Myanmar gam mi 3000 Malaysia in puakkik sawm

Myanmar gam mi 3000 Malaysia in puakkik sawm

Malaysia kumpi in Myanmar gammi gilbem ah a koihte uh mi tampitak Covid-19 positive cih mukhia uh ahih manin mi 3000 bang peuhmah puakkik sawm uh hi, cih thu Malaysia a om Myanmar Embassy te kiang pan kiza hi. Puakkik zia ding vanleng vai a kipan a kisam teng zong gam nih uliante kithuza khin hi, ci-in gen uh hi.

Malaysia kumpi in gamdang mi laibu neilote a mat uh ciangin kha 3 pan kha 6 bang gilbem ah kem phot uh a, amau gammi hihna amau gam embassy te tawh kihona a om khit ciangin a gam puak kik ahih kei leh kitansak uh hi.

Gamdang mi amatte uh a kikhumna detention center ah nungkal Thursday ni-in Covid-19 positive mi 277 kimu thak a, tua lakah mi 270 te pen gamdang mi vive hi, ci-in Malaysian Health Ministry Director Pu Noor Hisham Abdullah in gen hi.

Tulaitakin Myanmar gam mi a kiman mi 3000 val om, ci-in Malaysia lam thuneite in gen uh a, Myanmar thuneite in tuate lakah mi 200 bang Myanmar gammi hi lo uh hi, ci hi. Myanmar gammi ahihna a kiciante pen Myanmar gamah kilakik ding hi, ci-in Myanmar lam ulian Ko Ko Lwin in gen hi.

A beisa May 11 ni-in Myanmar gammi 391 hong kipuak kik khin zo a, tua mi 391 lakah mi 4 Covid-19 positive hi, cih kimu khia hi. May 8 ni panin tuni ciang Malaysia pan Myanmar gam hong kipuakkik mi 591 pha ta ahi hi.

More: Tulaitak Malaysia Covid-19 pulpi Lock Down vai in Zomite haksatna zia

Malaysia gamah Covid-19 hangin nasep nei lo mi cimawh tampi om a, naupai leh natna dang nei a cimawh zong tampi om hi, ci hi. Myanmar kumpi geelna tawh a sawt loin mi 400 Myanmar gam hong ciah ding uh hi, ci-in Myanmar Embassy zum pan thu kiza hi. Source: The Irrawaddy/ The Tedim Post