Italy gamah zinling hangin mualtung vukkhallom kia in mi tampi vuklum

Italy gamah zinling hangin mualtung vukkhallom kia in mi tampi vuklum

Jan. 19, 2017: Italy gam laizang (central Italy) a ziinling hangin mual tung panin vuk khal (avalanche) lom tolh suk in ski hotel vuk khum a, mi tampi in sihna tuak hi ci-in Alpine police group head Antonio Crocetta in tu ni-in pulak hi. SkyTG24 television in a site pawl khat Abruzzo kiim-a om Pescara province sunga Gran Sasso mualtung omna kianga om Farindola khua-a Hotel Rigopiano sungah kimu hi ci hi.

Media reports in a genna ah Abruzzo kiim-ah ziin a liin’ lai-in Gran Sasso mual tung nuai-a om Hotel Rigopiano sungah zin (guest) 20 leh hotel staff mi 7 om uh hi ci hi. Hut khiatna nasem (rescuers) ten hotel panin mite hepkhiatna dingin vuk khal tung-a taina dinga kizang mawtaw “snow mobile” nei uh ahih manin mi 8 hunkhia man uh hi. Civil protection agency in mual tung panin vuk khal lom tolhte sah lua ahih ambulance dal a, pawl khat vuk omna panin metres nih pawl khat Km.9 gamla in dal ahih manin lut thei lo uh hi ci hi.

Mual tung nuai-a om hotel tawh a kinaih Farindola khua kiim teng leh Pescara province president Antonio Di Marco in mi nih dam in kimu a, mi bang zah kimu nai lo a, mi bang zah lianin sihna tuak hiam cih kigencian thei nai lo hi ci-in a Facebook page ah tuangsak a, mual tung panin vuk khal tolh/kicim suk ten inn (building) deih takin a nawk khakte metres 10 in kikhin zo hi ci hi. Dam a a suakta mi nihte zong hotel sunga omte hiam cih kitel nai lo hi. A suaktate lakah mi khat in a pumpi vot lua mahmah in natna hypothermia kici nei a, Pescara khuapi sunga om zato inn khatah helicopter in kipuak hi.

Pescara kiim pen ziinling mun diakna kiim (seismic region) hi a, zan a kipanin magnitude 5 tung lam a hat naikal li sung ziin li vei liing a, mi khat si hi. A ziinling kipatna lian (epicentre) pen nung kum-a ziinling hat mahmah a liin’na Amarice khua leitaw lam-a om Montereale hi a, vuk khal in hotel a vukna panin km. 90 in kigamla hi.

Nung kum August khat-in Amatrice ah ziin liin’na hangin mi 300 phial in sihna na tuak hi. Gran Sasso mual pen metre 2,912 a sang hi a, mual tung panin vuk khal (avalanche) tolh ding hi ci-in Gran Sasso mual tung kiim-a omte kiangah kidawm un ci-in warning kipia hi. Hih kiim pen vuk khal tunga tai (skiing)-te zinbuk ski resorts kici neu nono tampi a omna ahi hi. Source: News agencies/ Thang Khan Lian