Mualtung kahna pan sinkhiat ~ Lang Khan Chin

Mualtung kahna pan sinkhiat ~ Lang Khan Chin

2013 kum a Dzuko Valley ka pai pen simloh gengen ding tangthu khat ka nei leuleu hi. Mi adingin a thupi kei phial zongin kei bang a Pasian in melhoih taka a bawlte adingin a thupi mahmah nimit 26 June, 2020 ni-in a minthang vangvang Hausapi Vum, M-Mual zong a kici, munah ka va kahto gemgam sam hi. Upmawh sangin hat ka kisa a, tangval lai ka hih lam bang ka kiphawkkhia sansan hi.

Mualtung kah mengmeng lo ka hih man zong hi kha ding, thu tampi va sin khia ing. Thusuak tampi va ngah ing zong kici thei in teh. Tua teng lak panin tamlo kong gelh khia hi.

KISAKKHOLH KISAM:

Mualtung kah ding pen koi hiam ah va hawh ziau tawh kibanglo a, limtak kisakkholh kisam hi. Ko bang “zingnai 5:00 a.m. a kingak ding” ci ka hih manun ihmut baih hong kisam hi. Buaina tuamtuam tuaklohna dingin pumpi & lungsim mahmah zong nakpi in kisakkholh na kul hi.

Ei singtang mite lam tuamtuam ah i lawhcin theihlohna uh pen kisakkholna omlo a i kalsuan hang uh hi deuhin ka thei hi. I sep, i bawlna ah sangpi i tun nopleh limtak kisakkholh kisam hi.

MAKAI KISAM:

Cikmah a pai ngeilohna ah kipai ding ahih manin, ana pai sa, a lampi & omdan thei ding makai kisam hi. Ko zong lawmpa PK Lun makaih in ka pai uh a, amah pen na pai sa ahih manin nuam mahmah hi. A hun ma hi leh a hun laitakin zong ama hong cih bangbang in ki-om hi. Amah muang in, a thu zui ka hih manun ka lamzang mahmah uh hi.

Tuhunin ei khangnote lakah makai kisamlo ding zah khopin i kideihkhop mahmah ta uh hi. Nu le pate bang simmawh bawl khawng ki-om hi. Amau totsa lampi a tawn i hih lam phawkhuai hi. I nuntakna ah makai hoih i neih lai teng kilamzang ding hi.

A SANNA LAM KIZUAN:

Mualtung kah pen a sanna lam kikah toto ahih manin tawlhuai hi. Tua manin nawh pai hetlo a, damdam a kah toh ding, tawldam zel ding pen kisam mahmah hi. Khangno lai cih mah takin maingap bawl a, kah toh buatbuat ding zong na hi pah lo hi. Tua dan i hih leh, a khuanung gu pen thuaklah huai peuhmah hi.

I nuntakna zong tua bangmah in ka mu hi. Pumpi, lungsim & khalam ah a sanna lam kah toto hi hang. Nawh pai hetlo a, damdam a pai hiathiat ding kisam hi.

A KUMSUK LAM BAIHLO:

A dawn ah naikal 2 tang bang tawldam khit ciangin ka kumsuk kik leuleu uh hi. Khe zong golh gawp ta in, tua banah suk lua mahmah ahih manin a kumkik pen na baih vetlo hi. Gamtang khial kha leng a nuai pekah kikhuk khiat theih ding zahin om mawk hi.

Pasian maipha ngahin a thupha te zeka i om pen nuam mahmah hi. Ahi zongin Pasian maipha bang ngahlo in tu a i dinmun panin kiasuk leng baih vetlo ding hi. Tua bang a tuak tampi zong om ta hi. En zong tuak thei gige i hih dan thei kawm a pilvang tak a nuntakna zat ding hanciam ni.

VAN KISAP TENG BEK KIPUA:

Zing ann nek ma a pai ka hih manun ann puak kisam. Banah tui leh nektheih tuamtuam zong puak ong kisam. Mualtung kikah ding ahih manin a kisam pha diak teng bek mah kipua a, a kisamlo te kipua lo himai hi (numeite bag bel lian veve).

I nuntakna ah a kisamlo na tampi i puak/buaipih luat manin i hat dingzah i kihat zolo thei hi. Kisamlo ding tam i puak luat manin kigim a, i tunna ding tung zolo cih bang zong ki-om lawh hi.

LAWMTE MANPHATNA:

Lawm hoih taktak tawh kizui ka hih manin nuam ka sa mahmah hi. Ka gim uh hangin khat le khat tha kipia in, a hatlo deuhte kipanpih, a van uh puaksak cih bang… Ciamnuih bang genkawm zel in kikalsuan theithei hi. Theihloh kalin tungbaih ka kisa uh a, ka gim uh hangin nuam ka sa uh hi.
Lawm hoih neih pen phatuam mahmah hi.

Hiking to Hausapi Vum/M-Mual

Tuhun ciang, mi kingaisia cih bang i tam mahmah ta a, tuate’n lawm hoih deuh, a lungkhamna uh gen theihna ding khawng neilo uh ai tam aw? cih bang hong ngaihsunsak hi. I vangikte hong puakpih ding lawmhoih i kisapzia phawk thakthak ing. Tua tawh kitonin, lawm hoih i neih ding a kisap zahzah in ei zong mite adingin “lawm hoih” i hih sawm ding pen poimawh hi.

A DAWN AH BANG OM HIAM?

M-Mual dawn ah suangmanpha om cih zong hi peuhmah lo hi. A dawn ah a manpha bang hiam omlo ding cih theisa a kikahto mah hi. Ahihleh bang hang a kikah hiam? A hang pen kibanglo ding a, a hang tuamtuam na om kha tek sam ding hi. Ahih hangin a dawn tung peuhmah in lungkimna (satisfaction) khat kinei dingin um ing.

Nuntakna mual ah i kah tohtoh lai-in i kah na hang theih kisam hi. A dawn ka tun ciangin a thaman mah ding hiam? cih pen kidothuai hi. Tua phawk thei nai lo i hihleh tuni in phawk huai hi. I purpose theilo pi a mawk gamtat ding hilo hi. Tua bang dingin a mawk nungtak hilo hi hang!

MI TAMPI MUALTUNG KAH NUAM:

M-Mual pen mi tampi zong kah khin napi, mi khempeuh na kah hetlo uh hi. Kei zong a zekai lam ka kisak leh a kah nuam honkhat mahmah na omlai ahih dan ka theikhia hi. A pai masate maan khong leh a genna uh a zak uh ciangin lawp uh zong hi kha thei ding hi. “Nang zong na kah zawh leh kei zong kah zo ning” hong ci zong om hi.

Na nungah mi tampi hong pailai ding hi cih thei kawmin khutma hoihtak na nutsiat ding kisam hi. Mite’n na gamtatna hong muhna pan un “ken zong ka zo mah keidia” a ci diam? Nang hangin mite mual kah nuam ahih ding kisam hi.

Gen ding tampi omlai mahleh hunsak phot ni. Saidan Taang kah ciang adingin siit bawl leng maw… Mual kah teamte: Mung Tawng, Khaipi, Kham Khual, Peter, PK Lun, Mungno, Mangsen, Neunu