Vondeih Kep Ding – 130 (Dimno’ Pa)

Vondeih Kep Ding – 130 (Dimno’ Pa)

Dear Tawngno,
Tuma kum 30 lai-in i gam ah tapidaw pen 4.9 % bek hi-a, tuin 6.2% ah khangto ta in, a tam penpen ahi miliim biakna pen 89.4 % panin 87.9% kiam suk hi, ci-in Dr. Tint Swe article gelh khat panin sim kha ing. Thu-um mi tapidawte hong khang tektek zaw ahih manin lungdam huai cih ding hi. A dah huai thu khat leuleu ah kum 2000 in WHO te Health System tawh kisai sazian a bawlna ah i gam pen a nuainung penpen i atung lian ah no. 191 na mun la-in, tu dongmah tua mun ah om lai leh kilawm hi. Dah huai mahmah sa ing.

Ih gam ah pen numei leh pasal average in kum 66.6 bang bek ki nung ta hi. Ih kiim aom gam ahi, China te 76.1, Thai te 74.9, India te 68.3, leh Laos te pen 65.7 cih bangin average in nungta uh hi. Japan pen kum 83.7 hi-in, Sierra Leone pen 50.1 hi-a, amau nih pen leitung ah kum sawt a nungta penpen leh tom a nungta penpen gam uh hi. Pasian in hong gelsak sa leh hong gelsak hun ah kisi ci-in i um sam zongin mimal kikep siamna, khua hun leh i nek i dawn mahmah in zong i cidamna leh i khan sauna hong kilamdang sak tuam dingin um mawh ing.

‘The Future Is Better Than You Think’ cih laibu sungah 1750 B.C hun lai-in meivak neu khat ngah na dingin pasal khat in 50 hrs bang nasep kul a, A.D 1800 kiim ciangin 6 hrs bek sep kul hi, ci-in, laibu gelhpa Peter Diamandis in na gelh hi. A.D 1880 ciangin i Lalcin cihte khat ngah na dingin 15 minutes bek sep kul a, 2016 ciangin 0.5 Second bek sep kul hi, ci hi.

Computer khat pen kum 1950s kiim pawl lai-in building pi khat dim a, 1970s pawl ciangin room sung khat ah kita ta hi. Kum 1980s kiim ciangin sabuai tungah koih theih dingin Desktop in hong piang ta a, kum 2000s kiim ciangin khut khat tawh tawi ziauh theih ding Laptop in hong om ta hi. Leitung khantohnate lungngai leng up ngam huai ding hi kei liang sa ing!

Ka notebook ah zanni a ka ciapteh teng kong gelh suk gawp hi.

“Tuni hun tom si! Tukal bei baih si! Tukha aw ei, thei loh kal in hong bei ding hi ziau,” ci-in hun bei baih na sak sim in na phawk ding thukhat hong gen nuam ing. Tua kammalte na pau khiat ma-in, Pasian in damna hong pia ahih lam phawk in, Pasian tungah lungdam na ko masa phot in. Lupmun tung ngak in dam lo-in om le hang mitphiat kal na ngawn sawt kisa mahmah ahi!

Hong it,
Na Pa

January 30, 2018