Muvanlai panin sinding thute ~ Dr. Ngul Khan Pau

Muvanlai panin sinding thute ~ Dr. Ngul Khan Pau

(Thuhilhkikna 32:11-12, Job. 39:27-29) – Muvanlai sang leen hi: Muvanlai pen niamleen ngei lo a, sangleen den hi. Leitung ah guah zu-in meivom a kaai laitakin a san’na mun meiite tungah ni na tang veve lel hi. Muvanlaite tua mun dongah lengto vingveng uh hi. Tua mun a tun uh ciangin tawldam uh hi.

Nang zong sanleen nopna lungsim na neih ding kisam hi. Bang hang hiam cih leh a sanna mun, nitaanna mun ah kitawldam hi. Vantung gam a tung ciang bek ding hi loin, a kidim nuntakna a nei ding, nuntakna tui a dawn ciang bek hi loin, nang sung panin nuntakna tui a phulkhia ding na hi hi. Leitung pen na kha mahmah a, Pasian pen na lim mahmah hi. Pasian’ limzia va ciam phot lecin leitung a khaatzia na tel pan ding hi.

Muvanlai a khuamuhna uh hat hi: Muvanlai pen a mit thahat mahmah a, a mit in kilometers 5 a gamla ciang pen siangtakin mu thei hi. Vandawn pan a etsuk ciang gul suang kiang suangnuai a meidawn a tang pen mu thei ziau lel a, bawhsukin a an dingin tuah ziau hi. A lang khat ah tangtel in a gamla mu thei loin, a mai a lei ciang bek mu hi.

Mailam saupi ding muhkholh ding, vision lianpipi nei ding kisam hi. Tumahmah a kipanin na mo ding, na pasal na zi ding le na tu ding thungen khol in. Ko nupa in zong tapa nih ka nei uh a, a neutung pan kipanin a zi ding uh thu ka ngetsakpah uh hi. Tu-in sangkah lai uh a, zi nei nai lo uh hi.

Muvanlai in ama thah bek ne: Muvanlai pen musane tawh kibang lo hi. Musane in ganhing a si, a pul, a uihte ne hi. Sapul omna peuh ah musanete kikhawmpah lian uh hi. Muvanlai in ama thah sa bek ne hi. A si, a pul a muat, a uih cihte ne ngeilo hi.

Nang zong man nei dingin Jesu in hong tankhia hi. Mite eng niloh ding, mite’ neihsa a deihgawh dingin Pasian hong hong deihlo hi. Mite’ cimtaksa khat, nang na deih lailai pen Pasian limna leh alna na theih loh man ahi hi. Pasian limna leh alna tel lecin leitung a lim lohna na tel pan ding hi.

Huih tha tawh a sangzaw ah leng: Vasa dangte pen huihpi a nunteh lau-in a buk sungah bu uh a, huihpi a ven’teh lengkhia ngam pan uh hi. Muvanlai leuleu in huihpi nun ding ngak hi. Huihpi a nun’ teh huihpi kipuasak a, huihtha tawh a sangna lamah lengto hi. Nuihpi a ven’teh a bu sungah tumkik pan hi.

Haksatna hong pai ciangin tua haksatna siksan in nei inla, a sangna lamah kahto in. I buaina leh tua buaina hun leh tha i piakzia ngaihsuthuai hi. Gentehna in puankhuina phim mansuah in tua phim mi thum mi li in i zonna tha tawh sum thalawh in phim bekbek leina in zang leng tampi kilei zo ding hi. Lawhcin’ nop manin a citak hi kenla, na cihtak manin a lawhcing hizaw in.

Muvanlai in a zi zonzia: Muvanlai a paa in a zi ding a zon ciangin a nuu tawh a sangpen dong lengkhawm uh hi. A nuu in a muk ah singkeu khat pet a, tua pen lei ah khia suk hi. Leilak a tuk ma-in a paa in a nuai ah bawhsukin man a, a nuu kiangah tua singkeu pia kik hi. A nuu in a sangna munah lenpih kik a, khat vei khia kik leuleu hi. A paa in leilak a tuk ma-in a nuai panin na man leuleu hi. Tua danin sagih vei dong hih a, a paa in a top zawh leh muantaak, belh taak, na sa panin tenpih pan hi. Nang zong muantaak, a belhtaak mah na hiam? Muvanlai bang hi lecin a nuu in a pasal dingin hong deih zo ding hiam?

Muvanlai in a note a pattahzia: Muvanlai nupate in mualsang dawn suangheng kawm pi 50 panin 120 banga sanna mun ah bu bawl uh hi. A bu sungah ling vive thuap thum bang phah uh hi. A paa in a awmmul teng botin, ling tungah phak hi. No a neih uh ciangin leh a note hong let deuh ciangin a paa in a mulnel teng a kha tawh zapkhia a, a note lingtungah omsak hi.

Tua khit ciangin a note a bu sung pan sawn khia a, len kisinsak hi. A note in a kha uh zap uh a, len kisinna hipah uh hi. A note vansang lamah pua to-in tua pan khiasuk hi. Tua bangin a sangna lam len ding kisinsak uh hi. A nuai lamah kiasuk leh zong leilak a tuk ma-in a paa in na pang a, tua bangin pua to kikik hi. Nang zong Pasian in lenkhiat ding hong kisinsak nop manin na om kipna na buk sung panin hong sawnkhia thei cih phawk ni.

Muvan lai khansau uh hi: Muvanlaite pen kum 70 sung bang nungta uh hi. Kum 40 a phak uh ciangin teek uh a, thakia uh hi. Tua bang hun ciangin a sangna lamah lengto uh hi. Mun muanhuaina munah a cinte suang tungah taatkhia uh a, a multe botkhia uh hi. Ni 70 sung sawt a, tua hun sung teng anne ngiat lo uh hi. Ni 70 a cin ciangin a cinte uh hong po kik a, multhak zong hong po khin hi.

Hih panin muvanlai in khansawt ding amah leh amah kikepzia na nei cih kimu uh hi. India gamah leii cancer, gawl cancer leh kamsung cancer tam mahmah hi. Tuate pen nekna, dawnna, muamna pan vive hi a, tuate in mihingte hong khantomsak hi. Vasate nangawn amau leh amau kikemzo uh ahih leh Pasian mel a sun mihingte ei leh ei kikepsiam huai mahmah hi. (Zosuan Tuailai Khawmpi sung April 24, 2015 nitak a thugen a kitomlak hi, GS Pau, Tedim Thukizakna Lai July 2015) Rev. Dr. J.M. Ngul Khan Pau – Zomi Daily