Muh ciil Melbourne – 3
Leitungbup zel in a minthang vangvang ZOTAWI LIANU movie sungah a kihelte biakinn ah kikhawm ding cih ciang ko zong lawp takin ka kithawi saisai uh hi. A mel uh hoih cih lah i theihsa, a gamtat luhek uh lah tangzang cih i muhsa, a vanneih vanzatte uh lah world class hi cih i theihsa…
Zomi Christian Fellowship, Melbourne te makaipi Pa Tun Khan Pau in ka zinma ni zingsang in tai 6000 kigamla pan hong phone vangvang a, “Tu Nipini keima hun ding hi in, nang nong zin ding ka zak ciangin nang hong zang lecin ciin deihsakna tawh kong khin nuam hi,” hong cih ngeungau ciangin mite deihsakna ka tan aw ciin lungdam takin ka sanga, ahi zongin ka kisuanglah pian hi; amau hun zat ding kimlai hong nekngaih cih pen itna hang hikei leh a baih hetlo ding cih ka thei hi. Upate in ‘nung lam sa bah’ acih bangun theih kholhloh hamphatna hi ciin ka ciamteh hi.
Kikhawm dinga ka tai vangvang uh leh minute 25 khit ciang Lilydale Baptist Church ka tung uh hi. Biakinn kong ah mawtaw koihna om zihziah a, biakinn kiim ah pak nam tuamtuam kisuan in singkung leh pak kung a golzaw tawh huandai teng kium hi. Biakinn kongkhak ah i lut leh a sungah lai tuamtuam kisuang in a kikhawm mite theih ding thukizaksaknate hoihtak in na kigual diudeu hi. Zunbuk, ekbuk hoihtak in a gei ah kikoih a, a kiu khat ah tutna leh kingakkhopna cih bang om hi. Kikhop tawpma leh kikhop tawp khit ciang kituahna mun ding hileh kilawm hi. Biakinn sung i lut leh a lai, a vei leh tak ah tutphah kigual in a laizang bek tuni in kikhopna in kizang hi. Mi 500 pan a tunglam bang tut theihna ding biakinn sung ahih manin a sung nopci mahmah hi. Pulpit lam ah la makaite kigual diudeu a, hunzeekpa leh adangte zong ut leh tut theih dingin mun lianpi kidawhtam hi. A pulpit pang tuak ah music tumte leh kikhopna sungah vai a neite tutkholhna ding mun lianpi awngsak uh hi.
Ka lut uh ciang mipite in phatna la na sa ziahziahta uh ahih manin i lung hong nuam mahmah a, khua lam ah kum khat in kikhoppi khatvei bang i neih i pai lasak a nuam mahmah hun tawh kibang hi. Music tumte lah siam, music van lah kicing, phatna leh biakna makaite lah kipiazo in lasakte lah nuam ahih manin mi 70-80 bang kikhawm ka hih uh hangin nopci mahmah a, ‘vangam malep’ acihte ka phawk liang hi. Zomi hizah om maw ciin ka lung hong nuam mahmah hi. Australia ah Zomi a tun zuahzuah kitheilo napi a gualnuam mahmah, Pasian a it mahmah vive kikhawm hi cih ka muh ciangin ka angtang a, nuam kasa a, hampha zong ka kisa hi.
Leitung mun tuamtuam ah ka khualzin khakna mun peuh ah ka lungsim hong lawng leh hong lungnuamsak mahmah den khat pen music tum i siam mahmah tek leh lasak a gualnop mahmahtek na thu ahi hi. Gam thupi ah omte in music van a kicing mahmah in neitek uh a, a tualo te in zong music van neih bangbang tawh lasak makaih in nuam mahmah hi. Music van – drum, guitar, keyboard, etc a kicinga neite hampha diak uh hi ciin ka mu hi. ZCF Melbourne zong tua a hampha te lak ah kihel hi cih ka mu hi.
Khatvei kikhopna ahite hong ding un a cih uh ciangin koh bek mah ka hih manun ka dingto uh a, maithak muakna leh mel kilahna hun nuamtak in hong zangsak uh a, mipi in khutbeng ziahziah in vaidawnna hun hong zang uh hi. Ka zi Vung Deih Cing zong lungdam mahmah a, mipi tungah lungdamna thu tomno a gen hi.
Upa pa Pa Pau in ama hun hong piak ka lungdamna thu ka gen kawm in mipi khempeuh tungah hong deihsakna uh lungdam ko in ka angtanna thu ka gen a, hampha ka kisa semsem hi. Nipi Sangnaupangte in phatna la a sak ziahziahte uh thupi ka sa a, tuni-a naupangte tuzawh kum 20 ciang gal-et kik leng ‘lungdamna khitui a luang ding hi’ cih ka upna ka gen hi.
…Zomi te pen Pasian in hong puakna mun peuh ah kitung dinga, Pasian in hong koihna mun peuh ah kinungta ding hi. Pasian in hong kep naak leh i phut lah ding omlo a, Pasian in hong makaih peuh leh i thuaksuak zawhloh ding omlo hi. Zomite in bel i sep ding tampi lak ah Pasian in bangtan hong tunpihta hiam cih ‘mualsuang’ i phuh tohtoh ding bek hi. Moses in San Tuipi a kan khit ciang Israel mite in ‘mualsuang’ na phut uh hi. Zomite in zong tangtunna khat i neih ciangin ‘mualsuang’ i phut hi. Ciamtehna i nei hi. Tuma hun in ‘suang’ taktak kiphut in khuanawl ah, khuapam ah kiphut a, khualzin gamvakte khawlna mun ah kiphut nuam se hi. Mi khempeuh in thei leh cih deihna hi. Mite in hong theihpih leh cih deihna ahi. Mite lak ah i kipulakna hi a, mite hong phawkpih ding i deihna hi. I leiko man hilo a, i lungdam man, i dah man, i phawk den nop man ahi hi. Mangngilh dingin pammaih i sakte ahih man hi. Mikim in tua bang phawk ding i nei hi.
Tuhun ciangin nidang bang nawnlo in ‘mualsuang’ dingin ‘suang’ teekteek kiphut nawnlo a, ciamtehna tuamtuam kinei thei hi. ‘Suang’ taktak i phut hangin i tenna mun kikhel den ahih manin kip nawnlo hi. Suang taktak pen sawt leh pulh in cim a, kisia thei hi. Suang sangin laidal khawng to zawta hi. A kisia theilo bel hilo napi a to pen suang na hinawnlo hi. Mite khua khat pan khua dangah zin den nawnlo a, khua tampi, lui tampi, gam tampi kantan in zinkhiata uh hi. Tua manin laidal khawng ah ciamteh leng mualsuang a to zaw hita hi. I tunna ciangciang ‘mualsuang’ a phut dingin i kihanthawn hi. ‘Mualsuang’ phut cih ciangin kisial ding cihna hilo in Pasian in bangtan hong tunpihta hiam cih ciamteh ding cih deihna hi. Pasian in hong laptohna lungdam ciamtehna hi. Mite tungah kiphatsakna leh kigualzawhsakna hilo in eite hong piangsakpa, hong kempa tungah i lungdamna i lahna leh Ama hong pii, hong makaihna a pulak ihizaw hi.
Pawlkhat cihtheihna hong pia a, pawlkhat cidamna hong pia a, pawlkhat haksat gimna tawh nuntakna pan nuntak nuamzaw gam ah hong tunpih hi. Pawlkhat i gim i tawlna mangngilh dingin nopna hong tangsak a, pawlkhat i zawn i ngauna mangngilh dingin bawngnawi leh khuaizu luanna gam ah hong tun hi. Pawlkhat i gentheih i khanna i mangngilhna dingin mite nunnop hong musak a, a lim a al hong ciamsak in, amaute mah bangin nisim ann hong pia hi. Lungdam in nisim lungdamna mualsuang i phut ding hi… cih thute khawng ka uang gen diak hi. Tua pen Christian i hihna tawh kituak in Zomite ci banga al a khuavak banga taang ding i hihna nam khat hi. I alna, i khuavakte mite adingin a lim, a al, a lamlak, a manpha hidenta hen.
Kikhop tawp ciangin ka pu Pa Sawm Thang leh Pi Lun in amau nupa minin ko hong vaidawnna in Pawlpi mi khempeuh tawh Lilydale Park ah sa tuamtuam em in gilvah takin hong vak uh hi. Hih BBQ ah sangawi, satak, sa bak duh zahzah ne in mehtui tawh kicing mahmah hi. Football kimawl in, maan kila in holim gualnuam mahmah tase leh hunte hong pai dandan maikal ciang kimu dingin ka kikhen phot uh hi.
Hih ka annek na munte uh ZOTAWI LIANU video a kilakna mun hi cih khawng ka lungsim ah ka phawk a, ahi zongin mite tungah ka gen kei hi. Lungsima lungdamna leh angtanna, Zomi history khat a pianna mun ah hun nuam ka zatte nuamsa leh am mahmah in nunglam mitnei bang phial in khia lah pipi in inn lam ka ciahsan phot uh hi. A nuamzaw tampi omlai ding cih bel ka phawk gige hi, banghang hiam cih leh Kangaroo zong kimu nailo ahih manin…
(zop lai ding)
Hau Za Cin
Phuitong Liim
www.hauzacin.blogspot.com
Comment piaknop aomleh...