Penang ah zatuikham Motorcycle hawlkhatin mawtawkhat satsakgawp

Penang ah zatuikham Motorcycle hawlkhatin mawtawkhat satsakgawp

Malaysia, Penang State sungah Motorcycle khatleh mawtawkhat themkha ki nawkkha in buaina pianghi. Tua buaina hangin Motorcyclist papen hehmahmah a, kitomgawp hehgawp in mawtaw zong satsakgawp cih NST pan kiza hi.

Penang, Taman Sungai Nibong lamkabom ngei ah tuni Thursday thupiang hi a, mawtaw ahawlpen nupi naupaai khat hisawnsawn hi. Motorcycle tawh themkhat aki nawkkhak ciangin Motorcyclist papen hehmahmah a, amasa in sek “Hammer” khattawh mawtaw kongkhakman “Windows” teng khetsakgawp hi.

Tuatawh lungkimzo nailo in, Motorcycle Helmet tawh kipan leuleu a, Motor Windows tengmah satsakgawp hi. Tuabangin Motorcyclist pa agamtat laitakpen ageinai aom te’n Video zaihkha uh a, tua Video Clip pen Social Media tungah ki thehzakpah hi.

Motorcycle ahawlpa pen guihtheih khamtheih zatui “Drug” khatpeuh akhamsa hiding in ki ummawh a, zumnamel zong theilo in hehgawpmang hi.

Hihvai tawh kisai in palik thunei ahi Balik Pulau OCPD Supt A. Anbalagan in agenkhiatna ah mawtaw ahawl nupi pen naupaai hi a, kum 27 aphakhin khat cihi. Nau apaaizawh kha 5 aphakhin hi a, anau numeikhat nasepna ah akhading in apailaitak ahihi.

Tua naupaai nupi in mawtaw pen taklam ah pialdingin damtak in ahawl ahihi. Tualaitak in Motorcycle penin mawtaw ii amai aveilam nawksak hi.

Ki nawkkha in buaina apian ciangin nupi naupaai penin Police Station ah Report kabawlding hi ci’n agen ciangin, Motorcyclist papen hehgawp in akitomgawp kici hi.

Video: A motorcyclist became aggressive after an accident and used a hammer and helmet to break the windows of a car driven by a pregnant woman

Tuabang tengtawh Motorcyclist pa’n mawtaw asatsakgawp khitciangin tuaphual panin taimang vingveng hi. Ahi zongin Police Report kibawl a, buaina apianzawh nai 3 sungin Motorcyclist papen kimankhiakik ziau hi.

Motorcylist papen kum 31 aphakhin khat hi a, abeisa inzong zatui tawh buaina tampi anei “Criminal Records” ahau mahmahkhat nahi sawnsawn hi.

Motorcycle hawlpa ii gitlawh gamtatna hangin “Section 427 of the Penal Code for committing mischief and causing damage” thukhun tawh thu kibawlding a, thong kum 5 ciangbang kikiasak theiding cihi.

More: Penang ah palik kineih pasal khatin Kawlgammi numei khat bawlsia

Tuaban ah Police te’n Test abawlciang inzong zatui “Drug” azang ahihlah kimukhia sawnsawn ahih manin, “Section 15(1)(a) of the Dangerous Drugs Act 1952 for drug use” thukhun tawh kizui in atuam inzong thu kibawlding cih kiza hi. ZD Sawltak #zomidaily