhia pawlkhat om cih kiza hi.

Hihpen May khasung Myanmar gampualam ah nasemin azinkhia te pulakna ahihi. Tuahunsung May khasung mahinzong Myanmar gamsung ah mi 13,096 tepen gamsung nasep tuamtuam, Local Employment tuamtuam ah nasep kiguanthei cihi.

Tukumsung January kha panin May khadong Myanmar gampan in gampualam ah nasemding in kumpi theihpihna tawh azinkhia Migrant Workers bekbek akigawm in mi 89,819 Workers pha uhhi. Tuahunsung January pan May khasungmah inzong Myanmar gamsung ah Local Employment nasep akiguanthei pen akigawm in mi 87,610 Workers pha uhhi.

More: Tulai Kawlgam gamthu in koilam manawh hiam? ~ Bob Tuangpi

Myanmar Ministry of Labor, Immigration and Population te’n nasemte sumlut Income akhantheih nadingin hanciam mahmah uh a, gamsung gampua ahzong nasep Job Opportunities atamsemsem theihnading in nakpi in vaihawmsan mahmah uh cih kiza hi.

Hihtepen kumpi theihpihna tawh gampualam ah azinkhiatebek hiding a, tualo in Social Visit tawh gampualam azinkhia, aomsuaksuak zong tampimah omthamding hi. Myanmar gamsung kikhel, khangto ihcihsam hangin, nasep hoih ngahkhakding hamsalai mahmah, Job Opportunities tawmlai mahmah ahih manin, gampualam ah ki lunggulhtek cih kimuthei hi. Sawltak #zomidaily